PARSASAT olle emmas satompo’an, Ka’ Fauzi atandang sambi mandhi’i mobil anyarra.
Mobil re-karena Ajji Mustar, jaragan bako se ekennal lamba’, ekaolle kalaban
arga modha. Pottra sareyangnga se buru omor sapolo taon, Faisal, noro’ atandang
sambi amaen aeng ban kapo’na sabun. Mitsubishi L-300 ka’dhinto mobil anyarra.
Barna soklat, kalowaran taon 98. Plat nomerra tamaso’ gaga’, M 474 R.
”Artena mobil
ganeka banne ollena ngeco’, tape ollena majar. Hahaha...”
Katembang
alako nyupir mobilla oreng, caepon Ka’ Fauzi arassa ta’ mardika odhi’. Sabab
ebang-tabang settoran. Melana, saellana lolos monduk ban akalowarga, Ka’ Fauzi
onggu moji sokkor ban senneng ampon ngagunge mobil dibi’. Rassa sokkorra
ebukteyagi kalaban salamettan e bari’ malemma ban ngonjang oreng kampong.
Monggu Ka’
Fauzi, sanajjan tang-taotang kaangguy kowat ngobange mobil, tatape ka’dhinto
daddi parmola’an odhi’ se saongguna. Ta’ agantong dha’ oreng laen kaangguy
mangokos dhaporra binena. Aba’na bisa asaren tor nyare panompang bila’a bisaos.
Ojan ban panas, seyang ban malem ta’ daddi parkara.
”Ka’, mobil
ganeka gita’ etemmo ora’na bila gita’ ejajal alan-jalanan jau,” kaula agudha
Ka’ Fauzi se kaojangan. Pellona ngalocor derres mara aeng Somber Bering.
Sambi
ngodhi’i messin, Ka’ Fauzi abales, ”Bo-abbo, koca’na na’-kana’ santre, la
syakka, sobung kamangmangan. Pola ejajala?”
Messin se
aderreng laonan laju ngacoweng saellana eggassa etedda’. Knalpotta ngokos mara
bubunganna dhapor. Kaula nyengnger ngabas pagulina Ka’ Fauzi. Dineng
Faisal akopa’ sambi atowat, ”Terros, Pa’, terros!”
”Mon polana
ganeka banne karopo’ se nyareng munyena tatape ceppet ayem. Coma manabi gita’
ejajal, pasera se onenga ora’na? Ngereng, ngalencer dha’ Songennep!”
”Sepakat,
Le’. Ngalencer dha’ Songennep!”
Ka’ Fauzi
pas asalaman, maca’ oreng atokara.
***
Sennen
pajjar are, aba’ bula, Ka’ Fauzi, ban Faisal areng-sareng mangkat ngalencer
dha’ Songennep. Yu Hotima, rajina Ka’ Fauzi, ta’ kasokan ngereng, margana tako’
rakana lap-balapan, ponapa pole sobung se ajaga compo’na. Estona, salaen ajajal
ora’na L-300, neyat laenna enggi paneka nyalase dha’ Buju’ Asta Tenggi, terros
nyabis dha’ salerana Keyae Faizi e Pondhuk Lu’-Gulu’.
Mon
panyupirra Ka’ Fauzi lakar ta’ parlo ekamangmang. La syakka caepon. Ka’
Fauzi toman arassae nyupir trek tongkang dhutaon. Ponapapole coma nyupir montor
kene’ amacem L-300, ebakta yol-seyolan. Jugan lastare nyepcep rassana jalan
Sorbaja, Malang, Blitar, Situbondo, ban salaenna.
Ponapapole
coma jurusan Madura, ebadhi taneyan. Pantes bila Keyae Mamad, bangatowa kampong
ban se ngastane langgar, kapencot sampe’ ngangka’ Ka’ Fauzi daddi supirra dalem
kantos mangken. Monggu Ka’ Fauzi dibi’, ngabdi dha’ oreng alem ka’dhinto
menangka daddi jalanna baroka. Melana Ka’ Fauzi lamsum nyanggubi.
Parjalanan
dha’ Songennep sobung alangan pa-ponapa. Sampe’ lastare nyalase e Asta Tenggi,
mobil paggun gaga’. Nandha’agi ora’na kowat ban pantes ebakta jalanan jau.
Akare neyat pamongkas samangken; nyabis dha’ salerana Keyae Faizi.
E tengnga
jalan loros se nojju dha’ Parenduan, Faisal akeccap sambi nonju’ mobil
Mitsubishi T-120 se nyalep ta’ akalakson, ”Addha, esalep mobil kona. Kala, kala
onggu samangken.”
Kaula
ngelkel sadaddina ngabas tengka polana Faisal se neppo’ sera. Dineng Ka’ Fauzi
nyengnger. Tape mon pangabassa akadi se ngalkal atena eco-koco sareyangnga. Ka’
Fauzi lamsum matoron porsneleng, pas nedda’ gas sampe’ pol. Mobil lamsum nanca’
nabang T-120. ”Sampe’ ekenneng!” Dhabuna.
Mobil
tandhes ta’ etemmo kareppa. Kaula ta’ ambu se nyebbut istighfar margana Ka’
Fauzi panyupirra acora’ ekekke’ baong. Laen pole Faisal se sajan kaleburan
arassa’agi paburuna mobil, mara amaen bang-tabangan sakanca’an. Seddheng T-120
la para ejapo’a, laju badha mobil laen se lang-ngalange dhari adha’. Gas
epatoron sakone’, saellanna badha kasempatan nyalep, gas lamsum etanca’agi. Ka’
Fauzi hoso’ panyupirra, apangaterro onggu se nyalepa.
”Tabang,
Pa’, tabang! Salep...”
Parcoma,
L-300-sah Ka’ Fauzi ta’ kobasa nyalep. Sebab supirra T-120 akantha ta’ parjuga
mobilla esalep. Sambi makalowar klakson se amonye telolet, T-120 acora’
co-ngocowa L-300. Peggel atena, Ka’ Fauzi terros amaen gas. Sampe’ aherra,
T-120 ekenneng salep sabellunna maso’ partellon se nojju dha’ Lu’-Gulu’.
”Ekenneng,
Cong!”
”Ngastete,
Taretan!” Amonyeyan sowara atowat dhari spiker toa se cekka’ e T-120.
”Gu, ma’
abakta spiker sabarang badha T-120 ganeka. Hahaha...” Kaula ban Faisal ta’
bu-ambu se
agella’. Ngelkel sampe’ ta’ ngenneng anyaba. Galiya’ rassana
bila enga’ dha’ klakson telolet ban spikerra T-120. Dhu ma’ badha.
Ka’ Fauzi
nyengnger arassa mennang, ”Kadi ponapa, T-120 gi’ nabang enggi, Le’?”
”Aman.”
Caepon kaula saellana mare masteyagi ja’ sobung T-120 e budhi.
***
Nyabis dha’
salerana Keyae Faizi aropa’agi pangaterrona kaula. Salaen nyoppre baroka olle
alonggu asareng oreng molja, aba’ terro onggu aguru nyerrat, parbasan, ban
sanja’. Alhamdulilla, Keyae senneng apanggi kana’ ngodha se senneng nyerrat
sanja’.
Semmo abit
se bis-cabisan, acator sanja’, ban kaodhi’an sambi pi-kopiyan, pas badha
monyena telolet maso’ dha’ taneyan dalem. Keyae Faizi mesem ngabas mobilla se
ebakta taretanna ampon dhateng. Dineng kaula ban Ka’ Fauzi takerjat ban saleng
lerek saellana oneng ja’ mobil se dhateng ka’dhinto T-120.
”Palang,”
dhabuna Ka’ Fauzi asa’-kasa’.
Kaula serep
ta’ oneng se acaca’a. Dineng Ka’ Fauzi baringsang. Posang e leggana. Rassa
todhus sampe’ dha’ bun-embunna.
”Saporana,
Keyae, saporana. Ta’ langkong bila kaula cangkolang. Saporana...” Ngetter
sowarana Ka’ Fauzi, mera raraena ban kasta onggu pakedhingnga.
”Anapa,
Le’?” dhabuna Keyae Faizi, ”Badha ponapa?”
”Ta’
langkong kaula cangkolang, Keyae. Abdina korang oneng ja’ T-120 kaagunganna
ajunan. Kaula cangkolang nyalep mobilla,” Ka’ Fauzi nondhu’ katodhusan.
”Pera’
nyalep mobil ganeka, Le’, mara ngeco’ obangnga bula. Hahaha...” Dhabuna Keyae
maencer kabadha’an.
Ka’ Fauzi
paggun ta’ kobasa ngangka’ serana. Arassa berra’ se onga’a margana ekattenge
rassa todhus. Aba’ ro’-noro’ nondhu’, todhus sabuluna kole’. (*)
Sidogiri 03 J.
Ulaa 1438 H
*BIN otaba N Shalihin Damiri aropa'agi Santre Sidogiri
asal Camplong, Sampang. Ngabdi e Majelis Sastra Kun. Bin Paneka babbar e sampang. ampon makaloar buku Satengkes careta pandha' "Lanceng Talpos (2020).
*Carpan Paneka emuat e Radar Madura tor jugan Serrat Pote
Post a comment
Post a comment