Sello’ Soca Mardha

 

AMPON para’ (em)pa’ taon kataresnaan se ejalana Sukab ban Marlena. Dhuwa’ na’-kana’ ngodha se saomoran sangabellas taonan ganeko mabanas kerrong, ban saleng ngorop mesemma e bibir sagara. Enaleka are ngombar ra-mera mardha.

Marlena menangka_bisa kabilang kembang Disa Kombang: paseseran. Ban oreng towana menangka jaraganna settong sampan e tase’ lao’anna: Aloran Balurat. Bida kalaban Sukab se oreng towana gun andhi’ bunte’ sabuter ta’ akater. Tape ngamparra dunynya, tenggina darajat keluarga-na, ta’ bisa ngoba ara rassana Marlena se gun akiblat ka settong lalake’ se odhi’na gun sa-biyasa. Barinto keya Sukab, maske badha dhalem kaodhi’an se sa-biyasa, ta’ magugur pangarebba ban ta’ malontor tarekana kaangguy ngaolle babine’ gantongan atena.

***

Kemmes se manes. Kolare-kolare eserrop angen. Pajjar sodiq. Agabay senggi’-senggi’ se arangka’-nalar e ngamparra beddhi ban bungko’na bato etangngale mang-ramang. Tape oreng se ajurunga pon padha ngagariyung e penggir sereng. Badha keya se pon mangkat. Messenna atharat-tharat. Barinto keya kalaban Marlena se ngater eppa’na kaangguy ajurunga. Ta’ abit, eppa’ na Marlena mangkat. Sabatara nojju ka Podhay: Takat Kapal. Tape saellana eppa’na mangkat sampe’ sampanna pon etangngale mettek dhari panampongan, Marlena ta’ langsung mole, namong nyare Sukab ka aloranna bunte’, asabab aloranna bunte’ ban sampan ganeko bida. Ta’ sampe’ jau atengka’, Marlena nangngale Sukab ajalan kadibi’ e adha’anna panampongan sambi mekol jaring.

“Ka’...!,” ologga Marlena.

Sukab atole, sambi maambu tengka’na se nojjo dha’ aloran bunte’. Ban Marlena ka’-berka’ nojju Sukab se sem-mesem konco’ e attas aeng sakeccem pappathek. Saleng dheb-adhebban. Sambi mesem. Parembagan ta’ gellem nyelbi’. Seppe bang-kambangan; e aloran; e pekkeran; se agandhu’ kerrong paleng kamarong.

“Ma’ abak abit ta’ etangngale? Sampe’ kerrong bula ebang-sabange mempe.” oca’na Sukab meyak seppe.

“Ta’ gun pera’ dika  se nanggung kamarong kerrong, bula engge keya.”

Seppe pole. Se kadhuwa (am)pon mare malontor kerrong se talebat longse.

“Ma’ buruwanna entar ka bula kose so-makaso. Badha nape?”

“Lagguna kan are Jumat. Ban oreng-oreng majang, termasuk dika keya, kan bakal ta’a alako otaba parai...”

“Engge, terros...?”

“Jam ennem lebat lema mennit, dika eantosa e kennengngan dhinto keya, ban bula ngarep dhika bakal dhateng.”

“Ma’ buruwanna, badha nape ko?”

“Bula badha se ekacaca’a. Parlo.”

“Emm. Mon kerana sanget parlona. Insyaalh bula bakal dhateng kalaban ate se barenteng.”

Marlena mesem balibir, e matana nandang saebu pornama.

“Bula ta’ andhi’ bakto bannya’, ngaterra emma’ ka pasar. Sapora ban kalangkong.”

“Engge pon kassa’, edukani manna. Te-ngate e jalan.”

Are se buru nyarandhang abarengnge tengka’na marlena se adina Sukab e aeng se pon maelang pappathek.

***

Dhaun-dhaun gumegil egellu’ ebbun. Sampan-sampan ajajar ce’ rapina. Jumat se berkat: aeng asat. Marlena pon badha e paseser, ngantos Sukab e teppassa pajjar se sakejja’ aggi’ bakal lobar. Marlena toju’ e bato okoran satokka’, pas mandeng daddali-daddali se etangngale mang-ramang:daddali pote, maddu sabundel pasekkennagi pangara bula, bali’na dhadhar e ngalesserra angen, se ojan ta’ ojan, panas ta’ panas ngello’, tadha’ seyang tadha’ malem, ta’ amosem*. Sukab dhateng dhari li’-bali’na pajjar sambi malejjar kacebana Marlena.

“Sapora mon ngantos abit. Bula epakon emma’ ngone’ rambanan ka bandhungan se edina molae ba’ari’ amarga ta’ kellar ca’na.” Oca’na Sukab, kalaban sowara ga’-tapalga’. Kajana se buru etabang ajam pangorbi: epeccowa.

“Ta’ anape ten,” jawabba “Dika dhateng bai pon lebbi dhari cokop.”

“Emh. Engge nape maddha. Ca’na badha se ekacaca’a?”

“Ka’, saporana. Banni polana bula ajauwina’a dika, ban lakar ta’ apangara sama sakale.” Ngontabba okara dhari bibirra Marlena se sambi makalocor aeng socce dhari matana.

“Nape arte dhari oca’na dika? Bula ta’ ngarte.”

“Ebakto ban eare neko keya, bula bakal epamangkat mondhuk bi’ (o)reng towa, ka kennengngan se sanget jauna.”

Tadha’ oca’ se nyalto’ daddi okara. Dhari lesanna coma kembang se nyalone ban nyowep karangnga ate se bato**.

“Dika badha e dhinto ban bila ta’ atemo saare-dhuware, rengsana ate pon kajana bakal egiba mate. Nape pole sampe’ jau, bula bakal daddi jang-lajangan ta’ cokop sarat kaangguy ngabber lomok, mettek, nape pole sampe’ mejet***,” jawabba Sukab “ tape nyamana bagiyanna bula ban dika. Nonto kodu padha nareama.”

“Nape dika bakal esto adhante’ bula sampe’ totok se nyare elmo?”

“Salaggi’ lajar ta’ sowak, kamoddhi ta’ sempal. Insyaallah bula bakal esto adhante’ dika sampe’ bila’a bai baktona.”

Tanges sajan raja. Tembang maskumambang nembang ce’ derressa.

“Le’, bula badha se epenta’a ka dika.”

“Engge nape maddha?”

“Sabellunna dika mangkat mondhuk ka tempat se sanget jauna. Maddha bula berri’ settong tandha pangesto ka’angguy ngorange rassa kerromg bila bula abit ta’ atemmo dika.”

Marlena sessegunan_ga’-tapalga’, sambi moccal sello’ se alengker e garigi’na se angrajung dhuri. Epandeng pas ejuwagi ka Sukab.

“Ka’, sapora, bula ta’ andhi’ bakto bannya’. Bula mangkada. Senga’, ajaga mata, ajaga mate, ajaga taresnana bula se epatoro’ ka dika. Assalamualaikum…” Marlena atendhak kaangguy mole sambi ngosap aeng matana se molae gella, agaggaran, asabab esosol bibbi’na se molae gella’ ngantos e konco’na beddhi.

“Waalaikum salam…” jawabba Sukab saellana Marlena pon jau dhari seddhi’na. Sukab kajana ta’ andhi’ ora’ aguli, gun kellarra ngabas kerbayya kodhungnga Marlena se sajan etangngale samar. Saellana Marlena elang esergu’ dheppa, Sukab nemang ban ngabas sello’na se nar-binaran etompae sonarra are se buru ongga: Sello’ Asoca Mardha, se nandha’agi badha sajitho mardha dhalem dhadha.

 

Kombang-Gappora, Oktober 2020

 


Catheddan:

*metthek dhari buku Sagara Aeng Mata Ojan anggidanna Lukman Hakim AG.

**metthek dhari buku Sagara Aeng Mata Ojan anggidanna Lukman Hakim AG.

***metthek dhari buku Cengkal Burung anggidanna Lukman Hakim AG.

 

*Dimuat di Radar Madura,  Ahad 8 November 2020

*Khalilullah atau Khalil Satta Èlman,  lahir di Pulau Poterran, Sumenep, Madura, 7 Mei 2003. Menulis puisi dalam dwibahasa, Indonesia dan Madura sejak duduk di bangku Tsanawiyah. Puisi Bahasa Madura-nya sering dimuat di Radar Madura dan Majalah Jokotolè (Balai Bahasa Jawa Timur), sedangkan puisi Bahasa Indonesinya tersiar di surat kabar dan online, juga terangkum dalam antologi bersama a.l.; Jazirah; Jejak Hang Tuah dalam Puisi (2018), Jazirah 2; Segara Sakti Rantau Bertuah (2019), Perihal Matinya Si Pemuda (2019),Gus Punk; Puisi untuk Gus Dur (2018), Meminang Putri Dewa (2018), Mahligai Penyair Titi Payung;Mengenang Damiri Mahmud (2020), Pringsewu Kita (2020), Gambang Semarang (2020), dll. Saat ini masih nyantri di PP. Al-Ghufron (Battangan) dan masih tercatat sebagai siswa kelas XI prodi IPS/2 di MA Nasyatul Mutaallimin (1) Gapura Timur, Gapura, Sumenep, Madura. Aktif di Komunitas Asap dan Sanggar Biru Laut. Email: khalil.zafra@gmail.com. Facebook: Khalilullah/Khalil Satta Elman II. WA: 083135803486

 


Post a Comment

0 Comments