Monday, 4 November 2019

Nyopre Barokah

Nyopre Barokah - contoh36.blogspot.com


NGABAS jam gi’ pokol petto’ korang sapolo mennit. Are ta’ paddhang sabab katotoban ondhem se petteng. Angen ngalesser maso’ ka kole’, macellep dha’ badanna oreng se buru kalowar dhari romana. Tape jareya ta’ egarassa ka badanna Ramdan. Sabab, molae gelle’ toronna sobbu, Ramdan la alalakon ta’ ambu sakale. Molae dhari malae ngaji ponakanna keyae pas eterrosagi nyapowe amper moso taneyanna keyaena se lebar. Adaddiyagi pello agili dhari tengnga kantos bettessa. Banne cellep, tape sowap seegarassa.

Mare asapowan, Ramdan mesem senneng. Sabab lalakonna la mare, ban amaksod kaangguy pamet moleya ka pondhugga. Namong, sabellunna pamet, Ramdan nengale bakalla kalowar dhari dalemma keyae asareng enningnga se eemban.

Ramdan mesem kalaban bunga esempatagi pole nengale ka bakalla e are jareya. Bakalla males kalaban mesem se ta’ kala manes akantha balibis se ngabber e langnge’, ngombar kajembaran. Ramdan enga’ ka awwal tatemmona moso bakalla pas kantos epadaddi judhu moso keyae. Rassa bunga ta’ bisa ederrep kalowar dhari mowana se morka’.

***

Ekabidi kalaban rassa ta’ nyaman ban neser nengale keyae dalem lao’ se sabban are asapowan dibi’ e amper moso taneyanna. Ramdan mabangal kaangguy agante po-sapo se badha e astana keyae.

”Dinggal abdina se nerrosagina,” oca’na e settong are ka keyaena.

”Oh.. iya, Cong,” dhabuna keyae abareng sambi ajuluwagi po-sapo ka Ramdan.

Ramdan nyapowe amper moso taneyanna keyaena kalaban ate ikhlas ngabdi. Tadha’ pangarep laen kajaba barokana keyae se adaddiyagi aba’na aguna bila mole ka romana.

Saellana jareya, sabban are Ramdan dhateng ka dalem lao’ se aropa’agi dalem taretanna keyaena kennengnganna mondhuk. Parlo ekataowe, se nyepowe pondhugga Ramdan reya sataretan bannya’na lelema’. Sala settongnga iya areya keyae e dalem lao’ asareng raji ban pottrena.

Saare dhuare Ramdan terros nyapowe amper ban taneyanna keyae e dalem lao’. Dhalem atena tombu rassa bunga bisa abanto keyaena maskeya gun coma jareya. Bungkana kersen eondhu kalaban pangarep bisa magaggar dhaun sa adaddiyagi taneyanna keyae berse eabas mata, tor ta’ loppa kalaban ngondhu bungkana kersen jareya, eneyate sopaja barokana keyae gaggar akalotoran mossa’e aba’na.

***

E settong bakto, keyae bingong kaangguy nyare gante oreng se bisa ngajari ponakanna se gi’ kellas tello’, se epasra’agi ngaji e dalem lao’ moso reng towana. Sabab, oreng se biyasa ngajari ngaji ban abajang la epamettagi ambu dhari pondhuk. Saellana mekker abit, keyae enga’ dha’ Ramdan se lako asapowan e amper moso taneyanna sabban laggu.

Peleyan se teba dha’ Ramdan kaangguy ngajari ponakanna se dhuwa’an tantona banne potosan se kalero. Sabab, keyae mare nalektegi kalakowanna Ramdan se bendher-bendher ngabdi ka keyae. Ban pole etambai kalaban edi dhari nyae se lakar lebur ngabas tengka guli ban totor basana Ramdan se alos.

”Nyaman, Bi, manabi Ramdan se egabaya gantena Rasyid. Orengnga katon lebur ka na’-kana’, sareng ebas-abas lebur tengka gulina,” dhabuna nyae kalaban mantep.

”Enggi dinggal, Mi. Pole Ramdan pon seggut etengale e ka’ento sabban laggu, ma’ sambi ngajari na’-kana’ sakale,” sambung keyae.

Ta’ usa ngantos abit, Ramdan edikane sareng keyae ka dalem lao’. Tadha’ maksod laen kajaba menta karida’anna Ramdan kaangguy malae ngaji ponakanna. Ramdan rassa ta’ parcaja bisa ekaparcajai keyae. Mangkana aba’na apangrasa ta’ bisa ngalakone pa-apa kajaba asapowan ban ngondhu bungkana kersen. Namong, karana keyae se makon, Ramdan pasra ban narema kalaban ate se senneng. Pola dhari jareya daddi tambana barokah dha’ aba’na.

”Enggi,” oca’na Ramdan pandha’ ajawab dhabuna keyaena.

Kalagguwanna, marena asalat hadiran sobbu ban maca ratibul haddat se lakar daddi kawajiban e pondhugga, Ramdan mangkat ka dalem lao’ kaangguy asapowan ban malae ngaji ponakanna keyae. Ngabdina Ramdan ka keyaena lakar ta’ parlo atanya’agi pole. Ramdan ngalakone kawajibanna kalaban ta’ ngarep apa-apa. Ca’na se gella’, neyat ngabdi nyoppre barokah.

Sakaleyanaggi’ keyae sareng nyae ta’ sala mele Ramdan. E sabban are Ramdan agabay jembar ka panggaliyanna keyae sareng nyae dalem lao’. Dhari jareya keyae ngarep sopaja Ramdan bisa neng-enneng e dalem lao’ saterrossa; ato-banto pan-apan kabutowan se badha e dalem lao’. Tamaso’ bisa ngereng keyae bila meyos jau. Misalla tatkalana meyos ka dalemma nyae se badha e Sampang ban salaenna. Rassa estona keyae ka Ramdan atamba are atamba raja. Bahkan, Ramdan eanggap pottrana dibi’ sareng keyae. Pan-apan seekabuto Ramdan ecokobi sareng keyae.

***

Dhapa’ e settong are, keyae ngoladi Ramdan la raja, akulia maso’ semester lema’. Keyae amaksod kaangguy nyareyagi bakal. Bakal kaangguy santre sanaossa la eanggap ana’na.

”Cong, ba’na bi’ engko’ terro epabakalana moso Aqidah!” Dhabuna keyae e settong kasempadan samarena Ramdan asapowan. Aqidah aropa’agi panganjuna pottrena keyae molae nyae babbar.

Takerjat ekarassa e dhadhana Ramdan saellana ngedhing dhabuna keyae. Dhalem atena arassa ta’ parcaja dha’ se edhabuwagi keyaena. Dharana katon ambu agili, badanna lemmes ta’ andhi’ ora’. Keng polana badha e ajunanna keyaena, Ramdan paggun abalangaja manjeng sodek maskeya gun coma bisa nondhu’ ta’ metto oca’.

”Dina, laggu’ ba’na mole ka romana. Karembak moso oreng towana. Eantosa kapotosanna bi’ engko’,” keyae nerrosagi dhabuna saellana ngoladi Ramdan paggun ta’ kalowar banta.

”Enggi,” jawabba Ramdan pas eterrosagi pamet karna kawajibanna malae ngaji ban asapowan la mare kabbi.

Pekkeranna Ramdan possa’ kalaban kabingongan se acem-macem; baramma carana abala ka reng towana ja’ aba’na bakal epajudhu moso reng bine’ peleyan keyaena ban salaenna. E pondhuk, Ramdan acareta ka ca-kancana ban menta bantowan. Pangarana Ramdan gi’ terro ennengnga kadibi’ ajalane kaodhi’an. Pole aba’na gi’ terro mamareya kuliana kantos lulus. Tape, pangarep se laen Ramdan tako’ kaangguy nola’ peleyanna keyae se adaddiyagi atotobba barokah.

Dhapa’ ka romana, Ramdan makompol eppa’-emma’, taretan, paman, ban majadhi’ kaangguy madhapa’ dhabuna keyae se terro majudhuwa aba’na moso Aqidah se aropa’agi panganjuna pottrena keyae.

Pello agili dhari dhai ban pepena Ramdan. Tako’ dha’ kapotosan se kalowar dhari reng seppo ban tan-taretanna. Dhalem ate Ramdan ta’ bu-ambu adu’a samoga kapotosan reng seppo ban tan-taretanna daddi kapotosan se bagus se bisa aguna ka kaluwargana ban masyarakadda.

Bakto jareya akantha jurungan se seppe tadha’ bantana oreng. Sakabbiyanna ngedhingagi totoranna Ramdan.

***

Arassa la mare arembak ban nyo’on edi ka reng seppo moso tan-taretanna, Ramdan abali ka pondhugga kalaban ate se ta’ etemmo karowanna. Rassa bunga ban rekong ta’ etemmo konco’ bungkana. Dhalem atena gun adu’a sopaja kapotosan kaluwargana daddi kapotosan se patot monggu keyae, kaluwarga ban juntrong dha’ aba’na dibi’. Dhapa’ ka pondhuk Ramdan nojju ka dalem lao’ kaangguy madhapa’ pan-apan se mare ekarembak moso kaluwargana bab judhuna.

”Assalamu alaikum…” Ramdan ngolok salam kalaban manjeng sodek e adha’anna dalem lao’ tor nondhu’ ta’dim; ngantos keyae.

Ta’ usa ngantos abit, keyae meddal asareng pottrena se badha e seddi’na. Tako’ malanjang oca’, Ramdan notoragi kapotosanna kaluwargana ka keyae kalaban oca’ se giggu’ ju’-jalujju’.

”Oh, iyalah mon cara jareya. Malem Juma’at engko’ moso reng towana ba’na entara ka reng towana Aqidah, elamara kaangguy daddi judhuna ba’na,” dhabuna keyae kalaban parjuga.

”Enggi,” jawabba Ramdan pandha’. Dhalem atena, Ramdan gi’ paggun ta’ parcaja dha’ kadaddiyan se teba ka aba’na. ”Samoga daddiya barokah,” sowara atena Ramdan se ta’ bisa ekaedhing sapa-sapa. Tamaso’ keyae se badha e adha’anna. (*)



*)M. S.AGIE merupakan Alumnus Instik Annuqayah. Anak asuh Komunitas Nyengnger PPA Lubangsa Selatan.

*Careta Pandha' ini pernah tayang di Radar Madura (Sumber:https://radarmadura.jawapos.com/read/2019/02/03/117500/nyoppre-barokah).

No comments:

Post a Comment