ATENA aromasa jembar. Dhung-kodhung se ella abit ekaterrowe, sateya la badha e tanangnga ban se lebbi mabunga iya areya dhung-kodhung jareya eberri’ mon pacaranna, Mursyid.
Saellana abit, Anis lakar terro kalaban dhung-kodhung barna mera. Aba’na arassa bila eangguy se paste, aba’na bakal olle raddin. Sakejja’ dhung-kodhungnga eteggu’ kalaban sambi mesem ban sambi angen-angen Mursyid badha e dhalem dhung-kodhungnga se ella badha e tanangnga.
Sakone’ dhung-kodhungnga eseyom mon Anis sambi arassae ro’omma toko gi’ ta’ elang, ”Paleng areya buru melle,” oca’ atena Anis sambi sakejja’ mesem tanggung matao gigina se sole ban lebur eabassagi.
Saterrossa Anis jaga ban entar ka adha’anna kaca e kamarra. Sambi ngabas aba’na ban sakone’ ajunjung karaddinanna saellana tangabas ka aba’na e dhalem kaca. Mowana bunter, gigi sole, ban mata se morka’ amarga matana mano’ ellang.
”Saellana sengko’ ngangguy dhung-kodhung reya se jellas sengko’ jan lebur ban Mursyid bakal senneng mon dhung-kodhungnga eangguy mon sengko’,” oca’ atena Anis sambi terros nenggu’ dhung-kodhungnga ban sambi mesem kalaban matao gigina se sole dhukalaja.
”Nis, ta’ tedhunga gi’? Areya malem la, ta’ bagus ne’-bine’ paraban tedhung malem,” oca’na emma’na kalaban maelang ngen-angenna se molae gella’ ta’ bisa elang ban jang-bajanganna Mursyid lako ngalemba’ sambi matao mesemma se gung-tanggung lebur.
”Enggi, Ma’,” sambi ngerrep dhung-kodhung se gella’ e tanang se kacer.
”Dhimma olle dhung-kodhung ba’na, Nis?” emma’na la talebat tao, saengga Anis makalowar dhung-kodhungnga se badha e tanangnga sambi mesem.
”Andhi’na kanca neka,” potos Anis lere ban ejawab mon emma’na kalaban onggu’an dhukale.
”Ya dina mon cara jare. Dhung-tedhung, laggu’ se asakola’a ban sobbuna me’ talebat,” sambi notop labang kamarra ban ejawab keya kalaban onggu’an ngarte.
Saellana emma’na nyengla ka kamarra, rassa jembarra ta’ bisa elang e dhiya keya. Rassa lempona ta’ bisa makala rassa sennengnga. Saengga Anis ta’ teros tedhung, gun-paggun ngabas aba’na e kaca sambi mesem tanggung. Saengga sampe’ jam e geddhungnga kamarra nojjuwagi pokol 24.00 malem.
Arassa sobbuna tako’ talebat, aba’na jaga dhari toju’na. Nyengla kalaban terros masemma’ dha’ kasor se badha e seddi’na. Saellana jare, Anis terros maloros badanna e attas kasor kalaban dhung-kodhung mera gella’ paggun cekka’ e tanangnga se kangan.
Sabellunna matana meddem, sakone’ Anis adu’a ka Se Kobasa sopaja epamempe kalaban Mursyid se badha e romana. Sambi angen-angen pagi’ bisa apangantan e attas kowadhi abareng Mursyid. Sabellunna nyedda Anis jugan adu’a kalaban du’a se eajari e langgarra molae gi’ kene’ lamba’, kalaban pangarep, laggu’ jaga kalaban sehat. Saellana jereya, Anis nyedda kalaban mesem.
***
Angen ngalesser maso’ lebat ngen-angenan roma. Monyena lospeker ranyeng majaga ban-sabban bu-tombuwan ban manossa se bakal ngalakone kawajiban abajang sobbu, kaangguy maranta ngadhep ka Se Kobasa e dhalem bajang.
Tape bakto jareya Anis paggun ta’ jaga. Monyena gu-laguwan salawat korang ranyeng kaangguy majaga aba’na se lempo. Ecapo’ tedhungnga se talebat malem. Saellana ngabas ana’na gi’ ta’ jaga, emma’na maso’ ka kamarra Anis sambi ajagai kalaban lelere ban alos.
Anis takerjat saellana ngedhing, pas tangabas ka emma’na se ella badha e adha’anna ban ajagai aba’na. ”Apa elakone malemma, ma’ kose lempo abasanna?” petanyana emma’na kalaban cengnga’ ngabas ana’na ta’ biyasana talebat se jaga’a sobbu.
”Sobung,” jawab Anis kendha’ sambi jaga maelang lempona ban ngosap mowana kalaban pangarep lempona bakal elang. Anis takerjat saellana tangabas ka dhung-kodhung se mera la tadha’ e tanangnga. Saellana ebas-abas ban esare, saongguna dhung-kodhung rowa badha e babana kasorra. Saellana mare ekala’, terros epacangke’ ka attas, Anis kalowar kamar, ngala’ udu’ kaangguy ngalakone pakonna Se Kobasa.
Bakto arassa ceppet. Saellana abajang sobbu, Anis ta’ tedhung pole, gun ju’-toju’ nyaresseppe angen gu-laggu ban are se gi’ ta’ nyolbu’ kaangguy matao sonarra. Cem-macemma mano’ amonye sambi ngabber nyare pakan. Padha ban oreng Madura se ajalan gu-laggu kaangguy ka saba. Jang dulluwan kalaban mano’ keddi’ se biyasa anganggu men-tamennan saba. Eppa’na Anis la mangkat saellana abajang sobbu. Biyasa mon oreng disa para’ kabbi alako daddi reng tane. Mangkat laggu ban mole rop-sorop are abareng kalaban patedhungnga mano’.
Kera-kera pokol satengnga petto’. Saellana tobuk arassae gu-laggu, akherra Anis maso’ ka dhalem kaangguy mangkat asakola ban maranta sakabbinna kaparlowan sakola’an. Ban arassa pojur, saellana emma’na nolonge maranta aba’na kalaban maranta kalambina se berse. Saellana la ranta, Anis mangkat samarena amet ka emma’na ban ejawab kalaban oca’ te-ngate.
Jau romana ka sakola’an kera-kera tello kilometer. Cokop ajalan soko bakal dhapa’ keya. Saellana dhapa’ ka sakola’an, saongguna sakola’an tadha’ pangajaranna polana badha rapat guru e sakola’anna.
Namong, arassa korang naleka oreng lake’ se erep-arep ta’ gellem ngontop e adha’anna. Biyasana, apa pole tadha’ pangajaran, Mursyid entar kaadha’ ka Anis. Anis ta’ ngarep banya’, gun ngoca’a kalangkong ban sakone’ terro ngabasa pamesemma se tanggung.
Tape, e are sateya, Mursyid ta’ maso’. Saellana etanya’agi ka ca-kancana bannya’ se ngoca’ ta’ tao. Saellana ka bara’ ka temor atanya ka kancana, badha se abala ja’ e romana Mursyid reya badha karja.
***
Dhapa’ ka romana, Anis gun anya-tanya dibi’. Maelang pekkeran juba’na sambi mangarte ja’ Mursyid paleng andhi’ parlo se ce’ parlona, saengga ta’ sempat kaangguy aberri’ kabar ka aba’na. Sampe’ saare, dhuware, tello are, Mursyid paggun ta’ aberri’ kabar ban ka sakola’an ta’ maso’ sakale. Pekkeranna Anis alorju’ tako’ apa-rapa Mursyid.
Rassa terro taowa dhalem atena ta’ bisa ebendhem pole. Anis andhi’ pangaterro entara ka romana Mursyid kaangguy masteyagi ta’ apa-rapa ka aba’na Mursyid. Kera-kera kol ballu’ lebat saparapat, Anis amet ka emma’na kaangguy amaen ka kancana. Sambi asangaja Anis ngangguy dhung-kodhung se eberri’ Mursyid.
Saellana ajalan kera-kera satengnga jam, Anis nangale penggirra pagar alassa romana Mursyid. Badha karena janor konengnga ban malorju’ pekkeranna. ”Badha apa areya, ma’ sampe’ badha janor koneng se ella ellop?” oca’ atena Anis.
Sabellunna Anis maso’ ka taneyanna romana Mursyid, Anis meddek. Ta’ asowara. Atena agulek. Dharana arassa ngonca’a saellana tangabas ka baca’an, ”Semoga Menjadi Keluarga yang Sakinah Mawaddah Warahmah Mursyid & Sa’imah” cokop masake’ atena ban maelang ngen-angenna se ella abit arangke’ e dhalem pekkeranna.
”Anis…” sowarana se ta’ asing e kopengnga nyebbut nyamana, kalaban ba’ ranyeng. Namong, ta’ abit dhari dhalem badha reng bine’ se neggu’ tanangnga Mursyid sambi neret ka dhalem roma. Anis abalik, pekkeranna ban atena sake’. Anis malesong mole, ngeba sake’ ate abareng ngolgulla dhara ban dhadha. Ajalan sambi ngelangngagi sakabbinna ngen-angen ban sambi moccal dhung-kodhung barna mera e cethagga. Terros ebuwang e tengnga jalan kalaban pangarep ngelangngagi loka se badha e ate.
Perpustakaan, 06-02-2018.
*Fathorrosi merupakan Ketua Perpustakaan PPA Lubangsa Selatan
**Sumber: Radar Madura (Jawa Pos Group)
0 Comments