Sastra Madura Ta’ Mate

 

Poji sokkor angeng dha’ Guste Paneran

KASTA-na Nur Aisyah acareta reng towa bine’ se maksa ana’na alako tor ta’ materros asakola. Ana’na ongguna terro mondhuga, nangeng noro’ patona pangaterrona emma’na. Jang budhiyan emma’na kasta polana ana’na se alako nyellem ta’ le-mole.

Banne Tarompet Taon Anyar-ra Hasmidi sabaligga. Rida terro ambuwa asakola polana ampon padha moso tatanggana tor terro abantowa nyare pangoreban. Nangeng neyat ambu asakola burung maske emo’ alako.

Yulistiana dhalem Le-mele Bukkol acara Ji Sahid se terro andhi’a manto oreng sogi. Ana’na se anyama Rahma epakabin moso oreng se gadhuwan bine. Sabatara lamaran kancana Rahma etola’ bi’ reng towana polana oreng ta’ andhi’.

Babategga Sobri dhalem Loka Ta’ Adhara-na Ma Leo padha sareng Ji Sahid dhalem Le-mele Bukkol-la Yulistiana Ningsih. Coma, dhalem Ma Leo neka ambu saamponna etola’. Sabatara dhalem carpan Yulis gi’ badha masala anyar naleka Hasanuddin se saongguna ampon abine mokol Rahma sampe’ mendhar.

M. Toyu Aradana lebat Embi’ Celleng Ji Monentar acareta oreng nola’ lamaran kaangguy ana’na. Sabab, ana’ gi’ materros asakola. Tape cebbingnga mole abareng reng lake’ moso ana’na ollena se kadhuwa. Budi Santoso lebat Randha Ngodha acareta randha se tapaksa alajjai ajaganna reng lake’. Tatanggana dibi’ se gasek agudha elajjai polana mekker kaangguy ana’na se sake’.

Masala Gender bisa ebaca neng Ngantos Gettana Bato-na Mudhar CH. Ca’-oca’ pompong kacapo’ ka se towa gi’ badha. Hasmidi malappae careta Bulan neng Tarebung, tor Kaju Potong Tello Kale kalaban en-maenan e barung kobi. Bulan neng Tarebung  acareta coba otaba din-dadin. Sabatara Kaju Potong Tello Kale ngacator masala hokom.

Budi Santoso dhalem Andharun Peleyan Bupati ngeyassagi oreng se mele padhana oreng nyothok motor mate. Sabatara Peleyan Kalebun-na Ma Leo acareta calon kalebun kala se apele pole. Babatek bajing ta’ bisa ngoba peleyanna magarsare kaangguy mele maske aberri’ pesse.

Masala TKI bisa emaos dhalem careta Tahlilan-na A. Hamzah Fansur B. Kembang Polo Ra’as Ma Leo acareta keyae pondhuk se rengsa polana ana’na ta’ duli akabin. Bit-abidan, ana’na kacangke’ moso ana’na oreng bine’ se lamba’ burung ekabin keyae ganeka.

Saka’dhinto sakadar gambaran careta se etoles sareng tan-taretan se ampon soddi ngaromat basa tor sastra Madura. buku paneka bakal daddi sala settong bukte ja’ gi’ badha se maratena basa tor sastra Madura. Bi-lebbi basa tor sastra toles.

***

Jawa Pos Radar Madura (JPRM) gadhuwan tanggung jawab kaangguy areng-sareng meyara kabudhaja’an Madura. Sala settongnga kalaban nyadhiyai kennengngan sastra Madura kabit Minggu, 26 Juli 2015. Bannya’ se ngerem sanja’ tor careta pandha’ (Carpan).

Kantos akher Desember 2016 ampon makalowar 140 sanja’ tor 63 carpan. Bang-sebangnga 52 sanja’ gadhuwan 19 oreng taon 2015. Enggi paneka A. Rahem Umar, Budi Santoso, Muh Tauhed Supratman, Suhairi Rachmat, Faidlatul Jannah,  Subaidi Pratama, Moh. Ghufron Cholid, Harkoni Madura, A. Warits Rovi, Azizi Sulung, Misnoto, Hendra Purnomo, Rifky Raya, Moh. Shobri AM., tor Iskandar ZL.

E taon paneka jugan makalowar 24 carpan gadhuwanna sabellas oreng. Enggi paneka M. Toyu Aradana, Nur Aisyar, Uswatun Hasanah, Juwairiyah Mawardy, Ma Leo, Yulistiana Ningsih, Hasmidi, Budi Santoso, Set Wahedi, A. Hamzah Fansuri B., dan Siti Fatimah.

Taon 2016 makalowar 88 sanja’ gadhuwanna 31 oreng. Enggi paneka Hasmidi, Subaidi Pratama, Ach. Suhaili, Moh. Ghufron Cholid, Zainur Rahman Nr., Juwairiyah Mawardy, Amin Yazid, Ainur Rasyid, Muh. Tauhed Supratman, Uswatun Hasanah, Laut Mahbub, Ach. Faruqi el-Usli, Amin Yazid, Abdul Warits, Uswatun Syarifah, Dananil Afdee, Mudhar CH., Sugik Muhammad Sahar, Misnoto Arriefa, Syaf Amin, Rosyiqiyah Syar’il Islamiyah, Syair Dhani Smile, Mahwi Air Tawar, Soe Marda Paranggana, A. Hamzah Fansuri B., Tika Suhartatik, Harkoni Madura, Rofiki Ar., Azizi Sulung,  Iskandar Zulkarnaen, tor Matroni Muserang.

Sabatara 39 carpan e taon 2016 anggidan 15 oreng. Enggi paneka Ma Leo, Hasmidi, Budi Santoso, Mudhar CH, M. Toyu Aradana, Andi Fathorrazi, A. Rahem Umar Uswatun Syarifah, Ly Bintang, Ubaidillah Hasani, Amirul Muttaqin, Siti Fatimah, Musyfiq RZ., Bin, tor Fathor Rozi.

Oreng-oreng kasebbut rata-rata gi’ ngodha. Badha 14 oreng se noles carpan e buku paneka se laher taon 1990an. Paneka daddi bukte ja’ ngangodhadan Madura gi’ esto ka basana dibi’. Buku paneka jugan daddi bukte ja’ sastra Madura ta’ mate.

Akher 2007 kantos 2008 JPRM oneng makalowar sanja’. Nangeng bakto paneka ngampong kennengngan sastra Indonesia. Polana gi’ ta’ andhi’ kennengngan dibi’. Buku paneka menangka sambugel dhari 63 carpan se ampon epakalowar kabit Juli 2015 kantos Desember 2016.

Pangarep buku paneka daddi buthok nyennana sastra Madura. badan kaula ngatore poji salamet tor mator sakalangkong dha’ sadaja se nyerrat tor sadaja se abanto rampongngepon buku paneka. Otamaepon dha’ D. Zawawi Imron. Jamal D. Rahman, tor R. Moh. Hasan Sasra se ampon apareng pamanggi. Jugan dha’ BH. Riyanto se maekhlas lukisannepon kaangguy epadaddi bundu’. Mator sakalangkong dha’ sadaja para maos.(*)

 

Bangkalan, 2017

*Lukman Hakim AG, Pimred Jawa Pos Radar Madura.

*Serradan paneka epetthek dhari buku “TORA” 2017

Post a Comment

0 Comments