Sunday, 25 August 2019

Kompolan Naraka

KOMPOLAN NARAKA


BILA lebat e adha'na roma rowa ba'na paggun nemmone kaaneyan. Sabab, e bakto mare asar, na'-kana' ngodha lake'-bine' lako akompol e penggirra jalan, jalan se seppe bannya' ju-kajuwan lebba' dhaun ban kembangga sampe' abangon akantha pajung se manjeng. Jalan rowa ta' kose jau dhari tang roma se badha e jalan se kacer. Daddi ta' sala bila sengko' lako nangale kompolan na'-kana' ngodha rowa. Lake' ban babine' se ta' etemmo asalla dhari dhimma apolong lake'-bine' akantha andhi' hubungan se la essa dhari KUA.

Sengko' ta' tao arapa na'-kana' ngodha rowa perna neng penggirra jalan rowa. Ja' sakenga tao mon jalan rowa semma' ka pasareyan. Mo'-ngomo'an, ban kennengnganna pamowangan rombu dhi-budhi. Bau sarpa se acem-macem; palastik, popo'na baji', ban nase' baruy se la ta' etemmo olle barampa are asaloy daddi settong, saengga bauna nyengnga' ta' kappra sampe' ta' sakone' oreng lebat ngangguy masker. Tape gettonna, na-kana' rowa paggun perna neng kennengngan se nga' rowa? Me' pola napsona la notope lobang elongnga. saengga bau se nyengga' nga' rowa ta' ekedhing ban elongnga.

Dhang-kadhang sengko' entar keya ka kennengngan rowa, ta' kose ce' semma'na polana tang elong ta' kellar ka bauna. E dhissa' lake'-bine' apolong tadha' batessa, abasanna padha ban bilis se buru kalowar dhari lobangnga. Mangkana na'-kana' ngodha rowa badha se asarongan, songko' ban kodhung-asamperan. Badha se acalana'an serret, pandha' tor badha keya se gun alabbaran enga' pamaenna ebbal. Tape sayangnga, se akodhungan badha bai se gi' acalana'an serret, agabay mata eman mon ta' eabasa.

Sapaddhangnga sengko' na' kana' ngodha rowa badha se tojhu' e sapedhana, ajarukkong, nyantai kantha ta' andhi' otang. Tape bannya'an babine'na se toju' e attas sapedhana. Ta' sakone' keya se amaen hape emo' kadibi'. Bakto nangale nga' jareya, sengko' agella', sabab se kadibi' artena ta' andhi' pacar, ta' tao keya apa keng ta' paju otaba lakar gi' nyare, sa-kone' neser keya sengko'.

Mangkana se kadibi' rowa gaya, gaul gi' ngangguy sarong asongko' celleng. Tape baramma pole je' la ta'dhirra se kobasa. E bakto jerowa Sengko' langsung nyalke' ja' kennengan rowa tempatta katemmuwan na'-kana' ngodha. Tape Sengko' ta' yakin keya ja' kennengan rowa bannya' ej-jina.

Sengko' ngabas pamandhangan reya ta' semma', jahu tape jellas. Sampe'-sampe' sengko' nangale kanca pondhuk otaba lebbi eppassa alumni e tang pondhu'. Sengko' ce' terrona nyapa'a, tape sengka la agellu' badan, ban se entara tako' etangale tatangga se lebat ta' tao entara dha'emma, dhaggi' laju e ka-bala ka tang reng towa, polana apolong bi' kanca se nga' rowa ban ta' tao asalla dhari dhimma, sengko' dhapa' karoma dhaddhi buwana bibir. Todhus sengko' ban tang reng towa apapole. Saongguna Sengko' kacapo' mekker. baramma mon pas ana'na se gi' mondhuk reya la apolong bi' na'-kana' ngodha se nga' rowa? Pekker sengko'sambi agaru' cethak se ta' gatel.

Biyasana na'-kana' ngodha rowa mon abit apolong gu'-teggu'an tanang sambi apoto, agaya dhuwa' garigi'. Na'-kana' ngodha rowa sengko' nebbak sala settongnga alumni pondhuk. Sengko' yakin mon parkara reya, polana badha se asongko'an.

"Hey, ngano apa ba'na?" oca' oreng dhari budhina sengko' sambi neppak tang bau, Sengko' langsung atole, ngabas sapa e budhina sengko'.

"Ma' ba'na, Ver? Adha' ta' ngano apa, gun ngabas na'-kana' ngodha rowa." jawab sengko' sambi mesem ngabas Very.

"Arapa ma' ta' eentare bai ka dhassa'? Pole la' dhissa' badha kancana ba'na keya, katon,"
tamba Very sambi nodhing ka kompolan na'-kana' ngodha rowa. Sengko' gun aonggu' ngarte apa se ekamaksod Very.

Sengko' kennal ka Very molae gi' MTs. Very saongguna oreng Jember, tape ngalle ka eddi'na tang roma, eppas temorra babana bungkana rambutan. Sengko' ta' tao panyababba ma' bisa ngalle ka tang disa. Tape sengko' t a' mekker ka la'dhissa', se panteng andhi' kanca anyar.

Very toman mondhuk keya oca'na settong bakto acareta ka sengko'. Dhalem ate sengko' terro nya' - tanya'a ka Very. Terro taowa pendapatta kadaddiyan e bakto sore reya.

"Ver, Sengko' terro nya'-tanya'a ka ba'na."

"Atanya'a apa keng?" balessa Very.

"Baramma pendapatta ba'na mon na'-kana' ngodha lake' bine' rowa apolong, badha se akodhung ban enja' badha se asarongn ban enja'?" tanya sengko' lanjang sambi nuding ka na'-kana' rowa.

"Ya saongguna sengko' caremmet keya. Tape keng baramma pole. Sengko' kan ngodha keya. paste e dhi-budhina are sengko' paggun ngalakone nga' rowa keya. Tape sengko' apangrasa ban tao ja' arowa kalakowan se ta' bagus," jawabba Very lanjang. Sengko' ngarte apa se ekacaca Very.

"Bararti ba'na ngaolleyagi bai polana ngabas omor ban ne ngabas akhlak ya?" nyalko' sengko'.

"Ye banne nga' jareya keya. Sengko' kan polana ngodha se alanglanga tako'. Polana ta' tao kan ja' napso areya ebaddhai ngangguy baddha se pan-mapan. Contona nga' rowa," balas Very sambi nudhing pole. Iya keya mon polana ya. Sengko' alanglanga tako' e dhi budhina are sengko' ngala kone keya. Pekker sengko'.

"Ya dina la mon nga' jareya. Sengko' kan ta' bisa ngalakone apa keya tekka'a elang-langa ta' kera bisa keya," Very gun agella', mesem ta' tao apa se lebur.

Molae dhari bakto jarowa sengko' apangrasa ja' kalakowan nga' rowa. kalakowan se sala, maske oca'na nyaman tape naraka la adhante' ban pole ka lakowan nga' rowa elarang keya bi' agama polana banne muhrim nyampor settong.

Ta' egarassa mata are jan toron e langnge' bara' ban sengko' ta' apangrasa ja' na'-kana' ngodha rowa bannya' se mole. Very moleya keya tako' oreng towana nyare, oca'na. Sengko' neng-enneng, ngabas ka bara' se abarna koneng kaemmasan. Angen on-laon ngalesser lebat tang kopeng, agabay buluna kole' jaga. Sakone' mekker. na'-kana' ngodha rowa ta' todhus ka songko'na apa? Oca' tang ate.

"Cong se moleya, emma'na menta lolong ca'na!"oca' Anom Peri ranyeng dhari laok.

"Iya, Nom, sengko' la moleya keya," bales sengko' ta' kala ranyeng.

Mare jareya sengko' mole sambi ngeba pekker ne'-sakone'. Ta' narerna ka kalakowanna, polana sengko' aromasa sacara ia' langsong arowa ajuba'agi kaom sarongan. E langlanga sengko' ta' andhi' pengaro, polana padha ngodha keya. Dina ra, ja' se ngalakone banne sengko' ban apessa ta' kera buru ka sengko' se gun tao ngoca' reya. (*)

*Muhtadi A.
*)Santri Pondon Pesantren Annuqayah lubangsa dan mahasiswa Instika jurusan Hukum Ekonomi Syari'ah. Aktif di Komunitas KPK dan KCN.
*Carpan Paneka Epetthek dari koran JP Radar Madura (terbit 25 Agustus 2019)

No comments:

Post a Comment