Saturday, 10 February 2018

Sorat Buta

Surat Buta

KOLARAS eabber angen e taneyan. Agules baliker jem-tajem se atompo’ e adha’na pametthedan. Dhuri mabar ta’ daddi pangaco ngabberra mempe se taselpet e kolaras. Angen sajan santa’ madhapa’ esto dha’ jalanna mempe se gi’ posang nyare cangke’na ate.

Are sajan malarat kaangguy aleppet ondhem e babana sonarra. Buktena mano’ agariyungan nengga’ e camara ban magisru ata’na dhapor. Tape langnge’ paggun gi’ ta’ akor, saparo tera’ saparo ondhem, saparo biru saparo bu-abu. Are la elang arebban matemet ondhem e ponca temor. Jasadda gun kare saparo ta’ bungkol pole padhana ri’-bari’na. Sabab ondhem daddi lang-alang se ta’ bisa elanglang.

Angen sajan santa’. Oreng padha nyebbut angen kaballu. Ce’ rajana angenna sampe’ dhuware-dhumalem ta’ bu-ambu ban ojanna. Maelang arebban kaju-kaju ban bungkana geddhang kaangguy abuwa. Sabab tana la talebat powa.

Sengko’ mandeng kalaban nespa dhari candhila. Biyasana dhari bu-sobbu la bannya’ sapedha motor lebat e lorong adha’an. Dhari pajuwalla ajam, tahu, oreng se mangkada ka saba, pajuwalla juko’, ban sampe’ ka pajuwalla tajin. Kabbi la amolae lakona bang-sebang. Tape asabab ondhem se talebat petteng ban angen se sampe’ marobbu bannya’ kajuwan, oreng padha tako’ kalowar dhari romana. Ana’na elebbeng, ta’ ebagi amaenan ban kancana.

Taneyan rombu ta’ sakera-kera. Dhari sarpa se agentang ban akorong egiba angen taker tang-balintangan dhari bungkana. Palastik-palastigga jajan se biyasa ebelli ale’ dhari tokona Ji Ahmad samolena asakola. Kemma bungkana geddhang e adha’na taneyan bannya’ se robbu, sampe’ eppa’ apessenan molae bari’anna kaangguy nolonge aleggai taneyan. Ella aberri’ lalakowan onggu.

”Nyara...” Sowara alos rowa matakerjat sengko’ se molae gella’ ta’ bu-ambu mekkere bu-rombu. Sengko’ gun anganga ngabas oreng se ajalan e adha’na candhila. Pangarana ajawaba ”enggi” ka’-lekka’. Tape sengko’ pas ta’ bisa materros oca’ karana ngabas pamesemma se ce’ manessa kalaban tae lala’ e tabun babana se jan nambai kajembaran ngabas paraban buru.

Ta’ ma-dhimma bai, sengko’ gi’ paggun kapekkeran ka pamesemma paraban gella’ rowa. Sengko’ akantha ce’ kennalla ka pamesemma molae lamba’. Tape pas loppa ja’ sapa se ngandhi’. Pamesemma ce’ cekka’na ka otek sampe’ ta’ bu-ambu se mekkere. Eppa’-embu’ kose te-ganteyan atanya arapa sengko’ ma’ pas lako maddek kadibi’an. Sengko’ gun ajawab, mekkere bu-rombu tadha’ se nolongana aberse’e.

”Iya sapa pole mon banne ba’na, Cong. Senga andhi’ taretan bine’ rowa ekenneng kaparlo ka’-lekka’,” saot eppa’ se gun-paggun bai molae lamba’.

”Iya ja’ bila jareya ojan se terranga. Korang tobuk sela dhuware-dhumalem ta’ bu-ambu. Kemma kaju ta’ kerreng. Sassa’an nombuk ta’ kober nyassa. Pole tadha’ panas keya,” embu’ nyambung dhari adha’na tomang, mabattra oca’.

Tadha’ se ngeddhebbi oca’na embu’. Pekkeranna sengko’ paggun tasangsang ban ngalengsang ka pamesemma paraban se lebat bakto tera’ tana gella’. Mesem se ce’ manessa. Re-saare tadha’ busen bajangnga gaggar ka mata. Makke orengnga la ta’ paddhang pole. Ella se biyasana ca’na santre wujuduhu ka adamihi bi’ sengko’ eoba ka adamuha kawujudiha. Dalil se ta’ ekarassa nyelbi’ dhari dhalem ate. Rassa terro taowa ka nyamana ban sabarang aca’-ranca’ e pekkeran.

”Ba’na mekkere apa, ma’ pas mesem-mesem dibi’? Ta’ sa’-kasa’an laju ka kancana mon badha nga’-bunga’an,” Ripin se metto dhari budhina labang matakerjat sengko’ ekasanggu la Pa’ Guru.

”Mara ra sambi’ ja’ kose mancal nga’ jareya. Engko’ acaca kan sa-biyasa, sakeng ba’na jagana se ta’ nyambung. Ba... enja’ ra nyambung, tape ta’ tao nyambung ka apa ka’-lekka’,” sengko’ coma mesem sambi ondur dhari seddi’na Ripin. Apangara entara ka barung, tape se Ripin paggun bai daddi bunto’ sambi' terros ngamenco. Magisruwan na’-kana’ neng e taneyanna sakola’an.

Mata arassa solap mandeng are se nyorak sonar ka pan-barampan paddu. Are la aoba dhari sordhep pas jembar abarna biru. Tape sengko’ paggun bai kerrong ka pamesemma paraban se ta’ etemmo paddu kennenganna. Sengko’ ta’ ngarte arapa ma’ bisa ker-pekkeran molos, ban are ban malem. Epet-selpettagi pa’-reppa’na alalakon tabana adungngeng sakanca’an.

Are la para’ compet. Reng-oreng padha ngardhang ajamma kaangguy ongga ka korongnga. Badha se sampe’ gupo nyare ajam settong se ta’ etemmo pamaenanna.

”Dika ajamma ta’ lebbi enggi?” Ca’na bi’ Samma dhari paddu mor lao’. Sambi’ alajja bi’ Samma embu’ nemmone tamoy se ra’-cora’ gi’ paraban. Pacacana alos, tape sanget baranca, kose taker lanjang dungngeng kadhuwana. Sengko’ nyangkana paraban towa Iim, sapopo dhari eppa’ se pajat ter-ater malolo ban malem Juma’at. Tape sengko' pas apangrasa biyasana mon Iim laju nyander ka dhapor banne gi’ lok-ologan dhari taneyan padhana se sateya.

Dhari candhila se alobang sakone’, se biyasa eangguy embu’ nyorne’ bila badha kompolan otabana jang-onjangan sopaja bisa tao bila ka’-angka’na se kodu la seyap, oca’na embu’ bakto sengko’ lako daddi bunto’. Ka bara’ ka temor paggun ro’-noro’.

Dhari jadhiya sengko’ pasda ja’ banne Iim. Tape gi’ ta’ pasda ja’ robana sapa taker kepak se nyamana cethak nyorne’ babine’ se ter-ater rowa. Sengko’ nyoba’ nyare cara laen kaangguy bisa ngabas dhari semma’ paraban e lowar. Sampe’-sampe’ dhari abidda mekker, embu’ matakerjadan sengko’.

”Ba’na alako apa neng e adha’na labang?” Sengko’ alerek, babine’ rowa la maelang, kalaban kaburu sengko’ mokka’ labang sambi’ ngoca’ entara kona Ripin. Tape pas ta dhapa’-dhapa’ ka romana karana sengko’ gun lan-jalanan ta’ nemmo tojjuwan matotok jiladda are ka langnge’ se totok kalaban barna merana.

Bubburu padha gumbira ngabber sampe’ ka amper ngabaragi kaangguy kalowar ka reng-barengnga. Samarena adan Isa’ eppa’-embu’ ban ga-tatangga akompol sambi nenggu TV dhari amper ban e la-sellae kalaban dungngeng. Sengko’ mar-samar ngaedhing pas akompol kalaban rassa terro taowa ka se ekadungngeng kajana se ekadungngeng paraban se gella’ rowa.

Sengko’ akaton ta’ mana ngedingagi gun coma mandeng pornama se ngobbar calemodda malem se asandhing tang-bintang se katon mella’-meddem sambi’ noles sorat dha’ paraban se maposang aba’. Dha’ se mesem ce’ manessa, tape sengko’ akaton ta’ andhi’ aba’ sakadar nyaba’ nyama. Tape dhari dungngeng malem reya sengko’ pas tao, paraban gella’ rowa kanca sapamaenan ban sakellas terros molae gi’ nyongngop alip. Pas saellana lulus ibtidaiyah ngalle ka Jaba, materros asakola sambi’ mondhuk e pondhugan raja.
***

Mano’ onggu-onggu agariyungan. Are la tera’. Sengko’ sampe’ kose takethas matotok mempe se gun eahere kalaban mesem ban mateppa’ sapo’. Masepa’ badan nyellanga mempe laen, makke na’-kana’ la padha agariyungan neng lowarra pondhuk. Tape bakto sengko’ abali’, sengko’ takerjat ngabas badha sorat se satengnga akobir. Pas buru enga’ sorat jareya se epakerem ka na’-kana’. Ca’na dhari kanca sapamaenanna sengko’. Tape na’-kana’ ta’ tao keya sapa nyamana. Sorat jareya ta’ epatotok ebaca bari’anna karana badha ajiyanna keyae se ta’ enneng aguli sakale. Apapole maca sorat.



*Maghfiratuzzahroh sedang belajar di MA Nasya'atul Muta'allimin, Gapura Timur, Gapura, Sumenep.

*Cerita ini pernah tayang di Radar Madura (Jawa Pos Group) pada tanggal 24 September 2017 : https://www.jawapos.com/radarmadura/read/2017/09/24/15396/carpan-sorat-buta.

1 comment:

  1. […] STIKP PGRI Sumenep. Kini mengabdi di SMAN 4 Sampang dan Ma’had Al Ittihad Al Islami (MII) Camplong, […]

    ReplyDelete