Naleka Sabbar Abuwa Jembar
BILA bula nelektegi bulan e malem se petteng, ate jembar. Bibir mesem sakale ngadha’ ta’ nambu badha se lebur. Sabab, sampornana bulan e malem ganeko adina careta se sanget lanjang.
Saparte biyasana, bula bareng Riya ajalan kaangguy mangkat dha’ kampus. Bula ban Riya ampon padhana sataretan molae gi’ kene’. Kantos sanonto paggun lako abareng. Molae dhari amaen, asakola, sampe’ akuliya paggun lako areng-bareng.
E settong bakto, bula olle sorat dhari sala settong kanca MA, dullu. Namong, sorat ganeko napa’ dha’ bula kalaban lebat Riya se nerragi dha’ bula.

 Assalamu alaikum warahmatullahi wabarakatuh
Sabellunna, bula nyo’on sapora manabi kalaban dhatengnga sorat neko nambai kaemo’an dhalem lakona dika.
Le’ Afi, manabi bula olle jujur, dhari lamba’ kantos sanonto, tadha’ se mampo namen tatombuwan se abuwa taresna. Namong robana dika se terros amo’-ramo’ neng e atena bula. Bula ta’ ngarte dha’ pekkeran se terros agumantong dha’ dika.
Le’ Afi, bula ta’ maksa’a dha’ pekkeranna dika kodu mekkere taresnana bula. Namong, terrona bula gun dika olle tao ja’ saongguna molae dullu bula pon nyaba’ bibit taresna dha’ dika.
Le’ Afi, bula paggun ngantos ban ngarep dha’ jawabanna dika.
Wassalamu alaikum warahmatullahi wabarakatuh
Oreng se ta’ andhi’ malo,
(Sofyan Habibi)

 Saka’dhinto salembar sorat se etarema bula.
Sajjegga bula lastare maca sorat se ekerem Abi lebat Riya, badan bula gumigil, agetter. Sabab, saongguna bula ampon ngarep badhana sorat dhari Abi. Bula talebat bunga. Bungana bula senneng. Nyatana taresna bula dha’ Abi ta’ akantha aeng gaggar ka dhaun tales.
Ta’ parcoma bula akaca tor aparas sabban atemmowa ban ca-kanca, husussa Abi. Bula laju males kalaban salembar sorat.

 Assalamu alaikum warahmatullahi wabarakatuh
Ka’ Abi, manabi badan kaula jugan olle jujur, ja’ saongguna kaula neko badha se andhi’. Daddi ta’ kera badan kaula motossagi kalaban karebba badan kaula dibi’.
Ka’ Abi, badan kaula nyo’ona sapora manabi nyeddhek sampeyan kaangguy rabu tor alenggi dha’ compo’na badan kaula, manabi sampeyan jat nyempen taresna se raja. Tantona sampeyan jugan ta’ kera gung-nanggung dhalem nerrossagiya. Sabab, manabi badan kaula dibi’ ampon ta’ bisa kaangguy nola’ sampeyan.
Ka’ Abi, badan kaula adhantosa rabuna sampeyan neng compo’na kaula.
Wassalamu alaikum warahmatullahi wabarakatuh
Se ngerem,
Afidah Najwa

Saminggu dhari bula se akerem sorat dha’ Abi, Abi ban reng seppo dhuwa’na rabu dha’ compo’na bula kaangguy macekka’ tale taresna. Ate bunga ta’ kappra. Mempe bula se molae atemmo ban Abi aherra daddi careta se bakal ta’ kera pegga’ pole.
”Assalamualaikum,” salam dhari keluarga-na Abi.
”Waalaikum salam,” jawabba rama se buru kalowar dhari langgar. Rama sareng ebu buru lastare asalat Isa’.
”Ngereng, ngereng eatore alonggu,” ebu ngatore tamoy. Oreng seppo dhuwa’na Abi alenggi neng kennengngan moy-tamoyan. Bula gun nalektegi dhuwa’ keluarga se sapartena adha-kandha ce’ parlona.
”Afi, Afi...” sowarana ebu. Bula laju nyander ka ajunanna ebu. Bula epareksane sareng ebu. Nape bula ampon kennal dha’ Abi. Bula gun bisa aonggu’. Sabab, bula ta’ kowat nyegga bungana ate.
Saenggana bula taker ta’ bisa makalowar sowara se sapartena manabi acaca cora’ bakal ngetter. Salastarena ka’dhinto bula epakon ngala’ kobi ka dhapor. Bula norodi dhabuna ebu. Kopi se ebaddhai cangker epakompol dhalem settong talam. Bila ranta pas eterragiya dha’ bakal mattowa se badha neng palemper.
”Ngereng eatore,” basa ka’dhinto se bisa kalowar dhari kebbi’ bibirra bula. Bakal mattowa bine’ ngesem sambi aonggu’.
”Iya kalangkong.”
Bula maso’ pole ka dhalem roma sambi’ nengteng talam. Dhalem ate bula dhek-jeddheggan. Tako’na bula, reng towa ta’ narema dha’ lamaranna Abi. Kalagguwanna bula edikane sareng rama tor ebu. Bula eparenge babulangan.
”Malemma, tamoy rowa banne tamoy ban-saromban. Jarowa dha’enna’ nyaba’ caca kaangguy menta ba’na daddi bakalla Abi. Ca’na, Abi jarowa kancana ba’na neng MA-na. Engko’ mabakalana’a ba’na poko’ ba’na badha janji ka engko’ ban ka atena ba’na dibi’, ja’ ba’na ta’ kera alecegi sapa’an. Ngarte?”
”Enggi,” bula ajawab sambi aonggu’ masteyagi.
Acara babakalan ampon lastare elaksana’agi molae dhari nyaba’ palotan kantos tongngebban kalaban samporna. Alhamdulillah...
***
Dhu taon bula ampon abakalan bareng Abi. E settong bakto ka’ Abi adhing-sandhing bareng bula.
”Le’ Afi, olle bula atanya dha’ dika? Tape, dika kodu jawab kalaban jujur ban dhari atena dika se paleng dhalem,” nya-tanyana ka’ Abi sapartena mengetek atena bula.
”Enggi, Ka’ Abi. Ngereng atanya’a ponapa enggi? Namong, kaula ajawaba manabi bisa ajawab,” kalaban sowara se sanget alos. Sabab, bula ce’ tako’na manabi sampe’ madaddi ngoso’na Ka’ Abi.
”Le’ Afi, ba’ rida’a dika mon saompamana badha reng laen pole e dhalem atena bula?” kalaban lancar Ka’ Abi atanya dha’ bula. Aeng mata gaggar ta’ ekarassa.
”Ka’ Abi, kaula paggun nanggama ponapa bai se bakal daddi kapotosanna sampeyan. Sabab, badan kaula gi’ ta’ andhi’ kowasa kaangguy alanglang sampeyan. Kaula gun bakalla sampeyan, banne binena. Maske pagi’ badan kaula daddi binena, kaula paggun abakteya. Bila sampeyan senneng, badan kaula jugan lebbi senneng. Badan kaula ampon ajanji dha’ aba’  dibi’ jugan dha’ oreng towa dhuwa’ kalaban asakse Guste Allah, bakal narema ponapa badhana dhari judhuna badan kaula. Jugan sabban badan kaula kan ampon ngoca’ Ka’ Abi, ponapa kakoranganna sampeyan ampon madaddi sampornana odhi’ kaula.”
”Le’ Afi, sajujurra bula sanonto bingong. Koduna sabban bula ta’ mele jalan lekkas kaangguy alamar dika. Sabab, kalaban badhana babakalan neko sajan nambai emo’na ate bula. E antarana kodu mele jalan mamare akuliya otabana mele jalan akabin ban dika. Estona dika, sabbarra dika, matagudha ate bula, Le’ Afi.”
Bula sem-mesem sambi alerek maba nyegga rassa todhus. Oca’na Ka’ Abi sajan nambai taresnana ate bula.
”Le’ Afi, bula gun bisa anyo’on dha’ Se Kobasa. Samoga matemmowa dhalem settong kaodhi’an dunnya kantos aherat.”
”Amin.”
Du’ana bula bareng Ka’ Abi mandar ecathetta sareng se nyerrat paste tor takdirra kaodhi’an. Amin ya robbal alamin. (*)

Tarate, Songennep, 2015-2016

*Uswatun Syarifah, Babar e Batopote, Sumenep tawon 1995, Mahasiswi se daddi Angguta Sanggar Semesta, Langgar Oretan, tor UKM Komunitas PELAR STIT Aqidah Usymuni Sumenep.
*Carpan eattas epetthek dhari Jawa Pos Radar Madura (JPRM) eccaban Ahad, 13 Maret 2016
*Carpan Kasebbut jugan akompol dhalem buku Tora Satengkes Carpan Madura (Hlm 325)