Monday, 8 April 2019

Sapi’i Ecapo’ Duwa


Sapi’i Ecapo’ Duwa
TEKKA’ are gi’ laggu, barungnga Bi’ Susiya la ramme kalaban oreng se melleya nase’, tajin otaba rojak, kaangguy ngesse’e tabu’ sopaja ta’ pate lapar kantos ka pokol sanga’. Jareya pajat daddi kalakowanna Bi’ Susiya sabban arena. Ajuwal kakanan e barung penggir jalan molae dhari gi’ laggu sampe’ sorop are.

Tatangga disa dhiya tor disa dhi bara’an apangrasa perak. Badhana Bi’ Susiya se ajuwalan, ekarassa manyamanan dha’ reng bine’ se la andhi’ lake ban ana’. Sabab, ta’ kodu repot atana’ gi’ laggu kaangguy maranta ana’ tor lakena.

Biyasana, se entar le-melle ka barungnga Bi’ Susiya se ngadhep dha’ lao’ jareya babine’ kabbi. Tadha’ reng lake’ entar le-melle ka barungnga Bi’ Susiya. Reng lake’ se le-melleya ka barung jareya arassa tako’ polana mon etangale Bi’ Susiya dhaggi’ pas bisa-bisa ekaterrowe.

Kabar dhari ga-tatangga, molae Bi’ Susiya ta’ andhi’ lake, Bi’ Susiya gampang terro ka reng lake’. Ta’ usa nangale ke’-lake’ gantheng, nangale ke’-lake’ ajalan bai jareya la agabay atena Bi’ Susiya garesges.

”Mara, Bi’, sengko’ tanenge. Nase’ orap tello bundu’,” Ruhma se buru dhapa’ langsung nyellor e bannya’na oreng se la ngadha’an.

”Iya antos, Le’, giliran. Sengko’ la dhateng gella’,” Sahna se molae gella’ toju’ e padduna lencak, jaga nangale’e Ruhma se arebbu’ menta tanenge lu-gallu.

”Iya sengko’ kaburu, Buk, ana’ tako’ nanges wa.”

”Buh, ella ra! Sengko’ reya ekareken ta’ kaburu keya, apa?” Sahna marenyot ka Ruhma, nandha’agi ja’ aba’na ta’ pate senneng.

”Ba, iya-iya mara ja’ kose atokaran. Paggun etanenge kabbi. Rowa’ nase’ gi’ bannya’. Saompamana tadha’ kan kare ngandhel pole,” Bi’ Susiya se emo’ naneng acaca keya ngedhing Ruhma ban Sahna agarang.

”Iya teppa’, ja’ lako atokar. Mon oreng lako atokar ekajuba’ lake,” Amna se la nyodhu rojak acaca keya.

”Ba nyamana ya, Le’, mon lako atokaran ekajuba’ lake ya?” Bi’ Susiya onga’, nyambidi caca se dhari Amna. Mon masala lake, Bi’ Susiya pajat addreng.

Amna agella’ ngelkel. Apangrasa panceng se eontalagi ngenneng juko’. ”O, iya Bi’. Ba’na mon terro olleya lake gantheng ta’ olle atokaran ja’,” sambi agella’, Amna ngoca’ saromban.

”Mon cara jareya sengko’ ta’ atokarana ja’, polana sengko’ nemmo la bakal lake se gantheng,” sambi naneng nase’ Bi’ Susiya acaca dhus-todhus.

”Sapa pole jare, Bi’?” Ina se molae gella’ neng-enneng ngantos nase’ atanya, sapa pole lalake’ se emaksod.

Reng-oreng pajat lebur ngedhingagi cacana Bi’ Susiya. Apapole caca lalake’ nga’ reya. Maske perrek lako sabban are Bi’ Susiya lako acareta reng lake’ se bakal daddi lakena pole. Reng-oreng ta’ toman busen ngedhinggi. Lebur ekowa, magella’an ka ate.

Minggu pan bilan, Bi’ Susiya acareta Osman. Ca’na Bi’ Susiya, Osman bakal daddi lakena, daddi gantena Dahlan se la adina aba’na. ”Sengko’ nangale Osman e partelon ro, ce’ ganthengnga kose, Le’, akaton eabas sem-mesem ka sengko’ wa,” nga’ rowa lakar, Bi’ Susiya lako kagiyaren mon nangale lalake’ se gi’ ta’ andhi’ bine. Tekka’ ta’ mesem ka aba’na ekoca’ mesem.

Tape ta’ abit dhari lebur ka Osman reya, Bi’ Susiya la aoba eber. Lebur ka Saleh kare. Lalake’ se buru mole dhari Jakarta. Tape, ja’ nyamana Bi’ Susiya, iya rassa leburra gun aomor dhuware. Sateya, Bi’ Susiya la mokka’ careta anyar. Atena lebur ka Sapi’i se binena buru mate.

Sapi’i aropa’agi reng lake’ se bajeng alako tor alos tengka. Kabajengnganna dhalem alako agabay Sapi’i daddi oreng se sogi. Bengkona raja, sape ban embi’ owananna bannya’, sopedha motorra bagus tor gaga’. Tape, la ekoca’ lang-palangnga oreng odhi’ e kampong se taker sella’ ban cekka’ kalaban elmo celleng otaba elmo seher. Sapi’i ban binena lako sake’ lantaran eseher oreng se dengki ka kasogiyanna.

Kabarra, binena Sapi’i se anyama Marni rowa mate banne keng polana panyake’ biyasa. Ca’na dokter se badha e roma sake’ Gappora, Marni reya acapo’ panyake’ liver. Ah, bila la ekoca’ panyake’ liver, se badha e pekkerra reng oreng iya reya sake’ keng polana ecapo’ seher.

”Sengko’ sateya terro ka Sapi’i, Le’. Rowa ro, binena se mate ecapo’ seher. Sengko’ alakeya rowa bai. Se la gantheng gi’ cakang. Bajeng alako rowa, Le’,” oreng se ngedhingagi gun agella’.

***

”Le’, ba’na ekaterrowe Bi’ Susiya, ca’na,” sambi ko’-roko’an e penggir saba, Mat Rakib abala ka Sapi’i, marga aba’na ekakarep Bi’ Susiya.

Sapi’i se gi’ ta’ bisa loppa dha’ Marni se buru mate, gun sem-mesem tanggung. Ta’ akarep dha’ oca’na Mat Rakib.

”Mara, Le’ Pi’i, nyaman mon ba’na akabin ban Susiya. Susiya kan gi’ ngodha, andhi’ pangaselan dibi’ pole. Ba’na ma’ ta’ neng kadibi’ wa. Ma’ badha se makanana sambi. Ban pole, bengkona ba’na se raja ro, ma’ badha reng nyapowe. Sape ban embi’na ro ma’ badha se makanana, ma’ ta’ gun lako ngongkos oreng malolo,” Mat Rakib se ta’ esaote mon Sapi’i paggun maksa acaca.

Dhari abasanna matana, Sapi’i acora’ ta’ senneng ka caca reya. Apangrasa la lengnget, Sapi’i pas acaca, ”Dhu, ta’ tao ra, Ka’. Sengko’ ta’ akarep ka Susiya ja’,” ca’na Sapi’i sambi mowang bucengnga roko’na.

”Ba, arapa ma’ ta’ akarep ra, Le’? Mara ra, ja’ dhus-todhus gun ka engko’. Mon pajat akarep pas ngoca’, ja’ mongker. Sengko’ reya ekoca’ tatangga ban taretanna ba’na. Ba’na gun kare ngoca’ iya ka sengko’. Sengko’ se daddiya pangadha’ la,” ngeding oca’na Mat Rakib se akaton ce’ maksana, Sapi’i apangrasa sajan ta’ nyaman.

”Nyo’on sapora, Ka’. Banne keng bula mongker otaba lecek lantaran todhus. Bula ango’an ta’ abineya pole etembang abine Susiya.” Sapi’i taloccor ngoca’ saromban.

Mat Rakib se sangguna pamanna Bi’ Susiya, aonggu’. Sapa bai se nengale ka onggu’na Mat Rakib tantona ngarte apa maksodda. Sapa oreng dhiya se ta’ taowa ka kalakowanna Mat Rakib. Kabbi la padha tao, sapa’a bai se nyenggung atena Mat Rakib, bakal tao ka akebatta.

”Ja’ ban-saromban acaca, Le’. Se anyama ate areya alik-balik,” oca’na Mat Rakib sambi jaga, nyengga.

Sapi’i ongguna banne ta’ tao ka kalakowanna Mat Rakib. Tape Sapi’i paggun ta’ ketter. Sapi’i ta’ apangrasa, ja’ oca’na gi’ buru bakal madhateng balai.

***

E dhalem kamarra, Bi’ Susiya mesem, senneng. Potona Sapi’i se eteggu’ molae gella’, eseram ngangguy aeng kembang se ekaolle gella’ gi’ seyang. Mare eseram dhari aeng kembang jareya, potona Sapi’i  se la bacca pas esaba’ ka babana bantalla.

Dhalem kamarra, Sapi’i ngalengsang. Robana Bi’ Susiya ta’ bu-ambu ngombar. Dhadhana ekarassa gumigil lantaran ta’ kowat dha’ rassa kerrong dha’ Bi’ Susiya se ta’ kenneng tanggung. Sapi’i apangrasa ngedhing ro’omma obu’na Bi’ Susiya se buru mare mandhi e somor soro’.

 
*)Noer Hamima, mahasiswi jurusan Tasawuf dan Psikoterapi Instika Guluk-Guluk, Sumenep.
*Pernah dimuat di Radar Madura (Jawa Pos Group), edisi 8 April 2019.

No comments:

Post a Comment