Sape Korban

 

TELLASAN Idul Adha gi’ korang satengnga bulan. Tape e Pasar Keppo ampon ramme oreng ajuwal sape korban.

Ta’ biyasana Pasar Keppo talebat ramme enga’ samangken. Argana sape pon acem-macem. Badha se Rp 5 juta sampe’ ka bellasan juta. Argana sape se ejuwal e sar-pasar, husussepon Pasar Keppo, padha ongga sadaja. Se biyasana sape ejuwal Rp 7 juta ongga ka Rp 8 juta.

Are-are ngadhebbi Tellasan Idul Adha paneka onggu neng-sennengnga dagangnga keban korban. Bi-lebbi dagangnga sape. Dagangnga sape se dhari ban-sabban kottha padha badha e Pasar Keppo. Pasarra sape se ampon kalonta e Kottha Pamekasan.

E are Salasa ka’dhissa’ bannya’ dagang masarragi sapena. Tamaso’ jugan Matra’ie, dagangnga sape e Disa Camplong, Pamekasan, se ampon ekennal sareng masyarakatta. Bannya’ oreng e Disa Camplong nyoro melleyagi sape ka Matra’ie.

E bakto ganeka jugan Matra’ie padha adagangngagi sapena se gun ngeba dhupasang. Sape se dhupasang neka ampon etabar sareng Ji Sulaiman Rp 6,5 juta tong-settongnga.

”Ka’ Mat, sape se epangger e seddi’na kan pao ganeka etabar saponapa?” ca’na anomma kaula ka Matra’ie.

”Arowa la etabar Rp 6,5 juta ban Ji Sulaiman. Arapa keng? Ba’na melleya sape ya?”

”Enggi,” ca’na anom sambi metong obangnga se badha e dhalem dompetta.

”O....ya mon melleya sape ba’na, Le, ja’ sateya polana sateya areya la som-osomma larangnga sape. Mon gun eowana dina melle la-bila ban engko’ pole.”

”Bunten, Ka’, kaula melleya sape kaangguy ekorbanagina dha’ ka Masjid Siratal Mustaqim e Lao’ Nangger ka’dhissa’.

”O..iya nyaman melle sateya, dhaggi’ pas owan e romana ba’en gallu.”

”Enggi, Ka’, ban pole kaula samangken nyo’ona tolong nyareyagi sape se dheng-seddheng kaangguy ekakorban tor argana se eppassa. Ta’ rang-larang gallu’,” ca’na Nom Sofyan ka Matra’ie se gi’ nantos balina Ji Sulaiman.

Ta’ abit dhari ganeka, Ji Sulaiman ngadhep pole ka Matra’ie. Ji Sulaiman sambi ngeba pessena se ebaddhai toples barna koneng konye’. Pas magi pessena se Rp 17 juta ka Matra’ie.

”Neka’, Mat, obangnga,” ca’na Ji Sulaiman sambi nyoro na’-kana’ kaangguy ngeba sapena se dhupasang gella’.

Matra’ie se ampon ekoca’ cakang nyare sape se bagus tor argana se eppas, nabarragi sapena Nom Sofyan ka padha dagangnga.

Are ampon panas akadiya panassa mardha se gi’ buru mate dhari apoyya. Tabu’na kaula ampon amonye rot-cerrotan. Namong Nom Sofyan gi’ ta’ manggi se cocok tora ka sape se enyareyagi Matra’ie.

”Dhu, tore, Nom Yan, masa’ se etabar Ka’ Matra’ie gella’ pas tadha’ se cocoka?” ca’na kaula ka Nom Sofyan.

”Banne keng ta’ cocok, Cong. Keng ta’ eppas ka pesse se esambi sengko’. Engko’ ya’ gun ngeba Rp 6 juta. Molae gella’ se ebar-tabar ban Ka’ Mat dha’ attas enam. Ta’ enggi, Ka’ Mat?” ca’na Nom Sofyan ka kaula ban Matra’ie sambi ta’-careta’an se gi’ ambu dhari lesso.

Saellana mamare lesso, kaula, Nom Sofyan, ban Matra’ie nerrossagi nyare sape se ga-arga Rp 6 juta. Jam para’ kol dhubellasa. Tape Nom Sofyan gi’ paggun ta’ nemmo se cocok.

”Mat, Mat, ca’na ba’na melleya sape? Iya’ badha sape ebagiya lema’ satengnga. Dha’ramma, ekala’a? Mon ta’ ekala’a dina engko’ se ngala’a,” ca’na kanca dagangnga Matra’ie.

”Badha edhimma sapena sateya?” Matra’ie nyambidi Buyan, kanca dagangnga gella’.

”Badha edhissa’. Mayu entare congngo’. Pola me’ cocok. Tape mon ca’na engko’, nyaman.”

Kaula, Matra’ie, ban Nom Sofyan laju entar dha’ ka sapena. Sape se epatabar lema’ satengnga jareya epangadhep ka lao’. Cethakka gu’-onggu’an enga’ sape sono’ se parappa’na epajang.

”Sape neka cocok onggu, Nom, kaangguy ekakorban. Sape neka lempo. Tantona manabi esambelli bannya’ dagingnga,” ca’na kaula ka Nom Sofyan se gi’ ker-mekker.

Ta’ mekker lanjang, Nom Sofyan laju makalowar pessena dhari kapeng calanana se badha saleretta.

”Enggi pon, Ka’ Mat, ngobange neka saos. Tape, tanya’agi pole, Ka’, pola me’ bisa etabar lema’,” ca’na Nom Sofyan ka Matra’ie.

”Argana sape neka pon eppas, Le’, bula ta’ amaen arga karana neka are pon beddhuk,” dagangnga sape ka’ dhissa’ se tangedhing catorra Nom Sofyan sareng Matra’ie laju ngocak ja’ argana pon eppas. Ta’ bisa etabar pole.

Samarena madaddi ban majar, Nom Sofyan laju maongga sapena ka atas bikep barna pote andhi’na Matra’ie. Sape se ampon epaongga ka bikep ekeba Matra’ie ka romana Nom Sofyan se gun aella’ sameter dhari romana Matra’ie.

Satengnga are ampon lebat, Nom Sofyan gi’ buru olle sape bagus se eppas argana kaangguy ekakorban. Kaula se noro’ nyareyagi arassa lapar. Tabu’ pon acang-karoncangan padha ban monyena saronen se etope.

”Mang, mayu ngakan gallu sabellunna mole ka roma. Engko’ ya’ la arassa lapar.”

Kaula se molae gella’ nantos Nom Sofyan matabar ngakan senneng talebat senneng karana molae gu-laggu ta nyegga gallu sabelluna mangkat ka Pasar Keppo.

”Ngobangana ka’ emma, Nom?”

”Melle e barungnga Buk Cepot nyamanan. Nase’na olle bannya’ ban modha.”

”Sanapa biyasana?”

”Paleng la Rp 5.000.”

”Tore. Neka’ kaula pon lapar.”

***

Samarena ngobange nase’ e barungnga Buk Cepot, kaula, Nom Sofyan mole ka roma. Dhapa’ ka roma, Nom Sofyan etanya’agi sareng tatangga polana nemmo sape se tamaso’ modha.

”Yan, nemmo edhimma sape reya ba’na? Banne som-osomma sape larang sateya?” ca’epon Ma’ Nyae ka Nom Sofyan.

”Enggi, larang manabi sape samangken. Namong, badha oreng se apareng arga saneka karana buto obang tor oreng neka kennalanna ka’ Matra’ie.” Jawabba Nom Sofyan dha’ ka Ma’ Nyae.

Sape se gella’ olle dhari pasar gi’ epajang e adha’na roma. Korang dhubellas are pole sape reya bakal ekorbannagi dha’ ka Masjid Siratal Mustaqim. Masjid se badha e lao’na roma. (*)

 

*) Amirul Muttaqin. babbar e Pamekasan. Saamponna ngaji tor daddi mahasiswa Tatakrama Instika Guluk-Guluk tawon 2014, saterrossa molang pangajaran basa Inggris e Pondhuk Annuqayah Latee, Lu'-Gulu', Sumenep.

*Carpan kasebbut jugan emuat e JP Radar Madura e are Ahad, 04 Semtember 2016.

*Carpan kasebbut jugan akompol dhalem buku Tora Satengkes Carpan Madura, 2017.