Friday, 27 April 2018

Kanca, Taretan, Setan

Saudara Kembar

AKANCA’A banne keng badha parlona salaen ataretana.

Ararembaga seyol sombang, dhari bak-tebbaganna reng odhi’

Pola padha kenneng kasandhari bakto du’a ngantos giliran

Ja’ papartaja kor ja’ leceke.”

Banne karebba Kamil se nedda’a kennengngan reya sabab kembang, korse betton, ban aeng mancor reya se daddi alasan pa’taon ta’ ngampar mata e taman reya. Ya. Taman Bunga Songennep. Bukona reng-oreng nolay lama’ ban bantal. Araksa ban ngotep rassa.

Sanyatana bannya’ careta se ngonjuk e kennengngan reya. Ngantos e attassa betton, ro’om e kembangnga, ban ngalocor e aeng mancorra. Gun kare meddal mata ban pekker. Tape banne jareya tojjuwanna Kamil, malobar kaso ban maeber rassa kalaban Nur. Nur, se aropa kantha Ratna Ningrum epangabasanna Dewata Sukmo ban Langgeng Permana. Ta’ gampang ngaolle Nur, persis Dewata Sukmo se arebbu’ Ratna Ningrum dhari Langgeng Permana e caretana topeng dalang.

Taman reya paggun ramme. Padhana gi’ lamba’ sal paddu padha aesse oreng. Badha se kadhuwa ban badha keya se buk-ombugan.

”Arapa ba’na ma’ ta’ acaca, Yah?”

”Hmmmmm..” saotta Kamil sambi malebar abas.

”Molae gella’ ba’na cengngeng. Katon badha se epekkere?”

”Enje’, Bun...” jawabba Kamil se monte’.

Cacana padha te-ngate. Arammeyan monyena dara ban mano’. Ka’-bungka’an se mancolot saleng maondhu maca angen. Jalanna laon, neter kolenang asamper serret.

”Lamba’ dhinna’ kennengnganna sengko’ ban ca-kanca ngaddu caca ban tengka arebbu’ pennang. Ta’ lopot kadhang padha mancella’,” oca’na Kamil sambi mesem.

”Atokar?”

”Enja’. Gun enger. Mare jareya pas padha ngakak maske ta’ etemmo se kemma se bendher.”

”Beh!”

”Taman reya lamba’ ekaromo’e reng ajajuwal. Paleng senneng ca-kanca ka kobi. Maske sagellas pas ekaromo’.”

”Hahaha...!”

Se kadhuwa padha mesem. Kantha pangantan anyar se nestessa tellor e batton.

”Ba’na lamba’ seggut dha’ enna’ bi’ Mirna ya, Yah?” tanya Nur se abak tako’.

Mirna, olokanna. Nyama lanjangnga Mirna Nurul Farida. Ya, Mirna se tao ecareta’agi Kamil ka Nur. Sir-gasiranna se lamba’ bakto gi’ akuliah ban pegga’ sabellun nemang senneng. Padhana nale’e aeng e somber, wang-mowang ora’.

”I-i-iya, Bunda,” jawabba Kamil ga’-galagga’.

”Hehehe... ! Molae gella’ enga’ ka Mirna,” gaja’na Nur ka Kamil.

”Enja’ ya,” Kamil sambi nobi’ kene’ pepena Nur.

Sowara adan e Masjid Jami’ tabareng ban kowekka Nur. Reng-oreng aleklek padha ngabas gulina Kamil ban Nur. Kembang ban aeng mancor ekaballunnagi. Ta’ elerek sakale bi’ se kadhuwa gun agaja’ noro’e sennengnga atena. Maske panas are torbu ka kole’na lebat pekka’anna ka’-bungka’anna se ngarandhung e attasanna.

”Eh, wa’ reng lake’ gantheng,” gaja’na Nur terro matamburuwanna’a Kamil.

”Edhimma? Huh, aganthengngan sengko’!” saotta.

”Arowa’, se buru kalowar dhari mobilla,” sambi nodduwagi ngangguy pangabasanna Nur.

”Ya, gantheng jat. Kala sengko’,” teggessa Kamil se ngarte ka maksodda.

Kamil nges-tangesan. Sampe’ Nur arassa ta’ nyaman ka reng-oreng.

”Yah, ambu. Todhus!” Nur ageppa’ pokangnga Kamil.

”Ma’ cora’ kennal sengko’ ka reng lake’ rowa, Bun.”

”Ongguwan? Mayu kenallagi sengko’,” oca’na Nur se esanggu Kamil tha-kantha.

”Serius, Bunda. Arowa cora’ tang kanca.”

”Ma’ ta’ nyapa ka ba’na tape, Yah?”

”Ta’ nangale paleng.”

”Huh, paleng lakena Mirna jareya!” oca’na Nur se maoba addhep, du-addu buggik. Akantha reng ngoso’.

Kamil ta’ apangrasa ja’ Nur mongkor. Pangabasanna cengngeng ka reng lake’ rowa. Badha tatenggun se lebbi asre tembang alajjai Nur.

”Aih. Sengko’ reya ngoso’ ma’ ta’ eeddhebbi bi’ ba’na? Ma’ pas cengngeng ka reng lake’ rowa?” Nur jaga sambi ngandhengngi pangabasanna Kamil.

”Hahahha... Ja’ sengko’ tao. Ba’na gun tha-kantha.”

”Yut..!!!” oca’na ceppet.

”Wa’ wa, Bun. Reng lake’ rowa lamba’ gi’ akuliah eco-koco bi’ se daddi sopirra sateya rowa. Sopirra rowa lamba’ tang kanca keya. Sakanca’an, sengko’ ban se reng lake’ rowa pas ban sopirra. Bidana gun se daddi sopirra jareya se ekoca’ senior otaba se atowa’an. Keng lamba’ jiya jat songong. Le-mele kanca. Maske ka sengko’.

”Bah, ma’ badha senior reya daddi ro-sorona junior?”

”Nyamana la oreng odhi’, Bun. Mon gi’ andhi’ kobasa soga’. Mathettheng ka sapa’a bai. Tape bila ebalik padhana jareya, enga’ nase’ badhang se etowap pole, loyloy,” oca’na Kamil maleyep abas dhari reng lake’ rowa. Addhep ka Nur.

”Ba’na ma’ ta’ nyapa? Jalan entare. Rowa reng sukses. Pola Ayah pas bisa sukses, polana raket bi’ rowa!”

”Enja’. Bannya’ oreng. Cokop sengko’ senneng ngabas kanca sukses, se lamba’ ta’ eka-sangka. Ban pole sengko’ tako’ esanggu menta’a jabatan otaba matoro’a nyama bila badha daptaran ponggaba.”

”Ba’na reya baramma, ma’ pas ta’ ngakowa ka kancana?” bantana Nur mabendher.

”Banne ta’ ngakowa ka kanca sengko’, Bun. Arowa se noro’ bunte’ e budhina, pangerengnga gi’ ta’ nanto esto padhana estona sengko’ ka reng lake’ jareya.”

Kamil matao fotona se badha e HP-na. Kaabas jellas ja’ Kamil toju’ akompol kalaban reng lake’ rowa. Se daddi sopir badha keya, neggu’ tokol sidhang ban mata mancella’. Padhana se agigiri oreng.

Slopeng, 11 Januari 2018


*Budi Santoso lahir di Sumenep, Madura. Alumnus STKIP PGRI Sumenep. Suka membaca dan menulis cerpen dan puisi.

*Pernah tayang di Radar Madura (Jawa Pos Group), edisi Minggu 28 Januari 2018.

No comments:

Post a Comment