Ngampet Rassa

PAN-SAPONAPAN kabutowan re-saare ongga. Napa pole nalekana banne mosemma padhi otaba jagung. Maske badha kalakowan se maontong laenna. Akadi nae’ tarebung, tape kaangguy oreng neng penggir saba ta’ apengaro, karana tarebung ta’ tombu neng pinggir saba.

Coma bisa ngedhingagi caretana oreng gunong se pangaselanna epacokop kalaban nae’ tarebung. Nemor kara paneka mosem se samangken erassa’agi sareng Mursit ban reng seppona.

Kaodhianna Mursit bisa ekoca’ pendhanan bila ebandhingagi ban tatanggana. Tape menangka bandhingan eoba dha’ oreng dhaja gunong. Mursit ta’ eberri’ padduna lekka’.

Mursit aropa’agi na’-kana’ ngodha se ampon kelas tello’ madrasah aliyah e Disa Candi. Jau romana ta’ masorot Mursit nyoppre elmo. Ra-kera dhari romana Mursit ka sakola’anna lema kilometer jauna dhari temor. Sampe’-sampe’, dhari terrona Mursit asakola’a kose giliran sapedha motor ban kancana se anyama Paris. Ojan, panas, rese’, ondhem, otaba barat se kadhuwa paggun mangkat ngor-tangngoran.

Kellas tello’ aropa’agi parjalanan Mursit se kabilang malarat. Salaen esto dha’ oreng towa se malarat nyare pesse, Mursit agandhu’ rassa terro nolongana nyare lako. Rassa neser karana Mursit tao kalakowanna reng towana coma cokop ekakan dhuare. Sela bariya coma ekabelli juko’ ban roko’na eppa’na. Ontongnga berras karena mosem se bilan gi’ kare sakaddu’, saenggana ta’ parlo melle pole.

***

Mursit ban Paris ta’ tobang asakola ka Candi. Kaodhi’anna Mursit neng sakola’anna ta’ lebat dhari apol-kompol sakanca’an e kellassa. Mursit aropa’agi oreng se gampang akanca ban ta’ cerre’an. Daddi, na’-kana’ bannya’ se lebur akanca, lake’ otaba bine’. Dhang-kadhang dhari leburra ekakanca sampe’ bannya’ se ngenep neng romana.

Settong bakto, pareppa’na are Juma’at se aropa’agi are ta’ maso’ sakola’an. Mursit ban Paris entar ka sakola’anna amarga nekkane janji ngalakonana tugas kalompo’ se bakal ebagi bakto jareya. Tape saellana dhapa’ ka Disa Candi pas ojan toron ce’ derressa. Saenggana ta’ sampe’ dhapa’ ka sakola’anna. Dhari ce’ derressa sampe’ ta’ bisa nerrosagi parjalanan. Aherra Mursit ban Paris ngaop neng penggir jalan e kennenganna na’-kana’ ngodha se biyasa bu-ambu, melle nase’, ban melle kobi.

Ta’ abit ngaop, ojan ambu se nyapcap. Oreng-oreng padha mangkat nerrosagi parjalananna. Mursit molae masemma’ ka sapedhana se lokos ecapo’ ojan amarga gella’ kaburu. Ta’ epanaong ka barungnga Bu’ Shofa.

Saellana dhapa’ dha’ sakola’an, Mursit nojju kellassa. Tacengnga’ amarga kalompo’ se etantowagi ban guruna mapesa kalaban ca-kancana neng e kellassa. Tape pojur, Paris paggun apolong ban Mursit. Ban-sabban kalompo’ aesse empa’ oreng. Tacengnga’na Mursit atamba e bakto ta’ arassa kalompo’na Mursit apolong ban Lina, oreng se badha e dhalem atena molae lambe’. Tape rassa terrona ta’ dhapa’ karana tako’ se badha e atena bakal ta’ etarema.

Sapa se ta’ kennal ka Lina e sakola’an? Orengnga raddin ban manes. Eabas dhari konco’na soko kantos cocco’na kodhung tadha’ se bisa ecella sanaossa sateppong ngabber. Kole’na koneng akantha pottre koneng. Ales adhaun memba. Mata morka. Bibir amodhil jerruk salone. Elong mancong padha ban reng India.

Samporna. Etamba ban mowa se bunter akantha bulan pornama se moncar dhari temor sagara. Majellas pangabasanna mata e bakto malem ra’-tera’ tana.

Sanaossa kanca dhari kellas settong, Mursit ta’ pate akrab ban Lina. Polana Lina kembang malathe pote neng sakola’an. Dhari jareya bannya’ na’-kana’ se kapencot. Sampe’ badha kose ekatokar. Etamba kanyata’an ja’ Lina epabakale ban reng towana molae gi’ kene’. Saengga matako’ ka se aganggu mon saompamana nyemma’ana oreng sela ekaandhi’ oreng laen. Apa pole oreng Madura se ta’ ekenneng salae dhi’-andhi’na. Paste ta’ abit omorra oreng se nyalae ta’ kera burung mandhi dhara polana tajemma sadha’ mategges ora’-ora’na badanna.

***

Gi’aggu ampon teba. Sonarra are dhari temor terbas neng e bang-lobangnga roma maenga’ dha’ se andhi’ roma. Ja’ pajjar ampon leplep ekakan sonarra are. Abarri’ tandha ka Mursit se mangkada asakola. Rassa cellep se nyeddinga aeng. Apa pole angen se santa’ abuko’e badan bakto malemma. Tape, rassa terro nemmowa Lina e sakola’an makala ka cellebba aeng ban angen.

Saellana dhapa’ ka adha’anna sakola’an, ta’ sangaja matana Mursit tangabas ka Lina se buru dhapa’ eateragi ban reng towana. Tengka gulina laen ban se biyasana. Ban pole dhari angguyya se ta’ ngangguy saragam sakola’an. Matakerjat Mursit.

”Badha apa Lina ma’ ta’ padha ban se biyasana? Sela ta’ asaragam gi’ akaton sossa. Mowana padhana se lesso. Pajalanna lentor padhana se ta’ andhi’ ora’,” oca’na Mursit e dhalam atena ebarengnge rassa tako’ gantongan atena andhi’ masala se tadha’ carana kaangguy mateppa’. Atena Mursit terro atanya’a ja’ badha apa, ta’ mangga ka Lina se marengnges kadibi’an neng adha’anna kantor.

”Arapa ba’na, Lin, ma’ katon sossa?” Mursit sambi’ nyemma’e Lina.

Lina ngabas ka Mursit ban mowana nondhu’. ”Sateya dhi-budhina engko’ entar ka sakola’an reya. Engko’ epaksa ban reng towa esoro mondhuk. Engko’ gi’ ker-pekkeran ka ca-kanca se badha e diya. Ban pole engko’ tako’ ta’ perna e dhissa’. Engko’ kose eancam mon eppa’ gella’. Saompamana ta’ endha’, engko’ epalakeyana ban bakal. Iya gun jalan tong-settonga noro’e pangaterrona reng towa kaangguy mondhuk,” Lina nondhu’ ngosap aeng matana se  nyapcap sakone’ e pepena se kangan, gaggar ta’ egarassa.

”Lin, ba’na kodu sabbar. Adha’ caretana oreng towa nyabbur ana’na ka dhalem somor. Ba’na ja’ ngoso’ ka reng towana. Odhi’ reya peleyan. Torodi cacana reng towana, me’ pola olle pagi’ ba’na ngaolle elmo se lebbi manfaat dhari e dhinna’. Neyadda ka pondhuk ja’ sampe’ polana epaksa mon oreng towana. Tape neyat paonggu-onggu, ma’ le pagi’ ba’na olle kajembaran se asre. Sakone’ oca’ se bakal ebagiya ka ba’na dhari sengko’. Ja’ sampe’ ba’na loppa ka ca-kanca e dhinna’. Otamana ka sengko’,” oca’ Mursit se maonjek atena Lina. Lina gun nondhu’ nyepsep oca’na Mursit.

Saellana jareya pangabasanna Mursit ebalik ban majau dhari kennenganna Lina se jeng-manjeng ngabassagi badanna Mursit se sabban deti’na atamba jau ban elang maso’ ka dhalem kellassa.

”Lin, saongguna sengko’ ta’ bisa majau dhari ba’na. Tape jareya la tuntutan jaman se ta’ bisa engko’ senglae. Sengko’ paggun yakin ja’ ba’na paggun daddi peleyanna ate saomorra,” sowara atena Mursit saellana majau dhari kennenganna Lina jeng-manjeng.

Dhari: Ngampet Rassa