Le’ Raddin

APA ba’na gi’ enga’ kennengngan rowa, Le’ Raddin? Settong saba se etombuwi lalang e penggir congkop kene’ se atabing perreng, se apolas pote kapor, se ekalenglenge bungkana geddhang. Jau tor seppe akantha badha e tabu’na alas. Akantha settong kabadha’an, edhimma Bangsacara ecoco e dhalem alas tana Gili Mandhangen sareng serdhadhuna Rato Bidarba. Sengko’ ban ba’na nyambat kennengngan jareya Saba Bun Dhaja. Naleka teba are sorop, se sonarra alos ban anga’ akantha astana ebu, se nyongkobi saba jareya. Asela saellana nyosowe bume saareyan. Angen tase’ se cellep nyalessep nyosop ka dhalem tolang.

Un-dhaunan ban ba-rebba bacca eseram bennengnga ebbun se arendhu maanga’ bun-embunan. E tana rata saba jareya sengko’ ban ba’na seggut agaja’ ka’-berka’an, e antara but-ombut lalang. Kadhang aburu seset se ngabber rendha, se bangbangnga benneng aropa kaca. Jugan kadhang metthek kembang se amacem barna, terros eanyo’agi e li-gilina aeng se ajalan salanjangnga saba jareya. Ba’na laju atandang bunga noro’e gaggarra kembang e antarana bato se ajarjar e tengnga arossa aeng se benneng ngacerneng. Akantha bennengnga talaga e dhalem socana ba’na.

Ba’na enga’, Le’ Raddin? Prappa’na reng-oreng repot alako e saba, sengko’ ban ba’na ta’ akasa’ laonan maso’ ka dhalem congkop kene’, sambi addu pandeng aropa dhuwa’ oreng se atena acampo daddi settong, Akantha Adam ban Hawa se gi’ buru atemmo saellana saabidda atosan taon apesa.

Sengko’ agalunyo’ cellebba kabadha’an saba. Ngarep dhatengnga settong roba, saellana rassa kerrong agaraung adha’ nyambit. Ro’om badanna ba’na. Tape se etemmo gun coma bauna lomot ban tana se bacca. Arassa apa’. Akantha bauna batangnga kaju se abu se ekakan abidda jaman. Sengko’ ngalle entar ka dhalem dhapor, gun badha tomang se elang apoyya. Tombugan abu tomang kalarkaran. Akantha para’ daddiya bato. Sengko’ laju mokka’ labang budhi, ngampar salebarra saba etombuwi dhuri ban na’-ona’. Pekkeran akantha abali, ajellingagi lalang se atandang se eabber angen, sambi ngenga’e caretana ba’na, Le’ Raddin.

Ba’na acareta lanjang kabadha’an ebu ban ramana se noro’ molong jagung. Molong abareng reng-oreng se ngarep tabu’na kennyang maskeya samenggu abidda. E dhalemma alas. Kajuwan abu se nyempen manessa mosem nambara’. Akantha manessa la-kellana jagung ngodha, sabellun epakerreng panassa are. Sengko’ ban ba’na kadhang metthek settong dhuwa’ jagung gunna etono e penggir dhaja congkop kene’ laju ekakan sambi sem-mesem kadhuwa’an, jareya menangka settong kabunga’an e tengnga mosem se manes.

”Dhaggu’ sengko’ ban ba’na bakal arabat saba reya gunna etamenne jagung, kaangguy sapasang manossa se odhi’ atane?” ca’na ba’na e settong bakto.

Romana ba’na jau e penggir sereng. Ta’ atembo’ ban ta’ agenteng akantha romana reng-oreng kottha. Genteng romana ba’na gun naongnga kajuwan. Se pangpangnga dhari kaju kona. Atembo’ alas apondasi saba. Se tanana etombuwi obi, yur-sayuran, jagung, bito’, ban pan-barampan palappa.

”Sakabbinna se tombu e saba jareya ro’om, ta’ sakadar ro’-omma mennya’ kastore,” ca’na ba’na pole, prappa’na sengko’ ban ba’na ju’-toju’ asela e dhapor congkop kene’ jareya, e antarana tombugan kaju tomang.

Ba’na acareta, sabban are sorop toron ka salebarra saba, co’-konco’na kajuwan akantha nyonar abareng sonarra sorop are. Akantha jamang se eangguy e attassa cethagga mano’ dhara. Ro’om malathe se nyembur ka sakabbinna ara. Nyebbaragi ro’om kastore. Akantha seher se ekerem lebat angen. Nyessep ka dhalem anga’na dhara. Matennang gulina ora’ bun-embunan se lesso acarok kalaban napso salanjangnga are. Ca’na ba’na, jareya bakto e dhimma labang antara dhuwa’ dunnya saleng agimpo’. Labang se loros kalaban nagara makhlok alos ta’ ekatela’. Se ajaga alas raja.

”Mong ba’na nemmo settong kennengngan se seggut ekatela’ berse, tadha’ un-dhaunan se gaggar kalarkaran e attassa tana, jugan ngatela’ kembang amacem barna se tombu mekkar se ta’ perna ba’na ngatela’ sabellunna, maka ajja’ sampe’ ba’na metthek. Bisa daddi jareya kembangnga pandhudhu’ makhlok alos jareya. Ba’na ta’ olle metthek, otaba ba’na dhaggi’ ekeba ka kampongnga se jau, pas ba’na elang ta’ kera abali pole!” Ba’na maenga’ sengko’.

Sengko’ nenggalagi congkop kene’ jareya, pas laju ajalan ka salebarra tana se penggir kanan-kacerra etombuwi but-ombut. Para’ notobin jalan reya. Akantha neggessagi, jalor jareya abit ta’ etedda’, ta’ elebadi. Sengko’ ajalan kalaban laon, sambi arabat dhuri se tombu e jadhiya kalaban te-ngate.

Sengko’ nyosore satapa’ jalan molae nae’. E cek-koncegga tana tenggi, camara aguli eabber angen lok-ologan. Akantha ngolok aba’. Bunga mandhi angen. Pamandhangan se na’jubbagi e tang adha’ nampa’ akantha gambaran sowarga. Un-dhaunan atandang e konco’na ranca’ jareya menangka lembaran lanta’ emmas se nyonar. Langnge’ se ejungjung e attassa cethak ajamang barna. Laonan, sonar terros maelang ka garis dhapa’na langnge’.

Sakejja’, samacem barna jareya bakal podhar ekakan pettengnga malem. Sengko’ ta’ parduli bakal sapettengnga apa barnana malem e tengnga alas bakto jareya. Careta-careta ba’na terros nyonar e dhalem pekker, daddi sonar se terros nonton lalampan. Sengko’ terros ajalan. Ngarep bakal nemmone karena lampetta bakto lamba’ abareng ba’na. Sabellun sakobengnga bakto ngolet paksa pekkeran jareya dhari cethak.

Angen tase’ se lembu’ alebat. Ngeba ro’omma kembang, tao dhari dhimma. Sengko’ nyessep lem-dhalem. Agili dhalem ora’. Neng-enneng saabidda dhalem pekker. Matennang ate tor pekker. Saengga tang tata arassa tamba dhammang. Maske jalan reya tamba jau tamba nae’. Laju, teba e settong kennengngan lemba. Nandha’agi aba’ bakal dhapa’ ka alas raja. Tana se etombuwi kajuwan-kajuwan kona se aomor atosan taon se ajarjar koko. Akantha barisan sardhadhu makhlok alos ajarjar ajaga alas.

Tombuwan dhuri abuwa kembang amacem barna. Tombu sampe’ e man-kamman. Saengga dhapa’ nombuwi kajuwan kona. Jareya samastena se sengko’ etemmone. Tape nyatana, se etemmowe gun coma gundhugan-gundhugan kaju saella mare epoger. Lalang tombu e man-kamman abareng dhuri, ban monyena ranca’ kerreng se gaggar ka dhadhana bume. Alas se ta’ ekakennal, maske etemmone pan-barampan dhaunna jagung kalaban buwana se baceng. Tong-settong bigina jagung se gaggar ronto kalarkaran nemmone takdirra se seppe.

***

Le’ Raddin, sengko’ emot ba’na aropa babine’ se raddin manes kalaban mandeng sakabbinna kabadha’an kalaban bunga. Pamesemma se nyebbar bauna kastore, ro’om malathe. Se obu’na akantha lalang atandang bila eteyop angen tase’. Se socana sapasang sonarra nang-konang. Nyembur kaanga’an ta’ osa rabagga apoy. Sonar pettengnga malem maanga’ cellebba badan se gumigil. Emot careta se perna ba’na kacaca, tang cethak akantha nemmone labang kaangguy aburu e salebarra saba. Kennengngan se bisa adaddiyagi aba’ bebas mardika daddi dhaunna lalang se eobengnge sonarra nang-konang. Bunga atandang eteyop angen tase’. Se ngoto’e akantha koto’na ba’na. Se napassa jak-onjagan e dhalem kopeng.

Arapa aba’ ma’ gi’ buru sadar, ja’ aba’ sanget tresna ka saba reya? Ja’ aba’ onggu-onggu tresna ka ba’na? Tang dhadha arassa berra’ nanggung sakabbinna reya, arapa aba’ lamba’ ma’ ma elang, majau, buru dhari reya?

Adhu, palangnga aba’. Abali ka kennengngan reya gun coma ngoca’agi salam pesa. Namong, saellana dhapa’ ka kennengngan reya, rassana sengko’ ta’ endha’ abali ka kottha pole. Aba’ akantha ajalan ka bakto lamba’. Apa gi’ badha bakto gunna mabecce’ pole? Hah!

***

E tengnga malem, sengko’ ajalan e antarana jang-bajangnga ranca’ se atandang e tana saba, akantha eteppa’e sonar tera’ paddhangnga pornama. Bintang morteka agilap e attassa cethak, aropa salendhang sottra se etretesse enten. Agilap damar kottha e baba jadhiya, neba’agi kaseppeyan.

Ta’ abit pole, e tang adha’ ngabber ebuwan nang-konang se nera’e kaseppeyan. Aganteyan ngadhebbi ca’-ranca’na badan. Laju ngabber ngadhebbi kaelangan. Kajaba sapasang nang-konang se terros ngabber ngobengnge saba.

E antarana pettengnga malem, akantha aba’ nyakseyagi gulabba ba’na, Le’ Raddin. Ca’-ranca’ rebba se atandang ekenneng teyop angen, nyosop aropa lembaran obu’na ba’na. Se ber-abberran notobi robana ba’na bila prappa’na nondhu’. Le’ Raddin, apa ba’na onggu jareya? Laonan, ba’na adhanga. Sapasang nang-konang se nengga’ ka badanna lalang aburu maso’ ka rowang socana ba’na. Saengga binar, nyonar solap sonarra se naonge se nera’e lan-jalan se petteng.

Akantha ceppetta gulabba kelap, sengko’ ajellingagi labang saketheng settong kraton se abukka’ anganga. Ebuwan nang-konang tera’ ngadhirap e pangpangnga kraton. Lap-gilaban akantha sonarra damar. Se nerrange jalan loros ka labang kraton. Ba’na toju’ kadibi’ ngamedi kabadha’an e jadhiya. E penggirra ba’na, badha settong kowadhi kosong seppe ta’ ekennengnge. Apa bendher ba’na jareya neng-enneng kadibi’ adhante’ sengko’ dhateng nyabis ka pangkowanna ba’na?

Kalaban sakowadda ora’ sengko’ alomampa sopaja duli dhapa’. Tang badan ella elang eabber angen panas mosem nemor. Sengko’ nonju’ ka settong kennengngan se bannya’ lalangnga, maksod ate nojjuwagi ka ba’na. Ba’na tettep dhiem neng-enneng ta’ aguli e jadhiya. Sengko’ ngedhing garudhuk tao dhari dhimma dhatengnga. Binar e socana ba’na, nyonar sapasang nang-konang, aoba daddi apoy rabak. Sengko’ nyakse’e sapasang nang-konang se bangbangnga katonon. Tang napas aburu. Ngedhing sakopengan akantha sowarana ranca’ sempal se katonon.

Sengko’, ebuwan sonarra nang-konang aroba daddi kembang apoy se ataburan e tengnga saba. Ronto, gaggar ka sakabbinna kajuwan kene’ otaba raja. Mapotthon sakabbinna essena saba, bali’ sampe’ ka alas raja. Bisa maoba kajuwan daddi cellengnga areng. Juga magemmet ragana ba’na. Sengko’ athowat nengale ba’na gemmet kare abu.

Sakeng bisa sengko’ maojan aeng mata, sengko’ bakal nanges saengga bisa maambu panassa apoy se mapotthon ragana ba’na. Sakeng sengko’ bisa duli dhapa’ ka labangnga kraton jareya, sakeng sengko’ bisa wa’-dhuwa’an abareng ba’na e kennengngan jareya. Tanto, sengko’ ta’ kera kolowar pole nyengga dhari kennengngan jareya. Sengko’ ta’ kera tega maelang ba’na. Saabidda mosem, nemor otaba nambara’.

***

Sateya, pekkeran arassa ta’ aguna pole maddhai sakabbinna caretana ba’na bakto bilan rowa, Le’ Raddin! Tang cethak arassa sella’, akantha leddhu’a. Sowara messen ban dar-der-dor monyena sound agaraung e tana reya se bilan saba se ngampar bigina jagung ban pan-barampan buwa. Ban, aba’ arassa epekot dhalem settong rowang, repot ngorose kertas-kertas sertifikat ban dalubang se eanggep arga.

Tana se bakto lamba’ ebarisi ban se ejaga sampe’ toron-binoron, sateya ella aoba roba e tamenne bengko ban dhung-geddhung se patang pacettar nyettel lagu se ta’ ekangarte maksod tor tojjuwanna. Lan-jalan e saba se loros ka alas raja, saba se nyempen careta-careta sengko’ ban ba’na se ta’ perna dhapa’. Lakar ella pastena aba’ se terros athowat e seddi’na ragana ba’na se ella daddi abu tomang.

Apa ba’na gi’ enga’ ban terro abaliya pole, Le’ Raddin? Apa ba’na loppa bakto nono jagung e penggirra congkop kene’ rowa? Hah!

 

 

*Holikin Aropa’agi guru SD, pemerte basa ban sastra Madura. Carpan ganeka kaangguy maemot elangnga pangoreban tane masyarakat Polo Mandhangen.

 *Carpan paneka terbit e Radar Madura, 05-04-2020.