Buju’ Pancor

”SAMPEYAN abadhi napa, Ma’?”

”Reya agabay topa’ lobar egiba’a ka buju’ dhaggi’an. Ba’na noro’a ka buju’?”

”Badha ponapa, Ma’ e buju’?” Amaliyah, kompoyya Ke Haruddin pas atanya sambi lang-nelang topa’ lobar se agundhung bangonna loncong aloncongan dhari tellor.

”Badha lolobaran dhaggi’an e buju’, Bing. Ba’na mon noro’a mare abajang asar ata-ranta ya, adhung-kodhung pateppa’ ngeba Alqur’an, ba’na kan tao ngaji?”

”Ooo, enggi, Ma’!” Amaliyah ngolok mama’ margana gi’ kene’ nerowe eppa’na ngolok mama’ se biyasana ngolok kae.

Amaliyah tero taowa apa ma’ ngeba topa’ ka buju’. Aba’na ta’ pate tao urusan adat ban kabiyasa’anna reng-oreng Disa Totosan polana aba’na rembi’ ban neptep e kabupaten laen amarga eppa’na oreng Totosan abine ka Kacamadan Sampang. Daddi ka Totosan, Sumennep, paleng mole mon kerrong otaba badha parlo.

Topa’ lobar eyanggi’ dhari janor pa’-empa’. Dhalemma aesse’ nase’, palotan badha eesse’e kembang pas egantong e budhina labang. Konco’na janor se pa’-empa’ mon ecocowagi kabbi pas esenta’ abareng maka daddi janor pole, tanto bannya’ ma’na ban artena.

***

Guba ngajendhur e masjid. Na’-kana’ adan Asar saleng saot dhari jubara’ ban jatemor. Marena abajang reng-oreng Totosan arik-birigan, towa ngodha, entar ka buju’, se kampong lao’ entarra ka Buju’ Pancor, se kampong dhaja ka Buju’ Ba’aji. Mangkana pas bannya’ ngoca’ mon bagiyan lao’ esebbut Kampong Pancor.

Bu’-embu’ nyo’on ponar ban rasol net-enneddan. Na’-kana’ nyandhakep Qur’an. Pa’-eppa’ nyamper asongko’an. Arassa bunga bakal ngamba’a jaman nembara’, merteya tatamennan se daddi sambungnga odhi’.

Menorot careta, Buju’ Pancor aropa’agi Astana oreng wali se banne asli oreng Totosan. Namong seda tor emakamagi e Totosan. Daddi karamat.

Keyae Ajji Mohtar nyeppowe tahlil dha’ reng-oreng se ta’ tao ngaji. Se tao ngaji, ngaji Qur’an alenglenge buju’. Samarena atahlil, nase’ erobak, saleng maranta. Badha se ngesse’e topa’, se laen metar se ekakana abareng.

”Ke Ajji parenge kadha’ dha’arra, Man,” Bi’ Halima nyoro Man Arnawi.

”Ba, ella, mayu’ paranta kabbi pas kambuli’i ngakan abareng olle ne’mat. Bila pole se along-polonga mon ta’ keng cara reya ta’ kera. Apapole sakejja’ laggi’ la mosem tane, emo’ kabbi,” Ke Ajji sambi nolonge maranta nase’ rasol, ta’ kasokan eparanta’a kadha’.

”Enggi, sae..sae..Ke, ngereng eyatore!”

Padha asela, rassa jumambar tadha’ padha. Ngakan areng-bareng majarna’ pekkeran. Tor-catoran saleng saot.

”Senga’ loppa topa’ lobarra esse’e kembang, pagiba mole. Pabannya’ ngesse’. Reng-oreng se ta’ entar dha’enna’ aterre ka bengkona,” Ke Ajji maenga’ ka bu’-embu’ se ngesse’e topa’.

”Enggi, Ke, neka maddhai sabarunju pon.”

”Heeeee....!” Ke Ajji kasokan.

***

”Pa’, engko’ gella’ noro’ ka buju’. Lebur mara bannya’ oreng, ramme,” Amaliya atotoran sambi tang-gentangan mare abajang Mangrib e musalla.

”Ba’en ngakan e dhissa’?”

”Ngakan saompa’an. Polana ca’en juba’ mon ta’ arassaen,” Amaliyah ban eppa’na, Rafiqi, alogat oca’ Sampang polana la para’ sapolo taon se akaluwarga ban neptep e Sampang.

”Ma’ ta’ epabannya’?”

”Kennyang, Pa’, se mangkada ngakan soto la’an. Tape engko’ noro’ ngaji ban mama’.”

”Bagus, ana’en eppa’ jan hebat.”

”Ba’na tao, Bing, lamba’ Buju’ Pancor rowa mon epaddek epabagus ampo gujur. Epaddek seyangnga kalagguwanna la gujur kabbi. Ta’ kasokan epaddek epabagus. Mangkana buju’na gun elenglenge bato celleng biyasa sampe’ sateya ta’ ebangun pole. Bannya’ careta karamadda Buju’ Pancor keng mama’ la bannya’ loppana.”

”O... enggi Ma’,” Amaliyah ngedhingagi caretana Ke Haruddin sambi ling-gulingan ban rokona.

”Juwa apa gunana, Ma’?” Amaliyah ta’ pate tao abasa. Tekka’ ka se towa’an lako taloccor ngoca’ enja’-iya asabab lakar lingkunganna bannya’ se ta’ abasa tekka’ ka se towa.

”Ba, mon acaca’a gunana bannya’, Bing. Se ta’ akompol bisa akompol abareng, rokon, ngaji, atahlil, saleng asadaka. Poko’ bannya’ gunana ra. Acara cara gella’ rowa sataon sakaleyan. Baktona mandila ra’-para’ mosem tamen nembara’. Mangkana ba’na alake reng dhinna’ bai ya olle tao ka kaodhi’anna reng Totosan.”

”Hemmm... Mama’ nemmo bain. Ma’ abanta’an kabin jing gi’ engko’ buru kellas ennem?” Amaliyah mancerot ekala’-gella’.

Disa Totosan kabannya’an se atane. Daddi ngadhebbi toron ojan tanto senneng gumbira. Kabannya’a tanena coma ngandhallagi ojan, daddi atane sataon sakaleyan. Nemorra atamen bako.

”Maddha se abajanga, Pa’na Fiqi, pas adha’ara. Garowa’ emma’na Amaliyah pon ta-maranta e dhapor,” Bi’ Rabi’a sambi jaga mobu roko.

”Ba, neko Isya’ pon, gi?”

”Ja’ reng kose cator ngajeddhul, badha adan ta’ ekedhing.”

”Banne nyator angeng-dungngeng co-ngoco Amaliyah,” sambi jaga Ke Haruddin maloros sajada ngimami bajang Isya’.

Susanti ngakalotthak e dhapor. Abanjar pereng e meja pangakanan gangan maronggi, peccegga terrong, ban guringnga juko’ panit. Nase’na bang nyamplong. Padha toju’ kabbi neret korse.

”Kobassa neka, Bu’, abit kaula ta’ tapak gangan maronggi,” Rafiqi asirut sambi nyabuk kobugan.

”Ya jareya, Cong, gella’ engko’ nyadhiyai ba’na polana ngoca’ moleya.”

Buru olle tello ompa’an pas Bi’ Rabi’a maambu se ngakan.

”Lu’ gallu ambu gallu, mase badha gariyung e temoranna garo, Pa’na Fiqi. Senga’ badha tokar?”

Padha magak kabbi se ngakan. Ke Haruddin buru kalowar.

”Badha napa, Ma’?” Rafiqi nyosol ka lowar.

”Rowa’ e temoranna, kona oba’na, badha se atokar paleng.”

”Tore entare, Ma’. Garowa’ bibbi nanges rung-dharungan.”

Ke Haruddi ban Rafiqi langsung mancal ka bun temorra.

”Badha apa, Ma? Halima arapa?” Ke Haruddin langsung maso’ ka dhalem, kateppa’an labangnga ta’ etotop.

”Dhuuuu.... Ta’ tao, Din, sakeng bagiyanna engko’ cara reya. Andhi’ ana’ settong ta’ macellep ka ate.” Bi’ Halima abukbuk dhadha memejil ka Ke Haruddin.

”Ja’ cara ganeka, Ba’. Anapa sampeyan?” Rafiqi matennang Bi’ Halima eteggu’ tanangnga.

”Mon reng lowar ja’ ro’-noro’. Neka wilayana kaluargana oreng,” Hasan nuding, sowarana agantar, matana mendhar mara mardha.

”Ba, ja’ cara jareya ba’na, Cong. Badha apa, Cong?”

”Jareya ngamok, Din, polana ngakana nase’na gi’ ta’ massa’. Nase’ se gella’ egiba ka buju’ ban engko’ egabay rasol. Mangka pas la’-mancella’. Sobluk badhana etandu’. Ngamok adha’ mata adha’ colo’ ka engko’. Engko’ sela budhu gubluk, ca’na parlo makane bilis ngeba nase’ ka koburan. La eyalose ban engko’ soro antos sakejja’ laggi’ nase’na para’ rekedda.”

”Buuu... Mamadul, mangkana, Bu’......” Ta’ mare lakka’ Hasan se acaca Ke Haruddin langsung nganar ka Hasan.

”Arapa, Cong? Ja’ ro’-noro? Engko’ rey pamanna, mon eyako. Ba’na molae gella’ edina mase kose nyangko’a ka embu’na. Ba’na reya epasakola, sangkolla embu’na ejuwal. Mangaji manyare elmo ba’na ka jauna pangara olle daddi sampornana. Ta’ lulus balakka’ ba’na la la’-nyala’agi adat tengkana masyarakat. Mon lakar lopot menorot ba’na, toju’ pabendher atanya pasepa’ ja’ laju badhana kakan matta. Jareya ba’na reng towana, patapa’anna ba’na. Dhimma ajar lang-macangkolang bana, hah?”

Essep tadha’ sowara. Hasan se ding-nuding asandhakep nondhu’.

”Dinggal ja’ kasare, Ma’,” Rafiqi macellep kabadha’an, ngosot tengngana Ke Haruddin dhari se kacer. Tanang se kanan gi’ but-jalibut nase’.

”Iya, Cong, engko’ sella’ dhadha mon badha ana’ bangal ka reng towana. Tekka’ ba’na lamba’ bangal ka embu’na eyokom saare benteng epangger ka bungkana pao ban engko’. Enga’ ba’na?”

”Enggi, Ma.”

Polana apa, tadha’ jalanna bunga ban salamet mon ana’ reya ta’ ngormat reng towa. Bi-lebbi reng towa bine’. Ka bengko marena, San, mon acaca’a jareya ba’na mon galgal dhadhana terro taowa arapa ma’ ngeba nase’ ka buju’. Mon badha se ta’ saroju’ ka pekker ban pangataowanna’ ja’ laju ontal bungkol me’ caleggen. Mon tadha’ reng lamba’, ta’ kera badha ba’na sateya.”

”Enggi!”

Hasan ta’ metto saot. Dhari dullu semmo sengka ban tako’ ka Ke Haruddin. Ke Haruddin gi’ wit majadhi’. Ale’na eppa’na Hasan. Orengnga tatak keng sopan margana ekasengkae bannya’ oreng.

”Ya kassa’ kan-ngakan pakennyang. Mara, Qi, moleya terrosagi ngakan.”

Angen ngadhuwes. Ka’-bungka’an sale’bung nandha’agi mosem nemor para’ aganteya. Bulan nyonar e attassa bubungan sora’na atampessan ka un-dhaunan. Tanggalla tanggal pa’bellas. Badhana labang etotop. Sapasang jandhila epakartep. (*)

Tangerang, 2019

*USWATUN HASANAH  Lulusan MA Miftahul Ulum Tang-Batang tor STITA Sumenep. Ajar areng-bareng e UKM Komunitas Pelar ban LKSB Pangesto Net_Think Community Sumenep. Carpanna se laen jugan maso’ dhalem buku “Tora, Satengkes Carpan Madura (2017)”

*Carpan Paneka emuat e Radar Madura e tanggal 12 Januari 2020