Thursday, 19 September 2019

Nyepcep Mabar



SAELLANA abit toju' e adha'na sengko', Suradam arassa ta' nyaman gulina. Pan-barampan kale mateppa' songko'na se saonggunata' pa-rapa. Mo-lae gella' jarowa nyator abit ban sengko'. Bannya' se ekacaca, molae dhari tamennan padhina e saba sampe' embi'na se mate la olle lema are.

Ta' etemmo sabab, embi'na la temmo ta' anyaba. Matana mancella', tabu'na gali. Dhari jareya Suradam ta' nyaman ngakan sakeng dhari emanna ka embi'na. Embi' jareya sangkolanna dhari kaena sabellunna seda. Melana dhari jareya, Suradam arassa raja dusa ka kaena. Suradam lanjang acareta ka sengko', sampe' kobi se badha e adha'na kare saparo.

Settong caretana se bisa matalka dhadhana sengko' ban tantona oreng se ngedhing careta jareya.

***

Patima, babine' se alos gulina. Reng sakampong padha terro ngabina, tamaso' sengko'. Tape coma oreng tartanto se bangal alamar, asabab rowa ana'na reng tenggi tor sogi. Eppa'na kalebun, la sapolo taon mimpin disa. Reng-oreng padha tako' maso'a ka Patima, tako' coma etola' ta-matta. Apapole Patima sateya la andhi' titel sarjana. Oreng tamba tako' se maso'a.

Tamaso' sengko'. Na'-kana' se laen coma bisa ngarep Patima daddi binena. Amarga alos gulina, pote kole'na, ban tantona berse atena. Banne tadha' se alamar ka Patima. Bannya'! Tape etola' kabbi. Oca'na eppa'na Patima, ta' epabakalana olle nyettong ka sakola'anna. Iya la biyasa, kaluwargana tamaso' oreng se asakola gi-tenggi. Molae dhari bangaseppona lamba'. Laen kalaban sengko' ban Suradam se gun coma lulus SD pas terros epaneggu' landhu'. Patima ban kaluwargana tamaso' oreng se eabas molja pannengnga andhi' pangkat tenggi. Kaka'na daddi dosen e lowar negri. Melana dhari jareya, oreng ta' gampang maso' ka Patima.

Kodu mekker sakaleyan-dhukale kaangguy alamar. Olle ta' gun coma todhus bila etola' ban reng towana Patima. Sabab, sara oreng se bisa cocok dha' reng towana. Paleng sakone' kodu andhi' pangkat ban elmo se tenggi, tantona jugan sogi. Molae lamba' se alamar ka Patima coma oreng kene' toronna rengta' andhi', mangkana etola' kabbi. Daddi ta' usa cengnga', asabab sarat ta' nyokobi.

Sengko' perna andhi' pangara alamara. Tape la-bala kabbi tadha' se endha'. Reng towa dhuwa' jugan ta' endha'.

"Ta' ngabas apa rowa ana'na sapa?" oca'na eppa' gir-gigir ka sengko'. Sengko' ta' nyaot, neng-enneng sambi nondhu'.

"Nyare laen bai, Cong!" ca'na se embu' pos-ngapose.

Daddina sengko' burung alamar. Patima, coma kare pangarep se ta' abarna. Sengko' noro' oca'na rengtowa dhuwa'. Tor mantep ja' reng towa ta' kera co-ngoco ana'na. Tape sampe' sateya sengko' paggun ta' nemmo oreng se akadiya Patima. Saellana sengko', Suradam jugan andhi' pekkeran alamara Patima. Ta' jau bida ban sengko', reng towana ta' saroju'. Amarga ngabas kabadha'anna dibi'na.

"Cong, mon padhana sengko' se maso'a terrang ta' etarema. Sabab ba'na kan la tao dibi' kabadha'anna sengko' ban embu'na," oca'na eppa'na Suradam pos-ngapose. Suradam narema ka oca'na reng towana. Tape Suradam paggun ngarep e settong bakto bisa alamar Patima mon eberri' edi ban reng towana. E settong bakto Suradam nyator masala jareya ka sengko'.

"Sengko' paggun maso'a ka Pa-tima," oca'na sambi mesem

"Apa ba'na ta' apangrasa, ja' rowa ana'na reng sogi?" atanya sengko' tha-kantha.

"Tape se anyama taresna ta' mandeng dunnya."

"Iya mon polana. Tape babine' rowa agantong ka oca'na reng towana. Ba'na la tao dibi' ka reng towana Patima, '' sanale-]ka Suradam neng-enneng mekkere cacana sengko'.

Are tamba are banne tamba elang, Suradam sajan seggut acareta Patima ka sengko'. Sengko' ekoca' kancana ngargai ngedhingngagi caretana. Ella, Suradam tamba gila. Na'-kana' rowa menta pole ka reng towana kaangguy alamar Patima, ban reng towana paggun etola'. Asabab mekker dhukale.

Karana etola' ban reng towana, Suradam buru ka bengkona sengko'.

"Ma' buru ba'na?" ca'na sengko'.

"Lesso la badha e bengko tadha' se ngarteya kabbi," mowana Suradam mera ngampet napso. Lema are la, Suradam badha e bengko, sampe' eppa'na dibi' se ngone'e. Suradam endha' moleya ka bengkona poko'na reng towana alamar Patima.

"Iya la, poko'na ba'na mole ka roma," oca'na eppa'na Suradam. Suradam aonggu' sambi noro' ajalan e budhina eppa'na.

Teppa' pokol petto' malem eppa'na Suradam ban pamanna toju' ka kona Patima. Etemmone eppa'na Patima kadibi'. Malem atamba malem, saellana jareya eppa'na Suradam abala se sanyatana. Ja' terro alamara Patima kaangguy ana' lake'na.Tape jawabanna eppa'na Patima padhana reya;

"Asabab bannya' se maso' ka ana' bula Patima ban sakabbinna ca'na meleya se kemma. Melana dhari ganeko bula atareya gallu," jawabba eppa'na Patima.

Eppa'na Suradam ban pamanna mole agiba pangarep se raja. Saellana dhapa' ka bengkona ban abala ka Suradam, Suradam arassa kaceba polana ta' jellas kapotosanna. Namong banne Suradam nyamana mon ta' usaha kaangguy ngaolle Patima.

Are tamba are Suradam tamba rekong. Tako'-tako' lamaranna etola' asabab bannya' se maso' ka Patima. Suradam sateya ta' pate bannya' caca. Orengnga seggut neng-enneng. Bila ecatore ta' pate nyambung, nyator ngala' samettona.

Suradam tamba takerjat saellana ngedhing Patima akabina. Eppa'na ta' acaca pa-apa, ta' abala ja' lamaranna la ta' etarema. Saellana ngedhing, Suradam tamba posang, kadhang-kadhang acerreng e tengnga jalan kadibi'an. Dining Patima ampon bunga ban peleyanna.

***

Patima se ekacaca Suradam molae gella' ka sengko', se daddi gantongan atena ban nyatana nola' lamaranna. Suradam acareta lanjang sampe' kobi se eberri' sengko' la kare cangkerra. Maske la ta' normal pekkerra tape paggun enga' ka sengko' ekoca' kancana.

"Taresna reya padha ban nyeyom mabar e bungkana. Nyaman katon ro'omma, tape nyocco dhurina," oca'na Suradam akadiya oreng se baras. (*)

Gappora, 2019

*)Rofqil Junior adalah nama pena dari Moh. Rofqil Bazikh. Lahir di pulau Giliyang kec. Dungkek kab. Sumenep Madura pada 19 Mei 2002. Berdomisili di Gapura Timur Gapura Sumenep. Aktif di Kelas Puisi Bekasi dan Komunitas ASAP, Merupakan alumnus MA. Nasy’atul Muta’allimin Gapura Timur Gapura Sumenep tempatnya memulai berproses menulis. Puisinya mendapat juara 1 dalam lomba yang diadakan oleh PT. Mandiri Jaya Surabaya sekaligus terangkum dalam antologi Surat Berdarah di Antara Gelas Retak(2019). Puisinya juga tremaktub dalam antologi Dari Negeri Poci 9; Pesisiran (KKK;2019) serta Bulu Waktu (Sastra Reboan;2018)dan Puisinya masuk antologi Banjarbaru Festival Literary 2019. Saat ini sudah menulis puisi di berbagai median cetak dan online antara lain Suara Merdeka, Banjarmasin Post, Malang Post,Radar Malang, Radar Banyuwangi, Radar Cirebon, Radar Madura, Rakyat Sumbar, Radar Pagi, Kabar Madura, .Takanta.id, Riau Pos, NusantaraNews

*Carpan ini tayang di JPRM pada tanggal 15 September 2019

*Keterangan gambar:
Karya Aulia Azziawaty dari SMAN 3 Yogyakarta, yang berjudul "dia Juga Salah Kok"

Padha Apes

PADHA APES


MANO' ta' pate bannya' se ngabber e bakto gu-laggu. Sabab panas mata are gi' nga'-anga' koko. Sengko' ban Sodik andhi' janji e are sateya, alari sambi katemmowan. Sengko' katemmowana bi' Mawar, tang pacar oreng temor dhaja. Sodik katemmowana bi' Melati se ta' laen tatanggana Mawar. Bisa ekoca' takdir, Mawar ban Melati kanca molae lanceng, saleng kennalla dhalem bisa e koca' paste.

Mawar ban Melati ta' ekenneng pesa, padhana sengko' ban Sodik. Tape badha bida sakone'. Mawar ban Melati kanca molae gi' SD. Sengko' ban Sodik taretan kandhung. Lamba' gi' sengko' ce' enga'na, bakto rowa gi' kellas ennem SD. Sodik abala ka sengko'.

"Sengko' andhi' pangaterro bila la raja terro apacarana bi' babine' se taretan kandhung," oca'na Sodik neng kellas. Sengko' aonggu' nyoba' ngamini sambi ngoca', 

"Mon sengko' satuju keya, tape katon repot," Sodik mesem.

Sengko' ban Sodik berka' lere-lere, partellon e adha'an la etangale, kennengngan rowa biyasa eangguy katemmowan bi' kanca se saomoran sengko'. Pasan para' dhapa'a sengko' nangale dhuwa' babine' se toman daddi kanca SMP. Sala settongnga ekaleburi sengko'. Soko ajalan sajan santa'.

Bila dhapa' ka seddhi'na, sengko' langsung mesem, tape babine' rowa esep, seppe, gun sowarana mano' ban ajam se ekaedhing kopeng. Sengko' posang acaca'a apa ka Mawar, sabab sengko' ban Mawar apesa korang lebbi sataon. Saengga sengko' mekker sambi ngabas Sodik se sampe' cengngeng enga' oreng posang, paleng ta' nyangka ja' eadha'na badha Melati se e-taksir keya.

"War, ca'na ba'na bila mare SMP ngalleya sakola'an?" ta' egarassa tang lesan langsung ngoca' jareya.
"Tao, ya, Wan. Mon oca'na oreng towa, sengko' kodu ngalle sakola'an, ma'le andhi' pangalaman ban fasilitas se 
lebbi lengkap," jawab Mawar agabay ate sake'.

"Terros baramma hubunganna sengko' ban ba'na se la ajalan korang lebbi satengnga taon?" sengko' nyoba' atanya.

"Ya.... baramma ya, dha' iya reya la," atena sengko' sajan sake', sabab jawabanna Mawar korang maso' ka akkal.

"Mon ba'na, Mei?" nyalko' Sodik atanya ka Melati.

"Mon sengko'....?" Melati ambu ta' nerrosagi oca'na.

"Mara mon bisa pajellas," Sodik terros atanya.

"Mon sengko' ta' ebagi kalowar bi' oreng towa," Sodik alonca' padha bi' na'-kana' kene' se eberri' pesse. Kabbi mesem, sengko' masang mesem co-ngoco.

Satengnga jam sengko', Mawar, Melati, ban Sodik tor-catoran sambi ngabas mowana Melati se sampe' cekka' neng epekker.

"Wan, sateya la pokol sanga' lebat," oca'na Mawar.

"Iya, sengko' bi' Mawar andhi' kalakowan," Melati namba oca'.

"Iyalah sengko' ban Sodik moleya keya, ta' nyaman ka oreng towa," jawabba sengko' ban Sodik aonggu'.

"Iya la, e laen bakto pole, sengko' bi' Melati entar ka dhinna' sambi katemmowan pole," tamba Mawar mabunga ate se la gella' karem enga' parao neng tengnga tase'.

"Bendher, Wan, sengko' ban Mawar entara ka dhanna' pole. Paleng Ahad dhateng," namba Melati. Sodik gun mesem ngabas ropana Melati se ta' bisa ekaloppae e pekkeran.

Panas mataare daddi sakse apesana sengko', Mawar, ban Melati. Saongguna tang ate ta' narema badhana jareya, apesa-pesa. Tape mon jat la takdir sengko' ta' bisa pa-apa. Bila mata ta' paddhang ka robana Mawar ban Melati se la elang dhapa' ka bilugan.

"Ta' nga' jareya," sengko' agaja'.

"Sapa se ma'ngar," bales Sodik

"Ya dina mon ta' ma'ngar. Mayu' bai mole me' ekaposange orengtowa," ajak sengko' ka Sodik se ngabas sambi aonggu'. Ngarte. Sengko' ban Sodik mole lebat jalan se gella' se bannya' monyena mano' ban oreng saleban.
Pokol sabellas sengko' ban Sodik la dhapa' ka roma. Neng roma Sodik langsung ka kamarra. Ta' abit kalowar ngeba andhuk, terros ka jeddhing, abarseyana badan se bannya' pellona mare alari.

Lamon sengko' laen, neng-enneng e amper, ngabas ejjam se nalpe' ka geddhung, nandha'agi pokol satengnga dhuwa'.

"Mandar ceppetta bai are sateya," akarettektang ate. Sengko' ce' kasusuna terro tatemmowa pole bi' Mawar. Sabab Mawar bila elang dhapa' ka bilugan--- pekkeranna sengko' posing, aeng mata gaggar ta' karassa.
Ta' abit Sodik kalowar dhari jeddhing ngabas ka sengko' se sakejja' on-laon angen ngalesser ta' egarassa mo-temmo la maso' ka kamarra.

"Wan, ba'na ta' madhiya?" tanya Sodik dhari dhalem kamarra ranyeng.

"Iya reya sengko' la entar ka kamar," jawab sengko' ranyeng keya.

"Duliyan sengko' badha se ekacaca'a ban ba'na," tamba Sodik "Ya...pasabbar bai ba'na, Dik." Dhapa' ka jeddhing sengko' langsung ker-pekkeran ka mesemma Mawar. Sengko' getton ma' bisa Guste Pangeran matemmowa sengko' bi' Mawar maske gun apacaran.

Ta' tobuk abayang robana Mawar, sengko' la mare mandhi. Kalowar dhari jeddhing. Matana sengko' nangale Sodik se nyaman ngabas TV ta' tao apa se etenggu. Sengko' langsung ka kamar agante kalambi.

"Eh, baramma ba'na ongguwan apa enja' ngajalani hubunganna jareya?" ca'na Sodik bila sengko' badha e adha'na.

"Ba'na ma' atanya nga' jareya? Mon sengko' sarius bai," jawab sengko' mantep. "Nyaman mon enga' ba'na, Wan." 

"Ma' bisa? Ja' reng Mawar ngalleya disa bila la lulus."

"Iya ba'na andhi' arebban bisa abine Mawar."

"Mon ba'na keng dha' ramma?" 

"Lamon sengko' gi' ta' etemmo kapasteyanna."

"Masa', Dik? Ca'na sapa ba'na jareya? Pola Melati tadha' abala ka ba'na?"

"Ca'na Melati, mangkana dhari ajiya se agabay sengko' ta' nyaman rassa." Sengko' ban Sodik talanyu' dhalem careta se tojjuwanna Mawar ban Melati sampe'-sampe' tadha' se ekacaca'a. Tape maske dha' iya sengko' neser keya ka Sodik mon Melati dibi' tadha' ngoca' pa-apa. Sengko' ban Sodik acareta laen, tape maske dha' iya sengko' gi' paggun neser ka Sodik ban ta' anapso pole se tatemmowa. Ne'-sakone' sengko' atanya neng dhimma katemmowan senyaman. Sodik gun aonggu' ta' ngoca' apa, paleng atena ta' narema. Pekker sengko'

***

Olle saminggu. Sengko' saroju' ngantos Mawar e partellon lao'na kantor disa. Bakto sateya mataare la onga' sakone', saengga panassa ta' pate nyengnga' ka kole'. Ta' tao badha apa, sengko' ban Sodik takerjat polana badha oreng ramme ka'-berka'. Badha se ngoca' nga' reya.

"Tabbra'an! Tabbra'an! Tabbra'an!!!" oca' ranyeng oreng.

Sengko' ta' partaja, nyoba' atanya ka oreng se badha e barung se ajuwal kobi ban cem-mecemma kakanan.

"Badha apa keng ma' oreng rowa ka'-berka'?" Sengko' atanya.

"Badha dhuwa' paraban etabbra' trek."

"Masa'? E dhimma?"

"E bilugan lao'na kantor dissa'," oca'na.

Sengko' ban Sodik langsung berka' keya entar ka TKP. Bendher bai bannya' oreng la abangon horop O keni' se tengnga'anna kosong. Tape badha oreng se tedhung mereng kadhuwa. Sapa arowa ya? Akarettek tang ate.

Bakto semma' dhuwa' tetes nyapcap dhari tang mata. Le'er aromasa ecekkel, sake' ta' kenning ngalonyot eber. Sengko ' ce' jellassa se ngabas ja' rowa Mawar. Asalemot dhara, ban ta' jau dhari Mawar, Melati mon ta' kalero padha bannya' dharana keya. Sengko' terro atowata tape ta' nyaman ka reng-oreng.

Tang badan aromasa ta' bisa manjeng ban ajalan. Ate aromasa ecapo' temba'. Sake'! Mata paggun ta' ambu kalowar aeng mata. Lere-lere sengko' nyorot dhari possa'na oreng, ta" kellar ban ta' narema ka takdir Guste Pangeran. Ponapa Ajunan majau Mawar dhari ab-dina ngangguy cara kadi paneka, dhu Guste? Oca' sengko' dhalem. Aeng mata paggun agili ta' bu-ambu. (*)



*MUHTADIZI merupakan mahasiswa di INSTIKA dan dipercaya untuk menjadi Pengurus Perpustakaan PP Annuqayah Lubangsa. selain itu dirinya juga aktif di Komunitas KPK dan KCN di PP Annuqayah.

*Carpan "Padha Apes" tayang di Jawa Pos Radar Madura e tanggal 8 September 2019

Setiap Jomlo Pasti Punah pada Waktunya

Setiap Jomlo Pasti Punah pada Waktunya

BAGAIMANA bila seorang santri mulai jatuh cinta dan memikirkan pernikahan ketika masih dalam proses belajar di pondok pesantren? Adakah cara untuk menenangkan batin mereka atau sekadar menjadi pengobat rasa hingga pembelajaran di pesantren tuntas dijalani?
INILAH yang ingin disampaikan buku "Santri Menikah, Jomblo Punah" karya Anifa Hambali. Pada pembukaan buku ini, Anifa menyajikan sajak berjudul Menjadi Santri. Berikut potongan sajak itu. Belajar menahan diri dari nafsu duniawi/ Seorang santri harus terus belajar/ Bermetamorfosa diri menjadi kupu-kupu yang indah/ Menjadi orang yang bermanfaat untuk agama dan tanah airnya.
Anifa menuliskan bahwa sosok santri adalah insan yang dibebani tanggung jawab dan tugas untuk belajar, berproses menuju pribadi yang berilmu, dan berakhlak sehingga nanti kembali ke masyarakat dengan bekal keilmuan yang mumpuni.
Buku 189 halaman ini memuat 19 judul mengenai kehidupan santri, tips, dan trik menuju pernikahan dan tantangan yang mesti dihadapi para santri agar lebih berdaya saing. Di bab Santri Milenial, Anifa mengulas bagaimana seharusnya santri menempatkan diri agar menjadi sosok ideal demi meraih masa depan. Menjadi santri itu jangan disia-siakan. Banyaknya kesempatan belajar yang ditawarkan di pesantren seperti mempelajari ilmu agama dan ilmu dunia. Menjadikan kapasitas santri semakin ideal.
Terlebih, pada 2020, Indonesia akan mendapatkan bonus demografi, yaitu 50 persen penduduknya akan berada di usia produktif (16–64). Itulah yang disebut Indonesia Emas (hlm. 5). Tanggung jawab santri harus giat belajar agar tercipta santri dengan kapasitas keilmuan yang lebih memadai. Perubahan yang baik itu pun nantinya akan mendekatkan pada pencarian jodoh.
Penulis yang pernah mendapat award sebagai Santri Preneur 2017 di bidang usaha kreatif ini menguraikan bab Jomlo ala Santri tentang bagaimana seharusnya seseorang memahami status jomlo itu sebagai proses memahami sirkulasi kehidupan. Status jomlo identik dengan perilaku yang akan berhadapan cibiran dan sindiran. Bahkan, karena malu para jomlo itu menyebut diri mereka dengan kata single bukan jomlo untuk mencari dalih pembenaran kesendirian.
Anifa memperjelas arti dua kata itu. Single dan jomlo itu sama saja. Jomlo (adjective) dalam English Dictionary termasuk bahasa slang anak muda Indonesia sebagai status sendiri, belum menikah dan bujang yang memiliki arti sama dengan single (adj). Kata single di dalam kamus bahasa Inggris memiliki arti ”Unmarriedor not involved in a stable sexual relationship” intinya belum menikah dan tidak memiliki status hubungan dengan siapa-siapa (hlm. 12).
Dengan penjelasan itu, Anifa hendak menegaskan jika mau menyebut diri jomblo atau single itu sama saja. Tidak ada pengertian yang menunjukkan bahwa jomblo itu nasib dan single itu pilihan dan prinsip. Meskipun demikian, menjadi jomblo itu juga memiliki sisi kebaikan tersendiri, terutama bagi para santri.
Anifa mengibaratkan status jomblo sebagai free travel. Artinya, masa di mana seseorang bebas ke mana pun akan pergi, melihat dunia yang lebih luas. Menjadi jomblo sebenarnya bonus untuk merayakan kebebasan, terutama jika masih dalam lingkungan pesantren. Mereka yang single dipastikan lebih sering berhasil menuntaskan hafalan dan ngajinya dengan cara husnulkhatimah (hlm. 16).
Di bab ini, Anifa juga memberikan pendefinisian perihal beragam nama jomblo. Misalnya, jomblo mabni, jomblo mustatir, jomblo munqathi’, jomblo rofa’, dan syibhul jomblo. Setidaknya, penamaan para jomblo, menurut ilmu nahwu tersebut bisa dijadikan sandaran dan alasan jika seseorang menjadi jomblo, itu tidak bisa disamaratakan sebagai jomblo ngenes yang tidak laku. ”Padahal, banyak santri menjomblo karena memantaskan diri untuk siap berjuang meminta putri jelita dari tangan Abah dan Uminya,” tulis Anifa untuk menegaskan cita-cita ideal santri jomlo (hlm. 19).
Memilih Jomblo, bab ini khusus membincangkan perihal alasan seorang santri menjadi jomblo. Mengutip cerita dalam buku KH Husein Muhammad dengan judul yang sama dalam bab ini dijelaskan bahwa memang ada intelektual muslim terdahulu yang memutuskan menjadi jomblo hingga akhir hayat. Sebut saja, Imam Zamakhsyari, Ibnu Jarir Al-Thabaridll, (hlm. 25).
Penulis buku ini juga memberikan gambaran terkait hubungan asmara muda mudi yang perlu diluruskan. Misalnya, bab Pacaran vs Pernikahan, Anifa menyoroti perihal pacaran yang kerap kali dilakukan anak-anak muda. Ia menjelaskan, arti pacaran hampir sama dengan ta’aruf (saling kenal). Bedanya, ta’aruf memiliki syarat syariat dalam menjalankannya. Pacaran sering kali memudahkan seseorang untuk menyimpang dan mendekatkan dengan zina. Sementara ta’aruf, untuk proses saling mengenal sebelum menjadi halal, dengan maksud agar orang diingat untuk lataqrobu zina (hlm. 35).
Lalu, apakah di pesantren juga ada hubungan antarsantri untuk sayang menyayangi? Menurut Anifa, potret hubungan anak pesantren lebih cenderung kepada ”kakak adik zone”, yaitu mirip dengan pacaran syar’i. Sebuah hubungan yang sebenarnya juga membingungkan untuk dipahami dan perlu diluruskan agar tidak menjerumuskan pada perilaku menyimpang dan kurang terpuji. Meskipun demikian, ”kakak adik zone” ini kerap mengantarkan dua sejoli kepada tangga hubungan halal sebagai suami istri.
Di bab Santri Menantu Idaman bisa saja merupakan bab yang membuat baper para santri. Anifa menuliskan jika menjadi santri tidak boleh khawatir tidak mendapatkan jodoh. Sebab, tidak sedikit orang tua bersilaturahmi kepada kiai dengan harapan dan doa di pesantren ada lelaki yang cocok dengan putrinya yang disarankan kiai (hlm. 82).
Di bab Cinta di Masa Depan mengajak pembaca untuk berefleksi memahami tentang mencintai dan memiliki. Seperti yang ditulisnya, Ketika kamu memperjuangkan cinta di masa depan, jangan hitung-hitungan untung rugi. Karena cinta bukanlah sesuatu yang bisa dikapitalisasi. Cinta hanya bisa diukur dengan ketulusan (hlm. 152). Sementara di bab Semua Ingin Menikah, secara khusus membicarakan perihal menikah. Membangun rumah tangga itu tentang keberanian untuk berkorban dan berjuang. Untuk menghadirkan kata ”kita”. Sebagaimana yang ditulis Anifa, ”Saat kita ingin menikah, bukan lagi kata 'aku' yang digunakan, tetapi ’kita’ bagaimana kita mempersiapkan pernikahan,” (hlm. 158).
Untuk memahami tujuan menikah, Anifa melukiskan bahwa kata ”kita” menjadi petanda bahwa pernikahan itu dilakukan dua orang yang saling berjanji untuk membuat komitmen menjalani hidup bersama. Ketika menjadi ”kita”, maka perjuangan menuju pernikahan ini tidak lagi memikirkan diri sendiri, tetapi memikirkan apa yang terbaik buat berdua. Apa yang terbaik untuk bersama di dalam keluarga itulah yang menjadi prioritas. Tidak lagi rasa ego dalam diri (hlm. 158).
Kehidupan itu memiliki fase demi fase yang harus dijalani dan kudu dilalui dengan dewasa dan bijaksana. Saat ini boleh saja Anda jomblo, tapi akan tiba saatnya status itu akan diakhiri dengan pernikahan. Santri Menikah, Jomblo Punah, judul yang tepat. Silakan dibaca!
Judul        : SANTRI NIKAH JOMBLO PUNAH
Penulis     : Anifah Hambali
Penerbit   : Belibis Pustaka
Cetakan   :  ke-2, April 2019
Tebal       : 189
Presensi   : Fendi Chovi


FENDI CHOVI
*Pegiat literasi di FLP Sumenep
*Diterbitkan di JPRM pada Minggu, 8 September 2019

Monday, 9 September 2019

Nyengceng Samper


NYENGCENG SAMPER

”Ba’na reya oreng juba’, ta’ pantes mon terro ka sengko’,” Naila ngoca’ ka Oong bakto are tacabbur e bara’na Polo Madura. Oong la abit terro ka Naila. Se jellas la lebbi dhari sataon. Tape Naila ta’ tao mokka’ atena ka oreng laen. Sala settongnga ka Oong se ella barampa taon ta’ tao eeddhebbi ban
Naila. E are Salasa teppa’ bakto Naila amen maenan paser e tase’ lao’, bakto jareya Oong ngoca’agi sakabbinna essena atena ka Naila.

”Ambuwi ba’na ja’ entar ka sengko’. Sengko’ la andhi’ pacaran, sela mesken, ta’ andhi’ oreng towa, gi’ terro ka sengko’. Epangakana bato sengko’ ya?” tegges Naila ka Oong bakto aba’na ngaedhing pole oca’na Oong ka aba’na.

”Sengko’ gun terro ka ba’na, ta’ terro ka oreng laen. Ba’na laen are senga’ posang ka sengko’ ya. Senga’e bai,” Oong ngoso’ atena ngolgul tadha’ padha. Sakabbinna la ekabala ka Naila kalaban alos. Tape Naila males kalaban oca’ se masake’ ate.

”Ma’ ta’ neko’ kapeteng keppe’. Pon ca’na ba’na se epadha’ramma’a, sengko’ ta’ tako’ ja’ apa se ekoca’ ba’na,” oca’na Naila nambai oca’na kalaban oca’ se sajan masake’ ate.

”Iya, senga’e bai. Epanyengcenga samper ba’na ka roma ban sengko’. Ta’ taowa sengko’, mon dhaggi’ ba’na posang ka sengko’,” Oong tamba ngolgul, sakabbinna atena nongngep ka baba. Ta’ ekenneng asak pole. Se badha gun rassa ngoso’ ban kaceba ka oreng bine’ se nyake’e atena, Naila.

”Senga’e,” Oong nyengla dhari kennengnganna Naila jeng-manjeng.

***

”Dina, ta’ usa pekkere, San, reng bine’ re bannya’,” Samsul, kancana Oong maenga’ Oong se molae gella’ gun mamong e adha’anna amperra.

”Ja’ gun reng bine’ settong kose epekkere. Ba’na re reng lake’. Nyareya saebu paggun nemmo. Mangkat lasu ka pasar, edhissa’ bannya’ reng bine’,” tamba Wahed sambi ameler ban macaer kabadha’an se seppe.

”Reng bine’ lakar bannya’. Tape se srek ka aba’ areya sara se nemmowa,” Oong ngabas ka kancana se kadhuwa, Samsul ban Wahed e seddi’na. Terros nondhu’ sambi nyaressebbi kabadha’an. Samsul ban Wahed aonggu’, ngalamon oca’na Oong se kabilang sakone’ bannya’ bendher.

Saellana jareya kabadha’an jenneng tadha’ sowara. Kabbi padha dhiyem ta’ asowara. Saellana jareya, dhari’ bara’ etemmo badha oreng se ajalan masemma’ ban oreng jareya saongguna Hasan, kancana Oong keya.

”Ma’ abit sengko’ ta’ nemmo ba’na ajalanan San? Ma’ sateya katon loyo, badha apa?” sambi toju’ e seddi’na se laen ban sambi saleng pandeng.

”Area pole, se la Oong epasake’ ate ban Naila,” Samsul ajellassagi ka Hasan se buru toju’ e adha’anna.

”Huu… ja’ gun oreng bine’ epekkere,” balessa.

”Areya laen pole masalana,” Oong ngangka’ sowara, ”Se daddi pekkeran, Naila reya kose talebat ngecena. Sengko’ ekoca’ oreng mesken. Mon akabin epakanana bato ban kose abala ja’ sengko’ re ta’ pantes ca’na. Ella, talebat reya la,” tegges Oong ban ebales onggu’an tello kale sambi mekker.

”Ban pole, sengko’ taloccor oca’ ja’ Naila epanyengcenga samper ka romana sengko’. Todhus sengko’ lasu mon ta’ bisa maposang Naila. Tape baramma carana?” Oong atanya ka kancana se badha e seddi’na.

Sakejja’ tadha’ sowara. Kabbi padha mekker. Pekkeranna alengleng. Matana ka attas ka baba kalaban pangarep nemmo tonggalla pamoassa pekkeran. Dhiyem. Padha dhiyem kabbi.

”Sengko’ tao carana,” Wahed mokka’ sowara maelang kaseppeyan se baramma mennit buru.

”Baramma? Apa?” se katello padha mengnga’.

”Baramma mon epaposang bai Naila ka Oong?” malere sowarana.

”Ba… kan jareya masalana lakar mola gella’. Se ekamasala are carana baramma?” tamba Hasan.

”Iya, sengko’ andhi’ kennalan e Disa Gappora. E dhissa’ badha dhukon anyama Ke Tirmidzi. Biyasa eolok Ke Tir. Orengnga ca’na sakte ban se paste bisa mon pera’ maposanga oreng bine’,” Wahed ajellassagi kalaban lelere, tako’ me’ ekaedhing oreng laen.

”Patennang, sengko’ tao ka romana. Laggu’ mangkat lasu ka Ke Tir. Pokol satengnga tello’ Ke Tir badha e romana. Mon salaen jareya, tako’na me’ eonjang oreng laen,” Wahed ajellassagi ka se katello.

Saellana jareya, kabbi padha ngarte. Laggu’ bakal mangkat ka Disa Gappora kalaban areng-bareng sakanca’an ban se kera ta’ etemmowa ban oreng laen. Saterrossa, kabbi padha jaga, ondur kabbi dhari amperra. Oong nyengla ban entar ka dhalem romana kaangguy bu-ambu.

***

Lagguna. Saellana la pokol dhuwa’, kabbi la akompol. Sambi saleng antos kaangguy alakowa neyatta se ba’ari’ ekajanji. Saellana la ranta kabbi, pas padha mangkat ngangguy sapedha motor. Satengnga ejjam ella lebat. Samarena ayu’-liyu’ ka dhaja, ka temor, ban sakone’ sambi nalektegi jalan. Akherra la para’ dhapa’a ka dalemma Ke Tir. Lema bellas mennit aggi’ samporna badha e adha’anna dalemma Ke Tir. Eterrossagi kalaban toron dhari sapedhana ban pas ngolok salam.

”Assalamualaikum,” koca’ se katello abareng kalaban nyorne’ ka bara’ ban ka temor.

”Waalaikumsalam,” dhari dhalem Ke Tir ajalan ka lowar sambi mateppa’ sorbanna se abarna pote. Saellana jareya pas nyoro toju’ e korse se adhep ka bara’. Saterrossa, arassa takerjat, saellana sabellunna madhapa’ kaparlowanna. Ke Tir la tao kaadha’ ka masalana se ealami Oong, sambi aberri’ dalubang ban bungkosan kene’.

”Areya’ e dhalem aesse lente ban pako kene’, pako ban lente reya saba’ e jalan se biyasa elebati ban reng bine’ roa, ban e dhalubang re abaca samarena atahajjud, ta’ abit, reng bine’ roa bakal posang ka ba’na ban jugan bakal noro’ ta’ terro molea dhari romana ba’na sambi nangis,” kabbi padha oanggu’ ngarte, tamaso’ Oong se andhi’ masalah reya. Arassa mare kaparloanna, kabbi padha amet sambi ajuluwaghi pesse se badha e dhalem amplop pote, ban coma ebales onggu’an mon Ke Tir.

***

Are aromasa ceppet. Saellana tello are elakone ban Oong sakabbinna se esoro mon Ke Tir. Tape ella tello are tadha’ kadaddiyan sakale. Saengga neng e atena tombu kakaceba’an ka Ke Tir. Sampe’ atena ngoca’ ha’ Ke Tir reya coma dhukon se ta’ mustajab. Mangkana sabban are Oong teggen ngalakone sakabbinna se esoro. Tamaso’ sampe’ ekasanggu maleng bakto nyaba’ sarat e jalanna romana Naila ban para’ labuwa ka jurang.

Are para’ compedda. Paggun tadha’ kadaddiyan. Tape, saellana lebat lema mennit, dhari lao’ etemmo badha oreng bine’ se nyengceng samper, sambi agaru pokangnga se atotop. Asandhing tanges ban aeng mata agaggaran sambi ngolok nyamana Oong e jalan.

Oong tacengnga’ e adha’anna matana. Nyatana se nyengceng samper area Naila sambi nges-tatanges. Tape, Oong ta’ ngeddhebbi. Se badha gun rassa sake’ atena ka Naila se talebat neddha’ aba’na. Sateya kabbi la abalik ban kare se sossa’a. Oong agella’ menges ban agella’ tanggung sambi alerek ka Naila.

”Kan mangkana, mon daddi reng bine’ reya ja’ ra-sara. Babine’ reya salaka ban lalake’ reya emmas. Bila sateya sapa esala’agina? Sengko’ se jellas ta’ bisa kaangguy materros rassana sengko’ se ella talebat esake’e. Daddi, sateya tanggung dibi’ apa akibadda,” Oong ngoca’ ka Naila se nges-tatanges sambi terros maso’ ka dhalem romana. Ban agintep labang. Adina’agi Naila se ngalecer aeng mata e lowar.


Annuqayah, 23-04-2018

Fathorrosi
*Dipercaya menjadi Ketua Perpus-LS Annuqayah (2018).
*Epetthek dhari Radar Madura (JPRM) :
radarmadura.jawapos.com/read/2018/05/07/71377/nyengceng-samper

Tuesday, 3 September 2019

Kadadak

KADADAK


E SETTONG are, ta-pata ban-aban laggu. Panassa are acora’ nombak ka cethak. Reng-oreng buru paleman ngare’ rebba dhari saba. Tera’na are akadi maseppe e sakobengnga Kampong Neggara. Reng-oreng coma ekapereng saleng sambidi panyapa. Sakadar apangapora otaba ngare’ rebba. Angen akadi gu’-ganggu’ nyerrop ka’-bungka’an. Rebba lalang pera’ sakone’ akete’ ecapo’ serrop angen, lon-laonan. Tape paggun ekarassa panas.

Kasebbut Ajji Lukman, se paggun ta’ paleman maske garunjuna ampon possa’ bi’ rebba. Ajji Lukman paggun agu-longgu e barung, tengnga saba. Caddhangnga esaba’ e sangger. Rasoganna ebukka’ pas ekabadhi keppay. Sakejja’aggi’ Ajji Lukman makalowar pa’-lopa’. Papir epeset, eberri’ bako pas eposel. Roko’ etonoi, esergu’ sambi pay-keppayan.

Ajji Lukman akaton ngalamon ngoladi ka sakobengnga salowassa saba. Kadhang Ajji Lukman kapereng ngejung, sowarana lere.

”Ngereng palemana, Ba’ Ajji,” Morakib nyapa Ajji Lukman.

”Maddha, Cong, bula gi’ so-ngaso neko,” Ajji Lukman nyambidi. Sambi nganggit paparegan asella kejung, Ajji Lukman gi’ terros agu’-ganggu’ nyergu’ roko’na. Sakejja’aggi’ ekera kasona elang, Ajji Lukman masang rasogan, nyongguy garunju, pas terros paleman.

***

E pangkeng, Durahman ampon ngantos Ajji Lukman se ngare’ ka saba. Sambi dhung-tedhungan, Durahman ngantos rabuna Oba’ Ajji Lukman. Sambi nyongguy garunju, Ajji Lukman laju nojju ka kandhang, nyaba’ rebba. ”Dika gella’ pon, Le’ Towan?”  Ajji Lukman nyapa Rahman.

”Gella’ ampon, Mak Towan,” Durahman nyaot.

”Antos sakejja’, bula mandhiya sakale. Gadhiya notta’ kobi, gella’ embugga agabay sabellunna bula mangkat ka saba,” Ajji Lukman nerrosagi.

Durahman ta’ nyaot nandha’agi manot. Sambi adha’ar kobi, Durahman ngantos Ajji Lukman. Sakejja’aggi’ Ajji Lukman nyalame Rahman.

”Bula sape etabar ballung juta, Le’,” Ajji Lukman ngabidi cator, sambi masepa’ songko’ cellengnga tor masang kanceng rasoganna se abarna pote.

”Sapa se nabar, Mak Towan? Mon ta’ ce’ butona ka obang dinggal ja’ juwal, Mak. Ango’an obu pasampe’ abudhu’,” Durahman nyambidi.

”Ta’ ganekona, kacongnga garowa se badha e pondhuk buto pesse bannya’. Para’ ujiyan ca’na,” ca’epon Ajji Lukman.

Mat Sa’i, pottra sareyangnga Ajji Lukman ampon langkong lema taon mondhuk ka Bangkalan. Sakejja’aggi’ bakal ngadhebbi ujian, nandha’agi bakal lulus madrasa.

”Dika ta’ nemmo nape pole, Le’. Embugga adha’, entar lalabat,” ca’epon Ajji Lukman sambi maso’ ka dhalem compo’na. Saamponna kalowar, Ajji Lukman neggu’ barang lanjang ra-kera dhucengkang. Barang paneka ebungkos dalubang celleng. Sakone’ dhari barang gapaneka ekarassa ro’om malathe.
E Kampong Neggara paneka, Ajji Lukman pajat kalonta gadhuwan gagaman se cokop mapan. Sadaja oreng, ponapa pole se pajat ampon seppo oneng. Gagaman gella’ aropa’agi sangkolan dhari Ju’ Pasar, seppona Ajji Lukman. Ekakabar jugan, posaka gella’ tao badha se akarep ngobangana’a kalaban tabaran lema bellas juta.

Ajji Lukman e Kampong Neggara paneka jugan kalonta menangka panotan. Salaen sogi, parjuga amarga badanna teggep, songot merrong. Ajji Lukman jugan sanget darma. Lebur ka tatangga tor ta’ tao ekakabar atengka sala.

Manabi reng-oreng gadhuwan hajadan, paste se ekagabay ponjugan rembak ka’dhinto Ajji Lukman. Manabi badha kakorangan, misalla obang, Ajji Lukman laju apareng bantowan. Dhari sepat-sepat gapaneka, Ajji Lukman ekasengkae.

Ka’dhinto akadi langka’ sareng kodhungnga. Rajina, Ajji Nawati jugan kalonta oreng bine’ se darma, raddin, tor atoro’ oca’ dha’ ka rakana. Sambi mokka’ bundu’na barang gella’, Ajji Lukman, mator.
”Bula matoro’a posaka neko ka dika, Le’ Towan,” ca’epon Ajji Lukman. Durahman semmo takerjat nangale posaka kerres ellok tello’.

”Dha’ramma, Mak Towan, ampon ja’ ka kaula,” Durahman semmo nola’.

”Ta’ anape, Le’. Poko’ posaka neko rabat, dika ta’ usa tako’. Me’ pola adulluwan bula dhapa’ ka omor,” ca’epon Ajji Lukman. Posaka pas eparengngagi ka Rahman. Robana Durahman sabatara laju pocet tor bingong. Tanangnga ngetek se narema posaka.

”Tape, ja’ sampe’ loppa dika, Le’, sabban malem Juma’at neko sonson. E budhi are, posaka neko bagiyagi bila kacong bula se sareyang, Mat Sa’i, pon dibasa. Pateppa’ e malem Juma’at manes, dha’ budhi pokol dhubellas,” caepon Ajji Lukman.

”Enggi, Mak Towan,” Durahman sambi aonggu’.

”Sabellunna posaka neko etarema, ja’ loppa keya Mat Sa’i dudus kalaban aeng petto’ somber ecampor kembang petto’ ropa ban barna, maca salawat sabellas kale ja’ anyaba. Pas panyettong ka Se Settong sambi karettekkagi e atena, tadha’ kabasa angeng Allah Se Maha Ontong,” ce’ mantebba Ajji Lukman se apareng oneng.

”Tadha’ pole se esangkolagina bula ka na’ poto. Sakeng pangarep posaka neko ta’ gaggar ka oreng laen. Senga’ gi Le’ Towan, posaka neko ja’ sampe’ eangguy kalaban sombung, ojup, nape pole eangguy e jalan se lopot. Amarga, posaka neko pajat pon toronan molae dhari juju’ bula se andhi’ jajuluk Ju’ Pasar ban posaka neko badha se noguwi.”

”Malathe Sato’or nyamana posaka neko. Jennengngan Karaton Songennep, dhari Pangeran Banuwaju. E settong bakto, posaka neko elang ta’ kalaban sabab. Tape alhamdulillah bisa abali saamponna ekodhang kalaban Sorat Kulhu.”

***

Are Kemmis, para’ sorop are, Durahman mangkat ka saba ngare’ rebba. Garunjuna gi’ ta’ possa’. Dhari lao’ Syamsuni berka’ pang-takarpang sambi lok-ologan. Durahman tababeggen asella takerjat. Ta’ biyasana aba’na sampe’ esosol.

”Pa’, Pa’ duli paleman, Pa’,” ca’epon Syamsuni tapegga.

”Badha nape, Na’?” Durahman satengnga mancella’.

”Oba’, Pa’, Oba’ Ajji, Pa’,” Syamsuni ngap-engngaban.

”Anape oba’na, Cong?” Durahman bingong.

”Oba’ Ajji Lukman adha’ omor, Pa’,” Syamsuni nyarembeng aeng mata. Ta’ bannya’ dhabu tor ta’ atanya pole, Durahman berka’ paleman. Sadha’na ebuwang, garunjuna edina.

Saamponna tanduk ka compo’na Ajji Lukman, eka’dhissa’ ampon bannya’ oreng. Berruy tor cerreng kene’ raja laju salsal. Bibbi’ Nor kalengnger. Bala tangga badha se ngaji. Badha jugan se nanges sambi aberruy. Sabagiyan pole aladin Bi’ Nor se taselep.

”Sa’i, mole Cong, dika ekaposang eppa’na, Na’,” Bi’ Nor na-kalana enga’. Tape adhabu posang, sambi acerreng, sambi aronda, akadi oreng kasosoban jin. Sakejja’aggi’ kalengnger pole. Tanangnga bine’an badha se neggu’i. Badha se ngosabi bun-embunanna Bi’ Nor kalaban aeng. Badha jugan e seddi’na se sambi adikker.

”Dika kadadak eppa’na. Ja’ dhatengnga saba dika laju mandhi,” Bi’ Nor acaca saromban. Nalekana enga’ pas kalengnger pole.

”Inna lillahi wa inna ilaihi raji’un, sampeyan ongguna gella’ rowa amet ka kaula, Mak Towan?” Durahman akarettek dhalem atena sambi nanges.

”Ganeka oba’ kadadak ca’na, Pa’. Ca’epon Bibbi’, sapalemanna Sampeyan, oba’ aserro ngaronyo tor maranga’ badanna,” ca’epon Syamsuni ka eppa’na.

”Neko nyamana pon napa’ ka baktona seda. Syamsuni, jalan dika ka pondhuk, Na’, kone’e Mat Sa’i,” Durahman sambi nanges ruk-derrugan.

”Enggi, Pa’,” jawabba Syamsuni jugan sambi nanges.

***

Saamponna lempas dhari pa’ polo arena Ajji Lukman, Durahman entar ka compo’na Mat Sa’i. Ta-pata pokol sapolo malem. Durahman epanggi’i sareng Mat Sa’i. Bibbi’ Nor ampon asaren.

Kabadha’an ampon seppe. Ta’ ekaedhing sowarana oreng sakale. Coma enger kalaban monyena balang, jangkrek, tor keban laenna.

E pangkeng Durahman sareng Mat Sa’i tor-catoran. Acator molae dhari bab saba, sape, cator Mat Sa’i se gi’ badha e pondhuk, sampe’ napa’ ka careta bab Ajji Lukman se seda’a. Bakto acareta Ajji Lukman ka’dhinto, cekcek laju amonyeyan. Bakto ampon napa’ ra-kera pokol satengnga settong malem.

”Bula madhapa’a manat dhari jennat eppa’na dika, Cong,” ca’epon Rahman.

”Ngereng dhabu, Paman, manat ponapa ka’dhinto?”

Durahman langsung makalowar barang lanjang. Ra-kera dhucengkang. Abundu’ kaen celleng. ”Neko bula narema dhari eppa’na dika, Cong, ta’ napa’ saare sabelunna jennat seda. Pajat baseyatta soro bagi ka dika,” ca’epon Rahman. Mat Sa’i laju nanges sasegunan nangale barang gapaneka. Amarga enga’ dha’ eppa’na.

”Maddha dika ka taneyan,” ca’epon Durahman.

Tengnga malem, lempas dhari pokol settong, e sakobengnga ka’dhinto tadha’ oreng laen pole. Coma Durahman sareng Mat Sa’i. E taneyan, Mat Sa’i alonggu asela ngadhep ka bara’. Sadaja kaparlowan se ampon ebaseyattagi sareng jennat Ajji Lukman ampon eparanta. Akadi mennyan, aeng petto’ somber sagenthong kene’ se ecampor sareng kembang pettong ropa ban barna.

Saamponna ngobbar mennyan, bibirra Durahman mo’-kemo’an, badha se ebaca. Salastarena ka’dhinto, Mat Sa’i laju edudus. ”Neko’, Cong, sangkolan dhari eppa’na dika. Sanonto epanapa’a ban bula. Dhabuna eppa’na dika, posaka neko nyamana Malathe Sato’or, jenengngan Karaton Songenep dhari Pangeran Banuwaju.”

Tanangnga Durahman baktona magi ngetter. Tanangnga Mat Sa’i jugan ngetter. ”Dhabuna eppa’na jugan, posaka neko ja’ sampe’ eangguy kalaban sombung, ojup, nape pole eangguy e jalan se lopot. Amarga, posaka neko pajat pon toronan molae dhari juju’na se jajuluk Ju’ Pasar. Ban posaka neko badha se noguwi. Misalla posaka neko elang marga loppa otaba marga sabab laen, dika cokop maca Kulhu tello kale. Pas olok malathe sato’or, insya Allah posaka neko bakal abali pole,” Mat Sa’i coma aonggu’.

Bakto atamba malem. Ajam pon molae akongko’ nandha’agi para’ Sobbu. Mano’ tharas amonyeyan, asepsap e sakobengnga. Cekcek laju ramme. Durahman pas amet paleman. (*)


ABD Rahem
*Katowana Komunitas Jurnalis Sumenep (KJS) tawon dhari tawon 2016
*Carpan eattas epetthek dhari Jawa Pos Radar Madura (JPRM) eccaban Ahad, 6 Maret 2016
*Jugan carpan kasebbut akompol dhalem buku "Tora Satengkes Carpan Madura" 2017