Wednesday, 9 October 2019

Bine Dunnya Akherat

Bine Dunnya Akherat


MALEM se lanjang nyakse’e odhi’na Rasid e pondhuk. Are se tera’ daddi sakse pangaterro rajana se alowap lantaran bakte. Pello nyapcap tadha’ se tao, salaenna Rasid ban angen se ngalesser sabban are.

”Rasid!”

”Apa, Mud?” Rasid atanya sambi marongo’.

”Tennang, Ke’. Sengko’ andhi’ kabar,” sambi mesem-mesem, Mahmud neggu’ ka bauna Rasid. Marongo’na Rasid sajan daddi. Mowana se celleng atamba petteng.

”Ba... patenang, Abang Ocid. Ya’!” tanangnga Mahmud ajuluwagi korran. Mahmud asandhakep. Mesemma tenggi salaja.

”Alhamdulillah. Ongguwan reya, Mud?” oca’na Rasid talebat kasambu’. Mahmud egellu’.

”Masyaallah, sengko’ ereken tokang co-ngocowan ban ba’na?” Mahmud so’-mangoso’ sambi apek-kepek.

Samarena olle kabar dhari Mahmud, puisina ngombar neng korran, Rasid bangal kaangguy ngabala dha’ oreng towana ja’ aba’na lakar lebur ban andhi’ kamampowan noles.

Laggu’ keremanna Rasid. Pangaterro kaangguy ngabala sajan raja. Rasid aberri’ tao ka Mahmud ja’ aba’na bakal matao korran se badha tolesanna, ma’le daddi bukte.

”Ba’na reya lakar pantes daddi panyair, Sid,” oca’na Mahmud nambai yakin dha’ Rasid.

Rasid gun sem-mesem. Mowana sakone’ mendhar.

***

Samarena jama’ah Isya’, pondhugga Rasid biyasa badha pamaosan salawat se eseppowe katowa pangurus. Tape Rasid izin kaangguy entar ka jeddhing. Tabu’na talebat sake’.

Napa’ ka jeddhing, Rasid ta’ duli akopadhang. Lantaran ngantos giliran se abak lanjang. Rasid ngantos sambi aseng-geliseng. Onggu ce’ sake’na tabu’na Rasid.

”Siyah, panyair padha tao ke’ tabu’ keya!” Toto co-ngoco Rasid se mella’ meddem ja-ngaja sake’na.

”Ta’ olle sarombanan acaca ba’na, To,” Suki nyaot abela Rasid. Rasid ta’ ngeddhebbi kancana.

”Ba’na kare, Sid!” Kancana ngolok Rasid. Rasid ajalan sambi neggu’ tabu’na.

”To, menta’a sabunna,” Toto langsung magi sabun Giv cair barna pote ka Rasid.

Rasid gi’ sempat mesem lantaran tanangnga neggu’ sabunna Toto. E pekkeranna Rasid, sabun Giv rowa, sabunna babine’.

Pamaosan solawat la emolae. Pengurus ajajar ngantos santre. Santre se enga’ apa? Banni se genteng, banni se pote tor banni se sogi bannya’ pesse. Tape santre se terlambat kalaban alasan se ta’ kenneng pele dhari sakeng bannya’na.

”Pak, kaula buru datang dhari jedding,” Rasid ngabala ko’-tako’. Pangurus e adha’na Rasid coma mesem tanggung. Pa’ Syakur nyamana.

”Ongguwan kaula, Pa’,” Rasid ngoca’ pole.

”Iya, Sid,” mesemma ta’ gung-nanggung pole. Amarga pornama tadha’ tandhinganna.

Rasid maso’ ka masjid kalaban rassa bunga lowar biyasa. Sataona Rasid, Pa’ Syakur ta’ toman mesem. Daddi pangurus kaamanan banne alasan otama kaangguy ta’ mesem. Sabab sataona Rasid, mesem reya raja ganjaranna, tamaso’ asadaka.

Pokol satengnga settong, Rasid ban Mahmud ta’ tedhung. Rasid mare acareta kadaddiyan se ban Pa’ Syakur. Mahmud ta’ mare kasambu’. Se kadhuwa terro taowa, arapa, asabab apa, Pa’ Syakur mo-temmo mesem.

”Sid, mayu’ nyare tao, arapa Pa’ Syakur temmo mesem,” Mahmud ngajak ka Rasid.

”Maske sengko’ lakar padha terro taowa, tape arassa cangkolang, wa.”

”Cangkolang dha’ramma?”

”Pa’ Syakur pangurus kaamanan se ekasengkae ban tre-santre. Pole mon pas tolos nyare tao, tako’ etemmo moso Pa’ Syakur. Sengka sengko’, pas, Mud,” oca’na Rasid sambi ngabas ka langnge’.

Mahmud gu’-onggu’an.

***

”Assalamualaikum.”

”Ba... ajunan, Pa’? Ngereng longgu,” Mahmud ngatore eppa’na Rasid kaangguy toju’ ka dhalem kamarra.

”Edhimma Rasid, Cong?” eppa’na Rasid atanya sambi makalowar roko’ ban kore’.

”Badha e masjid. Mangken dhimin e koneyana,” Mahmud kalowar nojju ka masjid.

Dhari jauna, Mahmud bisa nangale ka Rasid se tedhung.

”Sid. Rasid. Jaga, eppa’na la badha e kamar,” Mahmud mokol pokangnga Rasid. Rasid coma akaleya’.

Korran se epadaddi bantal langsung etaja’ ban Mahmud. Caremmet e atena Mahmud sajan ngalkal. Rasid ta’ duli jaga.

”Rasid, ba’na can abarri’a tao korran reya ka eppa’na?” Mahmud toju’ e seddi’na Rasid.

Rasid abaladhas sambi ngosot cetakka. Matana gi’ meddem. Mahmud jaga naja’ tanangnga Rasid. Dhapa’ ka kamarra, Rasid asalaman ka eppa’na.

”Ka’emma emma’?”

”Emma’na long-nolonge kona Bi’ Tuti’na.”

”Sengko’ gun epangebai bulut moso emma’na,” eppa’na Rasid makalowar sapalastik celleng aesse bulut.

Rasid asemmo tako’ se ngabala’a ka eppa’na. Tape Rasid mekker pole, mon pas tolos ta’ ekabala, ya tolos Rasid ta’ olle akulia ka Jogja.

”Mon tolesanna ba’na maso’ ka korran, kuliana olle ka Jogja,” Rasid ce’ enga’na ka dhabuna eppa’na bakto Rasid ngabala ja’ aba’na terro nerrosagi kuliana ka Jogja. Sateya kasempatan raja ka Rasid.

”Pa’, neka’.” Rasid magi korran ka eppa’na.

Korran ekala’, epandeng. Eppa’na Rasid mesem. Tanangnga neggu’ cetakka Rasid.

”Korrana egiba’a mole, ya? Epataowa ka emma’na.” Eppa’na Rasid jaga, langsung nyalame ana’na ban Mahmud. Teros mole. Rasid asojud sokkor. Mahmud ngarembeng terro nangesa.

Mahmud lakar ta’ kabater mon Rasid akulia ka Jogja. Polana mon Rasid olle ka Jogja, Mahmud paste ngaolle izin dhari rama ebuna.

”Mud, ba’na ban bulut reya daddi sakse ollena sengko’ akulia ka Jogja. Melana dhari jareya, mara ngakan bulut areng-bareng,” Rasid nanges sambi ngompa’ bulut. Aeng matana ngababa.

Sanyatana, Mahmud padha terro nangesa. Tape ma’le ta’ sajan namba talka se acampor bunga, Mahmud agella’ sambi kantha neggu’ tabu’na.

Ba’na nanges sengko’ tambana, Sid. Ba’na tang taretan, Sid. Oca’ Mahmud dalam atena.

***

Rasid mole ka romana. Mahmud aromasa talka polana tadha’ kancana.

Are Sennen pokol petto’, acara kabinan bakal emolae. Rasid napa’ ka romana are Ahad para’ maghrib. Emma’na Rasid matabar se ngakana, Rasid ta’ endha’ lantaran tadha’ kancana. Pabannya’e juko’na, panyamane la’-ola’anna, mon ngakan tadha’ kancana laju ta’ arassa ne’matta. Jareya Rasid.

Adan sobbu, Rasid ajama’a ka masjid.

Samolena dhari masjid, Rasid nyepper ka romana Bi’ Tuti’-na. Arassa ta’ nyaman mon tadha’ nyongopa sakale.

Terop barna mera ban biru. Ter-kaleter barna koneng, biru ngodha, pote tolang, agantong nandhai roma se badha acara pakabinan.

”Ba’na, Cong? Toju’-toju’.”  Bi’ Tuti’ buru kalowar dhari dhapor.

”Kaemma Yu Susi, Bi’?” Rasid atanya.

”Badha e dhalem. Antos gi’ eoloka,” Bi’ Tuti’ maso’ ka romana.

Yu Susi kalowar. Mesemma anandhai ja’ aba’na ce’ bungana. Rasid mesem keya.

”Yu, sapa nyamana se lalake’? Oreng dhimma?” Rasid langsung atanya.

Mesemma Yu Susi adaddiyagi pepena mera ta’ ro-karoan.

***

Kasambu’ Rasid nangale mantan lake’ se kalowar dhari motor. Amargha ecapo’ tappor kelap badhanna Rasid kako sakokakona.

Mantan lake’ jareya mesem ka Rasid. Mesemma keamanan, Pak Syakur.

Rasid asalaman ka Pak Syakur.

"Ta’ nyangka kaula ka sampeyan, Pak” Rasid ato’-koto’ ka Pak Syakur.

Pak Syakur coma mesem.

Acara pakabinan emolai. Akad nikana epimpin pa’kae pondhuk. Rasid paggun kasambu’. Ce’ kaburuna se ngabala'a ka Mahmud.

E are jareya, marena bajhang asar, Rasid amit ka eppa’ ban emma’na. Amit ka angghuy abali lagghu’ samarena duhur.

***

”Sid, jaga!” Eppa’na mokol pokanga Rasid ce’ kajana.

”Bada ponapa, Pa’?” Rasid jaga eja-kaja sambi ngosso pokangan se sake’.

”Yu Susi-na etemmo kalengnger samarena abajang Sobbu. Maju duli! Sengko’ mangkata ban emma’na. Mon jat abarengnga, duliyan. Pasang kalambina,” eppa’na Rasid kalowar. Rasid cengngeng. Atena seyal.

Eppa’na Rasid agunjing emma’na, Rasid kadibi’an nompa’ sapedha.

Dhapa’ ka romana Bi’ Tuti’-na, aeng matana Rasid ngambang akaton malarat se etamba’a. Matana Rasid emo’ nyare Pa’ Syakur. Baramma talkana Pa’ Syakur nangale binena kalengnger.

Yu Susi epatedhung neng langgar. E karobung oreng maca Sorat Yasin. Rasid nangale Pa’ Syakur badha eseddi’na Yu Susi sambi ngaji, sambi nanges. Ta’ mekker lanjang, Rasid langsung ajalan e bannya’na oreng kaangguy badha eseddi’na Pa’ Syakur.

Rasid neggu’ bauna Pa’ Syakur. Pa’ Syakur atole sambi neggu’ serret ka tanangnga Rasid.

Ke Sodri, pottrana guru alip sabadhana masyarakat roma badha e seddi’na Yu Susi keya. Omorra lebbi seppo katembang eppa’na Rasid. Sowarana ta’ kala ranyeng dhari reng-oreng se laen.

”Innalillahi wainna ilaihi roji’un...” Ke Sodri ngosap mowana Yu Susi se nyonar.

Pa’ Syakur sajan serret neggu’ tanangnga Rasid. Rasid nanges, Pa’ Syakur sajan ngejjel.

”Sid, Yu Susina tadha’ la,” oca’a Pa’ Syakur ka kopengnga Rasid.

”Pasabbar, Pa.”

”Maske la mate Yu Susi-na, ba’na paggun ekabineya. Bine dunnya akhirat,” sowarana Pa’ Syakur nyolek atena Rasid. Rassa neser atompo’ e dhadhana Rasid.

Mahmud segunen ngaedhing caretana Rasid. Ta’ re-mare aeng matana kalowar agabay bacca ka kalambina Mahmud. Saongguna, Rasid terro nganca’ana Pak Syakur. Tape Rasid kadhung ajanji ka Mahmud kaangguy duli abali.


*)Ramlah Qusyairi, santre Madrasa Aliyah 1 Annuqayah Pottre Lu’-Gulu’ jurusan Elmo Agama tor daddi anggutana Cafee Latte 52, Latee 1.

*Carpan Paneka emuat e Radar Madura e tanggal 06 Oktober 2019 (https://radarmadura.jawapos.com/read/2019/10/06/159384/bine-dunnya-akherat)

*Keterangan Gambar: Lukisan Hidayat Raharja berjudul Makam Raja Sumenep, tinta di atas kertas 30 x 42 sentimeter, 2017. (RadarMadura.id)

No comments:

Post a Comment