Karaton Songennep Ngalleya ka Saronggi


SALBUT ecapo’ korona,” lalake’ ngangguy bathek soklat e adhaanna bula asowara samarena asela sambi nyolet roko pas eceppot, rassana kose ce’ nyamanna.

Bula gun mesem sambi nalektegi salerana lalake’ se buru ekennal ganeko. Gi’ buru sambi asalaman mator akadi se pon kennal tape abit ta’ apanggi.

Ba’en loppa la ka sengko’?” lalake’ ganeko terros mandeng ka bula. Kadiya se ampon polowan taon bir-maebir rassa kerrong.

Mon ka salerana sengko’ enga’. Tape nyamana loppae,” bula ajawab samettona, ja’ toro’en posang keya sambi mokka’ ngen-angen pola me’ bendher taselpet rassa estona akanca polowan taon se tapongkor.

Tape ba’en salerana aoba ta’ padha so lamba’, akaton tamba koros,” lalake’ ganeko adhabu pole.

Iya paleng polana atamba towa, sengko’ kan la saeket lebbi,” sambi nyolet roko’ keya bula ajawab sambi terros posang.

Badha ra-kera sapolo mennitan padha saleng mokka’ paemotan jaman tapongkor dhupoloan taon. Dhi-budhina lalake’ se ngangguy bathek soklat ganeko adhabu akaton satengnga todhus, ”Enggi ropana sampeyan banne kancana kaula se dhimen.

Ma’ pas aoba abasa, enja’ dina la ayu’ papaggun enja’ iya ma’le akrap,” sambi asella mesem bula nyaot pas aleppet sajada musolla e budhinah barung nase’ tempadda lalake’ ganeko alako.

Gella’ bula pajet ngampong asambajang ashar polana badha tugas e semma’en barung nase’ ganeko. Tugas se kasambung polana panyake’ korona pon maso ka Madura. Lakar pendhet ra-kera ennem ejjam tor-ngator panompang motor ban sapedha motor se maso’a ka Kabupaten Songennep. Napepole pas badha bis se lebada, adhu, empon rassana tamba bindheng ngabasagi.

Tong-settong panompangnga esoro abacco paberse. Mare ganeko epamaso’ ka kennengngan semprotan antibiotik se abentu’ masagi lanjang, pas eterrosagi epareksa so patugas kasehatan, edata asmana, alamadda, omor sanape, dhari gu’emma, mare ganeko ongga pole ka motorra.

Ta’ tao ra-kera gan bila panyake’ korona reya se tadhaa,” sowarana lalake’ e adha’enna bula maambu pekkeran se ngalamon asella lesso.

Ta’ jareyana sengko’ ta’ tao keya. Tape mayu’ padha anyo’on ka Se Kobasa, mandara panyake’ korona reya ceppet mole pole ka Cena.

Iya amin,” lalake’ abathek soklat se ngoca’ amin kose abak lanjang, agandhu’ pangarep takabbul sareng Se Mahakobasa, pas mandeng ka kebbun geddhang mongging temor, acora’ onggu-onggu meker.

Mon dhari settong ketap kona se ekataowe sengko’ e Talango, badha kasebbut ja’ e settong bakto bakal badha’a panyake’ se lowar biyasa e katako’e moso reng Madura. Tape ca’en Songennep reya ta ecapo’, gun ka bara’ dhari bates Songennep,” lalake’ ganeko materros dhabuna.

Abak ta’jub gu’-onggu’an bula makerso’ ales sambi apangarep mander ongguwana ramalan ketap ganeko. Polana bula rassana ta’ bisa mokka’ ngen-angen maloggang ate mon pas Songennep ecapo’ korona padhana sabagiyan kabupaten laen.

Gi’ paggun ta’ elang se tababeggen lalake’ ganeko mator pole, ”Rowa’ pole e dhalem ketap jareya, Asta Tenggi mon eabas dhari attas, badha sosonan asta-astana abentu’ lafad Allah.

Abba, iya apa?” satengnga ta’ parcaja bula sambi mekker kanyata’enna, amarga bula gi’ ta’ tao nompa’ kapal ngabber lebat attassa Asta Tenggi.

Ya’ pole se kodu edhante’ buktena.

Apa jareya?” bula ceppet atanya.

Menorot ketap jareya, Karaton Songennep badhi ngalleya ka Kacamatan Saronggi.

Mon okara se neko bula rang-terrangan ta parcaja sakale. Ja’reng se maso’ ka riwayat ca’en bangaseppo Karaton Songennep lamba’ badha e Kacamatan Topote pas dhi-budhina ealle ka Kottha.

Tantona areya badha takae’en so ramalan laenna. Ja’ ca’en Kacamatan Kaleanget bakal asambung ka Saronggi ta’ usa galadhak, pas terros nyeppot roko’ pole lalake’ ganeko.

Addo, reya’ pole. Ma’ katonna pas malappae mano’ ngabang. Apa tase’en bakal etembuk? Ngabi’a barampa ettrek, pessena sapa se eangguya. Petanya gi’ buru salbut e pekkeran.

”Apa polana tradisi se gi’ cekka’ epeyara enga’ nyadar rowa badha e Saronggi?” sambung bula.

”Apa polana e Saronggi badha usaha minnya’ se raja?” bula nerrossagi petanya.

”Enja’, coba’ talektegi sambungan kennengngan nyadar mongging dhaja se nyambung ban Kacamatan Kaleanget, rowa bila nemor tana se badha aengnga para’ etangale’enna, ya paleng dhalemma gun saokoran lanjangan roko’ salencer,”  sambi noduwagi roko’ se eteggu’ ce’ yakinna.

Bula tagiba rassa se aoleng ta’ dhapa’ ka tojjuwan se jellas. Amarga bisa iya bisa enja’. Kabadha’an dunnya, tana, aeng, tor bu-tombuwan se ampo ta’ karabat bisa apanggibat e lowar ra-kerana manossa.

”Kan se kabukte la dhuwa’an. Asta Tenggi ban panyake’ korona reya. Sampe’ sateya Songennep gi’ ta’ epaso’e virus jareya,” ce’ yakinna lalake’ abatek soklat sambi mowang buceng dhari garigi’en.

”Lu’-ellun, apa ta’ tabaligga Karaton Songennep epaddegga rajja pole e Topote? Polana e daerah dhaja kan la eberri’i jalan lebar tor bagus, ca’en na’-kana’ sateya’an kasebbut jalan lingkar dhaja,” bula nyoba’ agaja’a.

”Enja’ ta’ kera,” sowarana lalake’ ganeko ce’ ceppetta. ”Ramalan Kottha Songennep reya badhi epalebar ka lao’. Labang sakethengnga badha e Saronggi, maso’ ka dhaja otaba ka bara’ pas aleyer ka temor lebat Kaleanget, mo’dul ka Saronggi pole. Ya areya gun menorot ketap se ekataowe sengko’ se teggu’ oreng Talango.”

Gruksak. E lorong raja e adha’en badha tabra’an. Massena sapedha motor ban ekkol pikep mowa’ sape se abiluk ka dhaja. Polisi, tentara, tor oreng-oreng se badha e panjaga’an check point  panyake’ korona padha berka’ nolong, tamaso’ bula ban lalake’ se abathek soklat.

Margasare Disa Batowan, Kacamadan Batowan, Songennep.

*Carpan Sufriadi menangka carpan se terbi’ e Radar Madura, 03 Mei 2020.

Post a comment

0 Comments