Kompolan Burdah

KOMPOLAN burdah se dhaggi’ malem etangga’ Mas’odi. Bengkona ta’ jau dhari bengkona sengko’. Gun aella’ teggalla Ke Rupa’. Teggal se ta’ pate lebar, mon ta’ kalero gun tello laggu. E paleng penggirra teggal e bagiyan temor badha bengko dhadhuwa’ sataneyan lanjang. Bengko se paleng temor jareya andhi’na Mas’odi.

Abareng bala tangga se semma’, sengko’ akompol ka bengkona Mas’odi kaangguy long-nolonge. Pajat biyasa e kampongnga sengko’—Kampong Laok Saba, Disa Nyabakan Temor—bila badha se andhi’ parlo padhana kabinan, molang are, peret kandhung, otaba kompolan enga’ sateya maste tatangga ban la-bala se semma’ dhateng kaangguy long-nolonge. Kapolana mon kompolan burdah ta’ pate bannya’ se eparanta.

Towan ruma gun aberri’ saihlassa ka anggotana kompolan. Kadiya kobi malolo ella cokop. Tape biyasana ka’-angka’na reya kobi ban ring-guring. Daddi, towan ruma ta’ wajib makane anggotana kompolan, maskeyana kadhang badha settong dhuwa’ oreng se nangga’ kompolan jugan makane kalaban alasan asadaka’a.

Are nyonar e ponca bara’. Sonarra kalowar tek-ngetek e bang-lobangnga dhaunna accem se sella’. Dunnya ne’-sakone’ atamba petteng. Satengnga ejjam aggi’ adan maghrib bakal amonye. Kompolan burdah biyasana emolae marena abajang magrib ajama’ah. Marena ngangko’ lencak ka taneyan, sengko’, Pebri, Wawan, ban Azam toju’ e korse se badha e penggirra taneyan sambi ko’-roko’an. Dhari temor Mas’odi temmo dhateng nongtong hambal.

”Cong, e amper jareya mare esapowe? Mon la mare, lama’na reya ampar laju, ya!” oca’na Mas’odi ka sengko’ pas terros nyaba’ hambal ka amper.

”Aba gallu’, Pebri reya pelka’ ca’na, Di. E dhapor pola kobina la ranta mayu’ gallu pakalowar,” Azam nyalko’ sambi agella’.

”Iya onggu. Poko’ badha cen-lecenna gerrungan mon gun masala lama’ paggun ranta. Badha Wawan se ngampara,” ca’na Pebri keya sambi akeddhes ka Wawan.

”Patennang, Cong. Marena paggun kalowar. Enja’ ta’ kera apowasa. Haha,” jawabba Mas’odi terros mangkat ka dhapor. Neng-enneng sakejja’ Mas’odi kalowar nyambi termos ban cangker.

Mare ngenom kobi sacangker, sengko’ ban Pebri laju jaga kaangguy ngampar lama’ hambal e amper. E teppa’na ngampar lama’, Pebri acareta ka sengko’ ja’ badha oreng se ta’ pate senneng ka kompolan burdah. Ca’na, kompolan burdah gun daddi kompolanna oreng rak-orakan. Qasidah burdah ebaca ta’ kalaban hoso’. Kabannya’an ekagabay ja’-gaja’an. Baramma bisa ekatarema mon enga’ jareya carana maca. Banne syafa’atta nabi se ekaolle. Mon tapalang olle bala’na salawat burdah polana gun ekagabay en-maenan bi’ se maca. Ebaca jang ceppettan, jang ranyengan, jang rammeyan. Se ekarassa ban ekaedhing bi’ reng-oreng banne kacelleppanna salawat. Mala’an nambai peggella ate polana gun anger-enger.

”Sapa se ngoca’ cara jareya, Peb?” sengko’ atanya ka Pebri. Pebri onga’, roko’na esergu’ pole. Mare jareya buru ajawab petanyana sengko’.

”Arowa, Di, e teppa’na kompolan e bengkona Alpa. E bara’na kan badha bengko kadibi’, bengkona Ke Jumahna. E dhissa’ badha oreng sake’ ca’na. Laju agir-gigir ka na’-kana’ polana ranyeng gallu’.”

”Iye sengko’ ta’ tao onggu. Teppa’na rowa sengko’ ta’ hadir. Entar kaonjangan ka Banuwaju. Terros baramma laju?”

”Akherra, baca’anna burdah-na epalere’e. Aganggu oreng sake’ kan ta’ ole keya tekka’a la asalawat.”

”Iya iya teppa’, Peb.”

Adhan e masjid pas amonye. Lama’na la mare eampar kabbi. Sengko’, Pebri, Wawan, ban Azam pas amet ka Mas’odi kaangguy ata-ranta.

***

Maula ya shalli wasallim da’iman abadan

Ala habibika khairil khalqi kulli himi

Amin tadzakkuri jiranim bidzi salami

Mazajta dam’an jara mim muqlatin bidami

Rampa ban ranyeng reng-oreng maca salawat burdah e bengkona Mas’odi. Sengko’ pas mangkat kalaban badan ro’om, kalambi pote, sarong biru thak-kothak. Bila dhapa’ ka penggirra taneyanna se paleng bara’, langnge’ se petteng rowa pas tera’ akadiya are se terbi’. Sonarra se abarna pote gaggar ka bengkona Mas’odi se enger kalaban salawat burdah. Ebuwan malaekat toron dhari attas langnge’ padhana nyarowan ngarobut amperra Mas’odi.

Bengkona Mas’odi tera’ possa’ kalaban malaekat. Badha se toju’, badha se ajalan e taneyan, badha se ngabber enga’ kakapper sambi nabur barang leca’ padhana aeng barna koneng emmas, akadiya  embu’ e teppa’na nabur jagung e saba. Reng-oreng tadha’ se nengale. Kabbi toju’ meddek hoso’ maca burdah. Coma sengko’ se ce’ paddhangnga ka kadaddiyan gaib reya.

Marena jareya, dhuwa’ malaekat ajalan ka bara’ nongtong barang enga’ butol pote. Nojju langgar tabing, kennengnganna Nye Mulyati se para’ sataon sake’, ta’ bisa ajalan. Malaekat se settong temmo nyander ka oreng se sake’, se molae gella’ ngedhingagi salawat burdah kalaban hoso’. Marena, butol se pote rowa etere’agi ka mowana Nye Mulyati. Malaekat settonganna neggu’ soko dhuwa’na. Tape Nye Mulyati ta’ arassa pa-apa, ta’ nengale pa-apa. Coma sengko’ se nengale kadaddiyan kabbi reya.

Mare jareya badanna sengko’ temmo badha se agunjek. Bauna sengko’ eteggu’ sambi egeppa’.

”Cong, jaga, Cong. Ba’na duli se mangkata ka kompolan burdah-na. Gella’ la emolae. Marena abajang maghrib gella’ ba’na tedhung. Mara jaga! Duli kat-mangkat kassa’.”

Sengko’ mella’ takerjat pas jaga kaangguy ngala’ wudhu ka jeddhing. E bengkona Mas’odi la enger kalaban salawat burdah.

Maa samanid dahru daiman wastajartu bihi

Illa waniltu jiwaran minhu lam yudhami

Walal tamastu ghinad daraini min yadihi

Ilas talam-tun nada min-khairi mustalimi

Annuqayah, 04 Februari 2020 M.

*Ahmad Nyabeer Merupakan pena Ahmad Fawa’id. Mahasiswa Instika. Anggota Komonitas Penyisir Sastra Iksabad (Persi). Bilik Hijau C 11 PP Annuqayah Lubangsa.

*Careta Pandha' kasebbut emuat e Radar Madura, Tanggal 23 Februari 2020