Sunday, 13 October 2019

Owa' Kapal

OWA' KAPAL


"OWA’ kapal, menta’a pessena,” Marini berka’ dhari dhalem romana ka taneyan. Nabang kapal se amonye reng-dherrengngan. Marini onga’ dha’ attas sambi ngoca’ menta’a pesse ka kapal se lebat.

Biyasana bila la pokol petto’an kapal jarowa lebat. Marini ngantos neng e adha’na amperra. Aorak menta’a pesse. Pesse se epenta pajat ta’ toman gaggar dhari kapal se eoragi rowa. Tape Marini apangrasa ce’ sennengnga rak-orakan ”menta’a pessena kapal”. Kadhang, bila Marini tababas jaga, ta’ kacapo’ ka kapal se lebat, Marini nanges sambi aonga’ ka attas. Pola-pola gi’ badha kapal se lebat pole.

E settong are, baktona are gi’ ta’ dhapa’ pokol petto’, Marini se gi’ li’-guli’an e kamarra abaladhas jaga ngedhing  monyena kapal se ce’ ranyengnga. Dhari kamarra Marini buru entar ka taneyan, aonga’ ngabas kapal. Marini takerjat tor senneng nangale kapal ce’ mandhappa. Marini talebat senneng. Dhari sakeng sennengnga Marini akowak ce’ santa’na, ”Kapal, kapal, sengko’ menta’a pessena.”

Gun sabban pokol petto’ jareya baktona Marini amaen e lowar kamarra, amaen e taneyan ka’-berka’, ban rak-orakan. Marena jareya, bila kapal la jau, Marini pas eolok mon ebu’na esoro mandhi se mangkata asakola. Dhatengnga asakola Marini pas masok ka kamarra pole, amaen kadibi’an ban en-maenan se la emelleyagi mon reng seppona e sar-pasar.

Marini ta’ seggut amaenan ban ca-kancana, asabab la bannya’ en-maenan se canggih neng romana. Marini tamaso’ na’-kana’ se reng towana kacokopan. Ebu’na dokter ban bapa’na pilot. Areya alasanna Marini ma’ bisa lebur ngabas kapal se lebat. Bila Marini ngabas dha’ attas ka kapal, Marini ngarep bisa nangale bapa’na. Bila Marini aorak ka kapal, Marini ngarep bapa’na ngedhing ka sowarana. Marini jugan lako ngarep bapa’na ngajak nompa’ kapal. Tape palangnga Marini, bapa’na lako ta’ mole asabab emo’ neng e panerbangan. Ce’ terrona Marini se tatemmowa, apangrasa kerrong sara. Biyasana tekka’a paraiyan, bapa’na ta’ le-mole, bannya’ kalakowan. Marini ban ebu’na pajat ta’ tao apa se ekalako bapa’na e dhissa’.

Tape ontongga Marini andhi’ ebu’ se genna ban esto dha’ anak. Tekka’a sibu’ banya’ pasien neng e roma sake’, Ebu’na tak pernah loppa dha’ Marini. Ebu’na paggun mole ka romana tekka’ la kadang taker tengnga malem. Ebu’na ta’ pernah tega adhina Marini sampe’ saare samalem, apa pole pas matedung Marini kadhibi’an e dhalem kamar.

Marini se gi’ kene’ ongguna la ngarte ja’ oreng towana tak pate badha e romana polana alako kaangguy biayana odhi’na. Tape tekka’ la ekoca’ ngarte, kadhang Marini apangrasa ta’ kaurus, bilebbi bila Marini ngakana, marini lako ngakan kadibi’. Padahal, Marini ce’ terrona ngakan abareng reng seppona ban sambi edulang. Ban pole, Marini apangrasa ebu’na reya oreng jauh, tak toman tor catoran, tak toman aja’ gaja’an, pokokna Marini apangrasa asing dha’ ebu’na dhibi’. Tak getton saongguna mon Marini apangrasa tak akrab ban ebu’na, jareng ebu’na kadang mangkat ka roma sake’ sabelunna Marini jaga dhari tedung, ban mole ka romana bila Marini la tedung, daddi Marini ban ebu’na tak pate tatemmo.

Ontongnga, Marini ta’ daddi na’-kana’ se cengkal padhana na’-kana’ laen se ta’ pate eladin mon reng towana dibi’. Pangladinna Marini se anyama Rukiyah aropa’agi babine’ se penter dhalem ajaga ana’, saengga Marini daddi na’-kana’ se toro’ oca’ ban ta’ marengsa. Marini ta’ toman menta rang-barang se talebat larang. Marini tao ja’ nyare pesse areya ta’ gampang. Marini tao keya ja’ mon odhi’ areya ta’ olle bong-sombong. Sapa pole se ngajari tengka nga’ jareya mon ta’ Rukiyah. Marini la nganggep Rukiyah jareya akadiya reng seppona dibi’. Dhari Rukiyah, Marini ngarte, ja’ saongguna tadha’ gunana sombong, pera’ marekong.

***

Sonarra mata are ngombar dhari candilana kamarra Marini. Marini akaleya’, atena bunga polana bakto dhapa’ pole ka pokol petto’. Padhana biyasa, Marini lako senneng bila la jaga tedhung, enga’ ka kapal se bakal lebat.

Nalekana monyena kapal la ekaedhing dhari jauna, Marini pas berka’, aonga’ terro nangaleya kapal se lebat. Monggu Marini, ngabas kapal aropa’agi en-maenan se paleng lebur. Marini apangrasa ta’ toman busen ngabas kapal tor aorak menta’a pessena dha’ kapal jareya. Tape mon dha’ barang-barang elektronik se daddi kancana e sabban arena, Marini la abit apangrasa busen polana taker seggut.

Dhapa’ ka tengngana taneyan Marini onga’. Ngabas dha’ kapal se lebat e attassa romana. E dhalem atena Marini nyangka, ja’ e dhalem kapal se lebat jareya badha bapa’na se ta’ toman mole.

”Menta’a pessena, Kapal!” Sowarana Marini eparanyeng ma’ olle ekaedhing mon bapa’na se badha e dhalem kapal se la sajan jau dhari pangabasanna.

Kapal se eabas la sajan jau, atena Marini apangrasa ketter. ”Dhu, Bapa’. Bila sampeyan se palemana?” Serrona e dhalem ate.

”Se mandhiya, Marini, la aban reya,” padhana biyasa, ebu’na se la ranta se mangkata ka roma sake’ ngolok Marini dhari dhalem kamarra.

”Enggi, Ebu’,” sambi ajalan lesso Marini ngala’ paralatanna mandhi. Sateya la baktona Marini mangkat asakola.

Mon esoro asakola, Marini pajat ta’ toman tomos, Marini tamaso’ dha’ ka na’-kana’ se bajeng tor penter. Sateya Marini la toju’ e bangku kellas ennem. La kare nem bulan laggi’ se lulusa. Dhari lamba’ gi’ TK, Marini la ngenneng rangking settong, la banynya’ pialana e attas lamarina. Saban olle piala lantaran enneng lomba otaba enneng rangking, Marini lako enga’ ka bapa’na.

”Ce’ terrona badan kaula maonenga piala neka ka bapa’, Bi’,” oca’na setttong bakto ka pangladinna. Tapi se anyama pangaterro gun kare pangaterro, bapa’na ta’ toman mole.

Sakadhang Marini apangrasa ta’ andhi’ reng seppo lantaran reng seppona lako ta’ pate ngurus. Tape onggu ontong raja, kakaceba’anna Marini dha’ tengka lakona reng seppona ta’ elampeyasagi dha’ kalakowan juba’ akadiya na’-kana’ kabannya’an.

Kakaceba’anna Marini dha’ reng seppona kadhang daddi inspirasi kaangguy noles puisi. Pa’ Paosi, guru basa Indonesiana toman ngajari Marini noles puisi. Pas jareya epadaddi bur-leburanna Marini nalekana seddhi. Puisina Marini gus-bagus, mangkana mon Pa’ Paosi pas ekerem ka korran Radar Madura. Minggu bilan puisina Marini emuat. Tape emanna ebu’ ban bapa’na ta’ tao.

***

Ja’ senga’a tao ka kadaddiyan se sangguna, Marini ta’ kera apangrasa bapa’na ta’ enga’ ban ta’ ngurusa aba’na. Bapa’na Marini banne lalake’ se ta’ lebur mole ka roma. Gi’ lamba’, sabellunna kadaddiyan e are Satto tanggal petto’ Rejjab rowa, bapa’na Marini seggut mole sabban minggu sakaleyan. Tape, takdir dhari Se Kobasa, bapa’na Marini calaka.

E are Satto rowa langnge’ petteng calemotan, kelap dhar-ngajendhar. Molae malemma ojan toron ta’ bu-ambu, buru ambu gi’ gella’ pokol dhuwa’an. Teppa’ bakto pokol petto’ e attas genteng kapal lebat, yu’-liyu’an ka kangan ka kacer, monyena laen, ta’ padhana biyasana. Ebu’na Marini gun bisa adhu’a ban nanges. Ngarep ka Se Kobasa lakena mandar epasalemetta. Tape sapa se bisa nyegga ajal, kapal se etompa’ bapa’na Marini gaggar.

E bakto kadaddiyan jarowa, Marini gi’ kene’, gi’ ta’ asakola kana. ”Marini panyengga ka romana tatangga lu,” oca’na oreng se ta’ tao sapa nyamana.

”Iya teppa’, Le’. Mara duli panyengga, ja’ pangabas ka mayyitta bapa’na. Neser.”

Marini epanyengga ka romana Sahna. Ta’ epatao ka mayyitta bapa’na.


*A
*)Santre SMA 3 Sabajarin Lu’-Gulu’ tor angguta Café Latte 52 Latee 1.
*Sumber:https://radarmadura.jawapos.com/read/2019/04/01/129003/owa-kapal

No comments:

Post a Comment