Durahem Ta’ Paju Bine


ELLA olle pettong bulan Durahem se la abakalan. Bebine’ se ekaterrowe molae gi’ asakola aliyah la daddi bakalla se anyama Filda. Dhalem janjina areya bakal bisa ekabin samarena lulus akuliya. Durahem se la lulus sarjana olle tello taon. Coma bisa adhante’ sambi alako e Malaysia. Atena la andhi’ kayakinan Filda ta’ kera co-ngoco dha’ janjina. Asabab sambi mondhuk.

Dhalem bakto adhante’na, Durahem pajat lakar bajeng onggu alako. Sabab nyare bandha kaangguy masenneng binena gu’-laggu’. Napapole kabiyasa’an aparlo e disa pastena ta’ sakone’ se kodu esadhiya’agi, khusussa dha’ se lake’. Kodu nyadhia’agi lencak, korse, ban essena roma laenna. Etambai maskabin. Bila apakompol acora’ sampe’ petong polo juta.

Margana Durahem daddi somangat onggu se makompol pesse. Kadhang dhalem sataon coma sakaleyan se mole dha’ romana. Kadhang sampe’ ta’ mole. Bila la lessoh alako, Durahem biyasa makalowar fotonah Filda sambi eosso laonan.

”Rassana coma kalaban dika bantal patena bula. Ta’ kera gampang tagudha kaangguy nyare babine’ laen. Asabab dika se daddi gantonganna ate bula,” oca’na Durahem sambi eseyom barampan kale.

Omor se la ta’ ngodha petto lekor taon, ban sapopo bannya’ se la akabin, nyatana daddi bantana bannya’ oreng. Ka bara’ ka temor ta’ bu-ambu se lako co-ngoco ekoca’ lalake’ ta’ paju bine.

”Durahem, ja’ pakala ka ale’ sapopona se la andhi’ ana’ rowa’,” oca’na Jumadin.

”Pole ba’na se wa’-towa’an. Masa’ lako kala ka se ngodha’an,” Mitro nyambung banta.

”Tako’na dhaggi’ pas ta’ duli abine mon gun abakalan terros,” Jumina noro’ keya.

”Apapole ba’na alako e Malaysia. Sapa se taowa ja’ bakalla bur-leburan ka lalake’ laenna,” oca’na Sulastri sambi agella’an.

Rassana panas onggu kopeng bila la ngedhing banta enga’ jareya. Rassana terro mokola pas etorkopa mowana bila ta’ kowat ka bantana. Tape Durahem coma napet dadha ban ta’ terro nyareya masala. Sabab padha ngarte ja’ kabadha’an lakar bendher.

Tape Durahem lakar ta’ bisa notope taresnana dha’ ka Filda. Reng bine’ se ekennal bakto ngerem panakanna ka pondhuk, tajurukup e labang maso’ santre bine’ sambi nondhu’ kalaban mesem manes. Pajalana neter kalenang abius pekkeranna Durahem.

Ta’ sampe’ dhubulan kennalan, Durahem langsung ngabala dha’ reng towana. Sabab taresna se la ta’ bisa etamba’. Pa’ Karim se la ngarte pas nerrosagi acabis dha’ Keyae Sobirin. Saminggu dhari acabis langsung epenta dha’ reng towana.

Saampona rasmi, Durahem rassana ta’ bu-ambu se lako nelpon dha’ Filda. Seyang malem rassa kerrong ta’ mare-mare, mowana ban pamesemma se lako badha neng pekkeranna. Maskena epaenga’ bi’ eppa’na soro ja’ lako nelpon tako’ badha busenna, paggun bai Durahem se lako maksa nelpon. Sampe’ oreng towana nyoro alako bai katembang nganggur ka bara’ ka temor adhante’ bakalla. Napapole bantana reng-oreng se lako co-ngoco.

Katembang ros-terosan eco-koco, lebbi bagus ngala entar ka Malaysia sambi makompol pesse. Ampon para’ dhutaona se alako sampe’ bisa nyokope kabutowan bila ampon andhi’ karep se abineya.
”Ba’na alako bai ka Malaysia, Cong,” oca’na eppa'na.

”Iya bendher onggu,” emma’na nerrose. Bannya’ se gun lako abanta ba’na se ta’ lem andhi’ hajat abineya. Dina pakompol pessena. Sambi kabelli sape, lencak, pas nyempen pabannya’ ma’le ta’ posang bakto abine gu’-laggu’.”

”Enggi, Ma’.”

”Sengko’ coma neser dha’ Kurdi tatangga ma lao’. Olle sabulan abine la mangkat alako ka Bali. Oca’na ta’ andhi’ pesse kaangguy nyokope kabutowan sabban arena. Apapole Dulmannan se akabin coma olle tello bulan, la apesa bi’ Sumina. Kabarra Dulmannan ta’ endha’ eajak alako. Pas gun tedhung malolo e romana mattowana. Emma’ ta’ terro tang ana’ mellas enga’ rowa. Pas dha’ramma cara tang kacong bisa anapakae binena ban ta’ parlo menta ka oreng laen.”

”Enggi, Ma’, kaula bakal bajengnga alakowa nyare pesse. Se penting sambung du’ana ma’le kaula bisa lancar lakona.”

”Mon du’a ta’ parlo epenta. Emma’ paggun ros-terrosan sabban bakto. Se penting ja’ sampe’ kaloppae bajangnga, pas tambai bajang tahajjud ban duhana, ma’le eparenge kalancaran bi’ Pangeran Se Kobasa.”

”Enggi ka’dhinto”.

Durahem rassana somangat onggu se nyareya pesse. Napapole oreng towana la nyokong saratos persen. Janjina Durahem ta’ bakal co-ngocowa dha’ janjina bakalla ban paggun terros enga’a dha’ dhabuna oreng seppona.

Ontongnga sadhapa’na ka Malaysia, Durahem ekabareng sapopona alako bangunan e Selangor. Sabban are mangkat pokol petto’ mole pokol lema’. Panas cellep, paggun ta’ egarassa. Sabab se badha e pekkerra ta’ terro bakto abine gu’-laggu’ aba’na ban kalowargana pas daddi oreng mellas.

”Dina mon mellas sateya, poko’ bakto abine ban andhi’ ana’ bisa jembar saterrosa,” dhalem pekkerra.
Filda coma kare mamareya skripsi sambi adhante’ bakto wisuda’an. Artena akare tello bulan se akuliya. Rassana ta’ bisa abayangagi rassa sennengnga bila sampe’ alaksana’agi sunnah rasol. Oreng-oreng pastena bakal todhus bila tao ja’ bantana rowa ta’ bendher.

Durahem pastena bakal abineya, keng coma bakto se gi’ ta’ dhapa’. Olle sataon lebbi, dhari Malaysia Durahem la menta maranta salametan se langkong raja. Sakabbina ru-guru, la-bala, ca-kanca, ban tatangga soro onjang kabbi. Ma’le sajan gaga’. Keyae Sattar dhari Lomajang pas duli eonjang molae sateya. Ta’ loppa grup haddra Ahbabul Mustafa. Soal pesse pastena gampang eator.

Teppa’ sabulan dhari wisudana pas nantowagina tanggalla. Bulan Rasol se la epanggi bulan se molja kaangguy walimatul ursy. Pastena saminggu dhari wisuda’an paggun mole ngeba areppan se langkong raja.

”Emma’, kadiponapa kabarra?” oca’na Durahem lebat telpon.

”Alhamdulillah, Cong, emma’ bi’ eppa’na padha baras e dhinna’. Dha’ramma kabarra ba’na sateya?”
”Alhamdulillah sehat jugan.”

”Dha’ramma kalakowanna, Cong?”

”Lancar, Ma’, alhamdulillah kaula sambi nabung e ka’dhinto kaangguy aparlo ban odhi’ saterrossa.”

”Sengko’ noro’ bunga, Cong, ba’na alako nyatana ta’ kera mowang bakto. Tape bisa ngaselagi pesse.
”Enggi, Ma’, mator sakalangkong du’aepon. Kadiponapa kabarra bakal, Ma’?”

”Padha sehat, Cong, panbila ekerem ka pondhukka.”

”Alhamdulillah. Ta’ langkong ja’ sampe’ kaloppae sadaja kabutowan parlona. Manabi badha se korang apareng oneng ka’dhinto.”

”Ta’ usa kobater, la mare eparanta kabbi. Kare ba’na bila se moleya?”

”Insya Allah minggu dhateng kaula pon nerbang dhari Malaysia.”

”Alhamdulillah. Samoga’a salamet sampe’ dhapa’ ka roma.”

”Amien…!”

Rassa bunga ta’ bisa etotope dhalem pekkeranna Durahem. Sabban malem coma mowana bakalla, Filda, se lako agudha. Ngakan ta’ nyaman, tedhung ta’ ngeddha. Sabab ker-pekkeran dhalem ngadhebbi settong are se talebat sakral dhalem kaodhi’anna Durahem. Tiket kaangguy nerbang la mare messen. Are laggu’ jadwal se nerbang-a.

Dhalem parjalanan sampe’ dhapa’ ka romana rassana ta’ bisa ambu, pas lako atanya kabadha’an bakalla. Napapole korang dhuware wisudana se elaksana’agina. Pas sajan maposang dha’ pekkeranna Durahem.

”Eppa’ kadiponapa kabar saterrossa soal parlona?” Pa’ Karim coma bisa nondhu’ ta’ ajawab dha’ partanya’anna Durahem.

”Anapa, Pa’, ma’ esep panjennengngan? Tore pajellas badha ponapa ongguna?”

”Saporana, Cong, Bakala ba’na bakto epenta akabina, pas jawabba ta’ bisa. Alasanna pas acem-macem. Sengko’ ta’ bisa maksa pole. Mon la ta’ padha ban janjina pas epaburung sakale. Ma’le ta’ katomanen.”

Durahem se ngedhing jawabanna eppa’na pas takerjat ta’ sapera. Nalpe’ ka pelar ta’ metto oca’. Dhalem pekkeranna aromasa todhus dha’ budhina. Sabab bakal ramme oca’ Durahem ta’ paju bine. 


*MA Leo samangken aseppoe sala settong organisasi e Bali enggi paneka kalaban daddi "Ketua PC IPNU Denpasar, Bali". MA Leo jugan gasek nosel carpan basa Madura, jugan gasek emuat e Radar Madura. 

**Carpan kasebbut jugan emuat koran Radar Madura (JPRM) e tanggal 8 Desember 2019.