HUMAIDI toju’ cengngeng e padduna kamarra. Sokona epelko’ acampo moso pokangnga. To’odda etonggul. Pangabasanna ta’ tanto ara. Pekkeranna car-kalacer ka man-dhimman. Sabatara kancana ajar sepae seddi’na. Ta’ apangrasa ja’ badha se laen dhari Humaidi e malem jareya. Kancana maca ketab se bel-tebbel alid-jilid kalaban hoso’, tape ta’ bisa maca kabadha’anna Humaidi se cengngeng.

Kabilang, kabadha’an macem jareya la ta’ tanto are se barampa kalena. Cethagga Humaidi terros epossa’e kalaban pekkeran-pekkeran se marodhek. Dhengdheng ta’ re-mare. Masala settong atompo’ ban masala se settongnga. Ta’ mare lakka’ dhateng masala se laen. Masalana ta’ coma urusan aba’na dibi’, namong jugan tamaso’ masala e pondhugga se ta’ kala marodhek ka pekkeranna.

Lakar kappra e kalangan santre, daddi pangurus e pondhuk reya banne parkara se gampang. Apana pole pangurus kaamanan. Kabadha’anna se sabban are ta’ tobang rus-urusan moso na’-kana’ alanggar, ta’ parlo ekagettone mon kaodhi’anna mala bannya’an mosona katembang kancana.

Daddi pangurus e pondhuk pajat kodu agandhu’ sagudhang ate sabbar ban pekkeran juntrong. Ngadhebbi pottrana oreng sanya’-banya’na ta’ cokop gun coma sakadar bur-leburan ban en-maenan. Sakeng mon ta’ polana epakon keyae, engko’ ta’ kera endha’ daddi pangurus,” e settong kasempadan Humaidi ango’ngo’ dha’ santrena se cengkal alaban pangurus.

Sajan se daddi pekkeran ka Humaidi ban sakancaan pangurussa e pondhuk iya areya mon se alanggar aropaagi kancana dibi’, la-bala, otaba na’-kana’ se pajat epasraagi ka aba’na. Baramma se ngurusa ban baramma se ngokoma. Sengka ban ta’ nyaman padha badha. Tong-settongnga jalan ta’ laen iya areya alasan tanggung jawab kaangguy ngabdi ka pondhuk, ngabdi ka keyae. Daddi sapa’a bai se alanggar; kancana, ale’ otaba kaka’, sanajjan pottrana keyae sakale, bila sala pastena kodu nebbus kasalaanna.

Ca’na se gella’, pangurus ekamoso santre ja’ taker ekamengnga’. Polana jareya lakar kakanan sabban are. Bisa edha’-padha’agi moso aeng se eenom sabban are-sabban bakto.
Keng jareya ta’ teba ka sakabbiyanna pangurus. Mala’a, bannya’ keya pangurus ekaleburi na’-kana’ santre. Santre apolong ban ajar moso pangurus aropaagi bab laen se kodu etalektegi, ma’ olle  nyamana pangurus ta’ lako eabas daddi oreng se ekatako’e ban ekamoso moso tre-santre. Sabab, pangurus aropaagi panotan se eberri’ amanah sareng keyae kaangguy abanto dhalem adidik ban ngajari na’-kana’ santre se badha e pondhuk.

Kateppadan, Humaidi areya sala settong pangurus se cara jareya. Lebur ban ekaleburi moso na’-kana’ banne gun polana gantheng robana ban lowas pangataowanna, tape jugan teppa’ ban sepa’ guli ennengnga. Pa-apa se ekacaca ta’ bida moso se ekalako. Ta’ tangteng enga’ tembana oreng nyeram bako se possa’ salaja.

Settong kadaddiyan, badha santre alanggar kalowar pondhuk ta’ amet ka pangurus. Kalowar sampe’ pan-barampan are. Humaidi menangka pangurus kaamanan se pajat neggu’ na’-kana’ santre se alanggar aneyat kaangguy ngokom santre jareya tatkalana abali ka pondhuk. Eantos sampe lema malem santre jareya buru abali ka pondhuk. Ka malemmanna, Humaidi ta’ bannya’ careta, laju ngolok santre gella’ ngangguy lospeker. Kol-pokol dhari sajada la ranta esadhiya’agi e seddi’na, aga-jaga me’ santre se bakal eurus alaban ka aba’na.

Oneng ampeyan anapa ma’ eolok ka’ento, Le’?” Humaidi atanya kalaban mowa se larem tape sorem atandha morka.

Bunten, ta’ oneng, Ka’,” jawabba santre gella’ enteng.

Napana ta’ oneng? Ampeyan alanggar, Le’. Ampeyan kalowar pondhuk ta’ amet. Ma’ dha’ neka ampeyan?

Bunten, Ka’, kaula ta’ ma-kaemma. Kaula sake’ neng e kamar ta’ kalowaran.”

Ma’ gi’ lecek ampeyan, Le’? Sela ta’ ngako ja’ alanggar gi’ etambai lecek. Napa karebba ampeyan, tore abala?” Mowana Humaidi sajan sorem. Morka talebat morka. Ta’ kala ka macan kaelangan kakananna polana ekala’ koceng. Aba’na arassa ekaen-maenan moso santrena.

Ta’ abit, sajada se badha e adha’anna eleppet saropa pameccot, epokolagi ka santrena se ta’ ngako ka palanggaranna. Matana mera, dhaina kerso’, ceremmet padha badha. Tape sakeddhaban, Humaidi apangrasa ja’ aba’na epakon keyae daddi pangurus kaangguy mateppa’ santre. Banne ngala’ sakarebba dibi’ mokol santre polana ngoso’.

Tore, mata’ pate abit, anapa ampeyan ma’ kalowar ta’ ametEntar ka kaemma ampeyan?”

Enggi, Ka’, saporana. Kaula paleman ka roma, kae kaula songkan. Se ameda tako’ ta’ eparengagi. Polana okoman hadiran gi’ buru mare.”

Tarrr... Tarr... Tarr...

Lecek pole ampeyan, Le’. Gi’ ta’ ngakowa ka kasala’anna!” Sakaleyan aggi’ sajada se badha e tanangnga Humaidi napaka badanna santre jareya kalaban kaja.

Sabellunna Humaidi lakar tao, ja’ santre jareya entar dha’emma ban apa kaparlowanna. Keng Humaidi ta’ ngabala ka santre gella’ sopaja santre jareya abala dibi’ ta’ kalaban epaksa. Sabab, ajaran paleng ejunjung e pondhuk areya jujur. Daddi dha’ramma bai kabadha’nna ban-sabban santre kodu jujur. Polana jareya se bakal egiba mole ka romana bila la kalowar dhari pondhuk. Dhabuna keyaena, Sakaleyan oreng ta’ jujur, ta’ kajujuran se laen bakal kalowar e budhi are.”

Tello jam abidda santre se eurus moso Humaidi ngako ka kasala’anna. Asapora ka Humaidi ban ajanji ta’ bakal ngulange pole. Ban kaangguy nebbus ka kasala’anna, santre jareya egundhul ban eokom hadiran abidda lema bellas are, asabab palanggaranna banne gun coma kalowar pondhuk ta’ amet, tape kalowarra santre gella’ kaangguy nenggu Festival Kesenian se pajat daddi bur-leburanna. Gun-tenggun apa’a bai lakar elarang e pondhuk kajaba la olle edi dhari keyae.

Le’, kaula sapora, banne kaula ta’ neser ka ampeyan. Mala’a kaula ngalakone neka keng polana neser. Lakar bendher tojjuwanna ampeyan kalowar pondhuk entara ajar. Keng ampeyan jugan kodu paenga’ ja’ e pondhuk neka badha atoranna, ban-sabban atoran neka kodu etoro’. Kalowara pondhuk kodu amet. Mon ta’ ebagi, enggi ja’ mangkat. Napana pole pas ta’ amet lekka’ laju kalowar. Neka ta’ bagus, Le’, oca’na Humaidi.

Banne napa, Le’, ampeyan neka sareng reng towana etetepagi ka keyae. Daddi ampeyan neka gi’ daddi tanggung jawabba keyae e kaento. Pas sareng keyae epasra’agi ka kaula ban ca-kanca pangurus se laen. Artena mon ampeyan alanggar, neka ta’ coma alanggar ka pondhuk, tape jugan alanggar ka keyae ban reng towana ampeyan dibi’.”

Coba kenga’e pole, ampeyan mondhuk tojjuwanna napa? Kaenga’e jugan gi’ buru mangkada mondhuk, oreng towana ampeyan emo’ ka bara’ ka temor nyare pesse kaangguy maranta kabutowanna ampeyan e pondhuk. Tatanggana ngaji e romana ampeyan nyo’onagi du’a olle ampeyan neka ajar kalaban teppa’. Sopaja elmona se ekaolle ampeyan neng e pondhuk bisa ekamponge.”

Le’, tore pongpong kaula moso ampeyan neka badha neng e pondhuk, andhi’ kasempadan ajar kaangguy daddi oreng se teppa’. Pola gu’-laggu’ kaula ban ampeyan neka bisa ekabuto reng towa ban bala tangga. Mon polana kaula banne kose oreng se teppa’, Le’. Napana pole taker ngako oreng socce. Keng daddi kawajiban ka kaula moso ampeyan kaangguy ajar daddi oreng se teppa’. Kaula moso ampeyan kabbi se badha e kaento gi’ padha-padha ajar.”

Dhabuna keyae, pondhuk neka aropaagi gambaran kaodhi’an masyarakat. Ajar odhi’ e pondhuk padha bai ajar daddi masyarakat. Ampeyan mon odhi’ teppa’ neng e kaento, insya Allah bila mole ka romana bakal daddi oreng se karaddu ka masyarakat.”

Humaidi atotoran lanjang. Banne maksod aguruwi santrena. Tape alasan malae kaangguy daddi orang se atoro’ oca’ aropaagi kawajibanna menangka pangurus.

Enggi, Ka’. Nyo’ona sapora. Kaula sala. Kaula ajanji ta’ bakal ngulangi pole, oca’na santrena kalaban basa kasta se etandhai kalaban aeng mata se nyapcap ngalebadi pepena ban eakhere kalaban asalaman ka Humaidi, se aropaagi kaka’na dibi’, taretan sareyangnga aba’na. (*)

*M. S. Agie merupakan Dewan Konsultan Komunitas Nyengngir PPA Lubangsa Selatan Guluk-Guluk, Sumenep.
*Carpan tersebut terbit di Radar Madura (JPRM) edisi 26 Januari 2020